LEU KACHENG 2 - Khumi Common Language Bible

Cheng naira i langseaungchi

¹ Deang awi, kai i patiu pi nai tangai ba; nang ai kaimy kang thui pi nai kamta, sa ai nai mana khala py tami moh.

² Cheng nai leu ai ly tangai iy, huni ai pany thai ai nai atho so.

³ Cheng naira nga ai nai ahihawi naimy hnei; pany thai praw nai cheng naira nga ai nai ahui kajeaung kaji ba.

⁴ Nang ly tangka ai py, heu vui nai yhmtheaung katui ai py hau nai kamta, pany thai praw nai cheng naira ai atho sa iy hau ba.

⁵ Hina nai kamta sa baly nang ly Areng ai jei kaji ai nai sai pany ai i, Tameuh i satang pany pajau ai.

⁶ Cheng naira pei nai keung ly Areng ne. Cheng naira hawi pany thai naira ly mymy teng i dengdairei ang tym nai ne.

⁷ Mymy ly khumi meitang, leu meitang teaung nai khumichi ai sabawm iy ama hai bo.

⁸ Mymy ly khumi takhrachi ai ka-dyh ka-dawi sa pi reng nai khumichi ai ama hai iy, mymy ai tahm khai nai khumichi ai kry nai ne.

⁹ Nang ly kai i leu tangai baly kateng lam, meitang nai hawi adyh adawi nai i awm nai sai pany ai. Amy i sa ai avo nai sai py pany ai.

¹⁰ Nang ly khumi kacheng lawm ai i, nangmy i pany nai molam y, paleung amo theu naira nga ai.

¹¹ Nang i pany praw thai nai cheng naira hawi, pany thai naira my ly nang ai ama hai ai.

¹² Teng y nai kalop so hai y ai nai py paka ai; huni bo y ka-jeira tym hai ai nai labeaung mang kachyh reng nai khumi,

¹³ heng kahawi heng nai ai khai su iy, kamngo kaveng theung y anum nai khumi,

¹⁴ hawi y sa ai nai ngai iy kamngo naira y amo theu nai khumi,

¹⁵ ka-ymra by y nai khumichi hawi py, nang ai amkawm hai y ai.

¹⁶ Nang ly kaja hawi y nai neampachy, amy i juvo tlang tleaung y ka-ym by y iy,

¹⁷ Tameuh i mo y vaineng adeu nai py patawm y nai neampachy i parawi hyp nai paka pajau ai.

¹⁸ Nang ly huni neampachy i yhm y chei baly, dei areng teng y chei nai lam y tako nai khumi ne. Huni yhm y chei nai ly tavau saleaung y ahihawi nai py ne.

¹⁹ Huni neampachy i yhm y chei nai khumi ly mana khala py vawi ali teang thai y. Ni ly heng nai lam mang y mana khala py ali teang thai y leang bo.

²⁰ Hunai deaungkho y nang ly khumi kahawichi i awm nai sai amtiu iy, hawi nai leaungsai hawi heng ai nai tla.

²¹ Khumi kahawichi, leu meitang teaung nai khumichi ly hini achi i pri y awm ai nai nga u ai.

²² Na i py Tameuh my ly khumi hawi y naichi ai, hini pri i dengdairei patheu pawn ai. Khaileaung y prau nai acha keung ai akyn vui nai kamta, khumi hawi y naichi ai akyn vui ai.