LEU KACHENG 21 - Khumi Common Language Bible

¹ Areng ly tavo micheaung tui leaung nai ai paka nai kamta, samrang i paleung ai rai y naimy peang nai ne.

² Nang ly nangmy i sa nai ngiereichi teng, nanai athang khai reng; na i py Areng ly nang i dawn pasym naichi ang chih pi ai nanai pany jo ba.

³ Areng ly kapathypra talam nai tleaung y ly leu meitang adyh adawi nai ai kawn keh.

⁴ Tahm apasang nai mei, amlyh am-e nai paleung hawi, hawi y nai sai bawibawichi ly kamngo ne.

⁵ Hawihai palai adawn yb iy angjeng atyp nai khumi ly nang chawn ai. Vaimy sa tamangtang reng nai khumi ly avaw naira avum jojo ai.

⁶ Leu ka-chawi hawi nga nai yhmtheaung katui ly tui kamhui kamta tamo y rai khala, nang ai dei kho mang y ang vum hai reng nai ne.

⁷ Khumi hawi y naichi ly mymychi i khrukhra naichi molam y, pajeng naira avum u ai. Nichi ly kateng sa ai nai ngai u y.

⁸ Kamngo awm nai khumichi ly lam ka-kawi mang tako u reng; kamngo by y nai khumichi ly kateng sa u reng nai ne.

⁹ Josei ryry nai aju hawi vanrei, yhm y awm ahawi nai tleaung y ly yhm amphu salo y awm nai ly hawi keh nai ne.

¹⁰ Khumi hawi y naichi ly hawi y naira sa ai naini ngai nai paleung awm jojo, Nichi ly ami i tlang tleaung y py, pahen vai y leang.

¹¹ Paleung asang nai khumi leaung leaungrei ly kamngo pajeng naira avum nai khala, dawn pasym kawp u nai khumi malawn py, tau cheng nai khumi lawm pajau. Cheng naira awm nai khumi ly thui parip nai ryrei my cheng naira nawi ra reng nai ne.

¹² Tameuh meitang naimy ly khumi hawi y nai yhm i sa naichi ai pany pi se nai ne. Huna nai y mymy ly huni khumi hawi y nai i yhmtheaung katui phra hai ai.

¹³ Khumi kamawnchi i vo tangam nai raawi thai ai nai ngai y nai khumi ly mymy naimy kasabawmra hnei nai, vo tangam nai khala ly ami py thai ai ny y.

¹⁴ Khumi leaung leaungrei hawi aly akhang y nai awm lawh baly, kangviu y pei nai langseaung ly kado theu naira rym hai vui pajau.

¹⁵ Ka-dyh ka-dawi sa nai khala, khumi kahawichi ly amo theu u. Na i py khumi hawi y naichi ly paleung phra u nai ne.

¹⁶ Tau cheng nai lam en vui nai khumi ngiereichi ai ly dei areng my ajeng nai ne.

¹⁷ Kreip hang hawi cha nei kahawichi cha nei iy, tlamsa ai ngai nai khumi ly mana khala py nang chawn ai ny y.

¹⁸ Khumi hawi y naichi ly khumi kahawichi i tlang tleaung y patang naira tym hai ai nai sa nai ngierei ly mychi teng y tym hai ali teang reng nai ne.

¹⁹ Avawrei josei ham nai aju hawi vanrei awm ahawi nai tleaung y ly tui takang nai daichi ka-vym theung y, awm nai ly hawi keh.

²⁰ Tau cheng naira awm nai khumichi ly yhmtheaung katuichi hawi tlamsa naimy awm u reng, Na i py khumi cheng y naichi ly paisa tangkachi ko phai ko baly, pasum krai ryp nai ne.

²¹ Neaung hawi iy pahen reng nai khumi ly heng sau ai. Khumi takhra my tahm khai ai i, hawihai palai my amkawm ai.

²² Lulip pany nai tavailu ly khaw parai nai mary ai tiu vui iy, nichi i khaw parai nai mary apaichi py, taphra vui pajau nai ne.

²³ Patang naira avum ai nai ngai y nai khumi ly labeaung palai amkyn ai nai tla.

²⁴ Paleung asang nai khumi nanai ly amlyh am-e nai khumi, paleung len nai khumi, kapahenra by y nai khumichi ne.

²⁵ Kalop sa ai nai ngai y nai khumi napjang ly amymy ai deira hau nai ne.

²⁶ Ni ly mymy i ngai naichi ai, kani khengrei adawn lyhlyh nai ne. Na i py khumi kahawi ly pei talam pajau nai deaungkho y, paawp y naimy pei reng.

²⁷ Areng ly khumi hawi y naichi i, apathyp nai tawnbawichi ai niu ngai y. Chai y nai paleung hawi apathyp nai khala, niu ngai y keh nai ne.

²⁸ Teng y nai pany hai nai keung i katheu nai ly khaw y; hawihai palai dawn pasym reng nai pany hai nai keung i leu ly khaw parai nai ne.

²⁹ Khumi kahawichi ly amymy ai a-ym nai ne. Khumi hawi y naichi ly kahawi amlawn akhikan reng nai ne.

³⁰ Khumi ly my i cheng naira, sa thai naira, pany thai praw nai cheng nairachi hawimy, Areng ai ly ka-awi so pajau y leang.

³¹ Khumichi ly tavai atiu ai nai vui y, keaungngochi angveirym pajau. Na i py eaung naira pei nai keung ly Areng ne.