LEU KACHENG 5 - Khumi Common Language Bible

Ami i aju chanau taphra y ai nai paka nai

¹ Deang awi, nang ly dawn ryhpatyh iy cheng naira, pany thai praw nai cheng naira napi nai, kai i leuchi tangai ba.

² Hunaibaly nang ly mana sa ai mo, nanai lam kateng pany ai. Nang i katheu nai leuchi py, cheng naira napi nai leuchi lawm ai.

³ Juvo awm nai neampachy i labeaungteng ly khawi hang kamta tiu iy, ni i pachawm nai py Olive asitui kamta panai ai i,

⁴ kangkhym y huni neampachy ly nang i tlang tleaung y paleung bi nai hawi patang naira ny y baly, takhra ati sai py hawi naira pei thai y.

⁵ Ni ly nang ai tavau saleaung y ang pahawi ai. Ni i tako nai lam ly tavau pri y chei nai lam ne.

⁶ Ni ly heng nai lam y tako y naimy angphri vui iy, tako reng nai ne. My i sa nai kalop ai mymy pany y.

⁷ Hunai deaungkho y kai i deangchi awi, kai i leu tangai u; kai i thui nai leu ai mana khala py tami u moh.

⁸ Huna nai neampachy teng i nai kamlo y asyn u; ni i yhm katheu pa-kho sahawi y malawn py chei u moh!

⁹ Ti y baly nangchi i awm nai tahm ly khumi takhrachi my nga vui ai; nangchi ly deaungdi thym khala my pahyp y naimy ana nai khumichi i kiu y dei u ai.

¹⁰ Apany vai y nai khumichi my, nangchi i yhmtheaung katui awm nai ngierei, ang la pi pawn ai. Naibaly nangchi i ko nai yhmtheaungchi ly khumi takhrachi my amtym ai.

¹¹ Nangchi ly tlum tlang atho bai iy dei ai kasa nai khala, ira tleaung y tangam nai thym khala,

¹² nangmy i paleung y, “Kai ly thui parip nai leu tangai ai nai ngai y lawh mo? Khumi takhrachi i parip nai ai py, tangai ai nai ngai y lawh mo?

¹³ Kai ly kaimy i sarachi i leu tangai y, tahm khai y lawh ly.

¹⁴ Vai, kai ly khumichi i mo y tahm anem vui lawh bo hi ly " nanai thui ai.

¹⁵ Nang ly nangmy i aju tlang tleaung y ka-ym awm ba. Nang i tamen nai ly ni leaungrei ai naini ne khyh ba.

¹⁶ Neampachy takhrachi hawi nga nai chanauchi ly nang ai hawi naira pei y leang.

¹⁷ Nang i chanauchi ly nang ai ang kry ai nai ne. Apany vai y naichi ai kry ai nai ny y leang.

¹⁸ Hunai deaungkho y nangmy i aju hawi phai amo theu ba. Nang hawi apom nai neampachy,

¹⁹ sisiunu kamta, khrei ai nai hawi iy neaung hawi nai neampachy hawi vanrei amo theu ba. Ni i paleung tleaung y amo theu ba. Ni i tamen naira my suithleng sy.

²⁰ Deang awi, nang i tamen naira ly ati mana nai y takhra neampachy leaungrei teng y pei vui ai mo? Nang ly ati mana nai takhra neampacho aju i paleung tleaung y paleung amo theu lawh ai mo?

²¹ Areng ly nang i sa nai ngiereichi ai, ang niu pi se nai ne. Mymy ly nang i chei naira tleirei y, khen patawm jo nai ne.

²² Khumi hawi y nai i sa nai kamngochi ly deaung hawi atawm; huni khumi ly my i kamngo paleupy ra y man reng nai ne.

²³ Ni ly amymy ai amkyn pajau y nai deaungkho y, dei nai ne. Khrikhri pa-rei tamang naimy ly ni ai tapreaung angawm y ang vum hai ai.