KOLOSA 2 - Khumi Common Language Bible

¹ Kai ly nangmychi hawi, Leiodikeia avang y awm naichi hawi, tlang y kai meimai niu y nai ngiereichi i vui py mana tanrei ty na pa-rei kasa pi tanga mo, nanai nangchi pany ai nai kangai;

² hunaibaly nichi ly Tameuh i leu kathiu, Krista ai pany ai nai (mymy y ly cheng naira hawi pany naira yhmtheaung bawibawi heu nai ne),

³ pany thai naira i ym thleng thleng nai nang naira bawibawi nga ai nai tamen naira y amtawm achu iy, nichi i paleung ly awmnem thai ai.

⁴ Ami py nangchi ai leu kakawp y ang tapawp y ai nai huni ly kana nai ne.

⁵ Kai ly nangchi teng y ly tlang y awm y teu iy py, kawn parai naimy kaawm iy, nangchi i hawi u angeng nai sai hawi, Krista ai ym nai khaw u nai sai ly khen nai, phailo y ly nangchi teng y kang awm.

Krista i saho y nga nai nang naira

⁶ Hunai deaungkho y nangchi ly Areng Krista Isu ai kawn u nai kamta ly, mymy y tangjyn pala nai hawi adyh kalau ryhryh nai awm iy,

⁷ nangchi ai ang patiu nai kamta ym u naira y ly khaw parai pa-rei awm u.

⁸ Amkym u, ti y baly ami py Krista i leu kamta ny y naimy, khumi i reita taviu nai hawi khaileaung pri i pakeungchi kamta ne lawh iy, ni i leu kacheng hawi tapawp atyhtyh naira y nangchi ai ang patiu lawh na.

⁹ Mymy y ly Tameuh i angym naira cheaungkhang ly tlang nga nai awm veng.

¹⁰ Nangchi ly mymy y ly angym teang; ni ly areng naira hawi aly peang naira bawibawi i lu ne.

¹¹ Nangchi ly Krista i lengkhym takip pi naira y ly ngan i tlang lei be nai, kiu y lengkhym takip nai ny y naimy, mymy y ly lengkhym takip u nai ne chy bo;

¹² nangchi ly baptisma y ly mymy hawi vanrei a-up u teang nai veng bo, hunira y ly, kadeichi theung i dengdairei mymy ai pathau nai keung Tameuh i sa nai sai ym nai deaungkho y, nangchi ai mymy hawi vanrei ang pathau teang nai veng bo.

¹³ Naibaly nangchi ly nangchi i taphra nairachi hawi nangchi i ngan y lengkhym takip y nai deaungkho y dei u nai ne, nangmychi kypkyp ai ly mymy hawi vanrei ang paheng nai ne chy bo;

¹⁴ achi i taphra naira bawibawichi ly ang pahen iy, achi i tlang tleaung y awm nai kalai cha leu pei nai tajiu naichi, achi ai ang paka reng nai ai ly mymy ly taphra veng bo; huni kypkyp ai ly kraws y tahen iy, mymy ly la vui veng bo;

¹⁵ naibaly mymy ly areng nairachi hawi aly peang nairachi ai ly leng iy kamtawi y my hunichi ai amteng hai nai teaung nai, kraws y ly hunichi ai pajau bo.

¹⁶ Hunaibaly cha nai molam y mo, nei nai molam y mo, pawi kani molam y mo, lo si nai molom y mo, anawn kani molom y mo nangchi ai ami py cheh moh sy;

¹⁷ hunichi ly atiti tym ai naichi pa-pui teu, ta tatang ly Krista i ne.

¹⁸ Ami py amy i ngai naira y leu anui nai hawi, kani pri i amtaw thau naichi ai chiu naira y teaung nai, nangchi i kawn nai vang ly lawm pi moh sy; mymy ly mymy i atitichi niu naira y awm jojo iy, mymy i tlang i paleung deaungkho y am-e atyhtyh nai, Lu y amkhaw cheng y nai veng:

¹⁹ huni Lu i saho y ly tlang bom verei ly lenglawchi hawi kananchi deaungkho y pacho nai amtawm achu nai awm iy, Tameuh i veang naira y veang lawh veng.

Krista hawi vanrei dei nai hawi heng nai

²⁰ Nangchi ly khaileaung pri i pakeungchi mang i nai Krista hawi dei u vui chum bo nabaly,

²¹ khaileaung pri y heng nai kamta, khumichi i leu pei nai hawi patiu nai,

²² “Amkhaw py amkhaw moh, pateng py pateng moh, nam py nam moh,” napi nai kamta ati mana nai leu pei naira y apei u lawh a? Hunai kamta atiti bawibawichi ly teaung nai tarawi y tama ai nai tla.

²³ Hunai kamta atitichi ly amy i ngai nai kamta chiu nai hawi, leu anui nai hawi, amy i ngan y no apei naira y ly cheng naira angam mang y amteng hai khyp nai ne; hunichi my ly tlang i kangai patawm nai kam ai naira y ly ati sai py kamran awm lawh y leang.