LEU KACHENG 3 - Khumi Common Language Bible

Deaungdichi i vui parip nai leuchi

¹ Deang awi, kai i patiu pi naichi tami moh; kai i leu pei naichi pany jo ba.

² Kai i patiu pi nai leuchi ly nang ai heng sau hai iy, nang chawn hai ai.

³ Ka-ym awm nai hawi leu meitang ai, mana khala py patlaw su moh. Hunichi ai nang i kaneaung y awi me ba; nang i paleung pheira y tajiu typ ba.

⁴ Nang ly huna nai sa baly, Tameuh i mo y hawi khumichi i mo y meimai nga ai.

⁵ Areng ai ly nang i paleung verei hawimy ym ba; nangmy i pany naira ai, mana khala py a-ym moh.

⁶ Nang i sa naira tleirei y, Areng ai pany jo ba; huna baly mymy ly nang ai lam kateng ang patei ai.

⁷ Nang ly nangmy i cheng naira y paleung len moh. Areng i leu ai tangai iy, teng y naira y ly en vui ba.

⁸ Huna nai sa baly asi kahawi teaung nai kamta, nang i tamochi tha ai i, nang i no patang naichi py dam ai.

⁹ Nang i li, hlaura i nga nai amti amjang athai chuluchi Areng teng y talam ba.

¹⁰ Huna nai sa baly nang i chohpaichi ly choh kawi iy, nang i chy-ychi ly kreip hang lem phraiphreaung ai.

¹¹ Deang awi, nang ly Areng i thui parip nai ai hawihai dawn ryhpatyh iy, mymy i pany hai nai ne, nanai dawn jo ba.

¹² Amhm ampo ly tahm khai ai hawi nai chapo ai thui parip reng nai kamta, Areng my py, mymy i tamen nai khumichi ai pajeng reng nai ne.

¹³ Cheng naira nga nai khumi, ti y baly pany thai naira nga nai khumi ly taham hawi.

¹⁴ Huni ai nga nai ly tangka nga nai tleaung y hawi keh; nang i vui ly muku tleaung y py vang teng nai ne.

¹⁵ Cheng naira ly amia lengseaung tleaung y py vang teng keh; paleung ka-no hawi nai bawibawichi ly huni hawi pata pajau y leang.

¹⁶ Cheng naira ly nang ai heng sau nai, nang chawn nai hawi tahm awm ai nai ang pei reng nai ne.

¹⁷ Cheng naira ly nang i heng nai deung y tlamsa hai pajau; nang i heng nai jeungrei py, nang ai chymme naimy pahawi ai.

¹⁸ Cheng naira hau nai khumichi ly taham hawi; cheng naira ly nichi heng ai nai kry pi ai.

¹⁹ Areng ly mymy i cheng naira hawi khaileaung ai sa; mymy i pany naira hawi kani khusang ai khaw hai.

²⁰ Huni cheng naira hawi tavo tuichi leaung hai; khupanymchi ra i kanitui nai hai.

²¹ Deang awi, nang i cheng naira hawi dawn pany praw thai nai cheng naira ai ly kry ba. Mana khala py nang hawi amprei hai vui moh.

²² Hunichi ly nang i vui tlamsa naimy heng ai nai hawi, amo theu parai naimy heng ai nai ka-vo sa pi ai.

²³ Nang ly pathuikhe y naimy, heng nai ryrei ly chymme naira avum jojo ai.

²⁴ Nang ly i angvyn nai khala, jeira awm ai ny y; vumtorei py i nem ai.

²⁵ Nang ly khumi hawi y naichi i tlang tleaung y ali kamchai kamta, vaimy tym miu reng nai patangra ly avum ai, nanai paleung mawn moh.

²⁶ Areng ly nang ai chymme naimy ang khai ai; mymy ly nang i kheu ai, deaung y man y ai nai ang kry ai.

²⁷ Nang ly pajau nai neng tleirei y, kapahenra ngai nai khumichi ai pahen pi ba.

²⁸ Nang i yhm deaungpachi ai, vaini my sabawm pajau baly, khawndam tym pa-rei ajeng moh.

²⁹ Nang i yhm deaungpachi tlang tleaung y, no nga hai ai nai ati sai py dawn reng moh. Ni ly nang ai ym naimy, nang i sahawi y awm nai khumi ne.

³⁰ Nang i tlang tleaung y mana khala py, khrukhra hai vai y nai khumi hawi, ati sai py ny y nai leu a-ei moh.

³¹ Khrukhra hai reng nai khumichi i tlang tleaung y, paleung angai y nai awm reng moh. Nichi i sa nai kamta sa ai nai paleung ka-dawn awm moh.

³² Ati mana nai mo nabaly Areng ly hawi y sa nai khumichi ai niu ngai y i, khumi kahawichi ai ly mymy hawi amkawm hai nai deaungkho y ne.

³³ Areng ly khumi hawi y naichi i yhm ai amsawi lawi hai iy, khumi kahawichi i yhm ai ly amtheaung hai nai ne.

³⁴ Mymy ly paleung len nai khumichi ai niu ngai y i, paleung apanem nai khumichi ai ly meimai khen nai ne.

³⁵ Cheng nai khumichi ly palo naira nga u ai; khumi hawi y naichi ly kangji nga u ai.