KOLOSA 1 - Khumi Common Language Bible

¹ Pawla, Tameuh i kangai y Krista Isu i amtaw thau nai hawi,

² Timothei achi i amjo amnau py, Kolosa avang i Krista y khumi kachaichi hawi, amjo amnau ka-ym awm naichi teng y ly: Tameuh achi i ampo teng i dengdairei pahenra hawi awmnem naira ly nangchi teng y awm sy.

Kawn nai leu thui nai chiu sa nai

³ Kani pri mang y nangchi i vui athang khai naira ang khai pi nai deaungkho y, nangchi i Isu Krista ai ym nai sai hawi,

⁴ nangchi i khumi kachai bawibawichi i tlang tleaung y tamen naira awm nai sai satang py kaichi ly thai iy, nangchi i vui chiu kang sa pi jojo i, Tameuh achi i Areng Isu Krista i Ampo teng y ly kaichi ly kawn nai leu thui.

⁵ Nangchi ly huni athang khai naira satang jangni y Satang Kahawi leu meitang y thai u nai ly, nangchi teng y ang tym chy bo;

⁶ nangchi py meitang khyp naimy Tameuh i pahen nai sai thai u iy, nangchi i pany nai kani dengdairei nangmychi y py, khaileaung pri verei y py athai iy peung dudu nai ne.

⁷ Hunai kamta khyp teang nangchi ly Epaphra, kaichi hawi sa ahawi nai ngai parai nai teng y amtiu u veng bo.

⁸ Mymy ly kaichi i jeng y awm iy, Krista i krykeung ka-ym awm parai nai khumi ne i, nangchi i Phailo y tamen naira ly kaichi ai py ang thui pi bo.

⁹ Hunai deaungkho y kaichi ly huni satang pany nai kani dengdairei nangchi ly phailo mang i cheng naira hawi, pany thai naira bawibawi i saho y mymy i kangai pany naira kawi u thai ai nai hawi,

¹⁰ nangchi ly atiti kahawi sa nai cheaungkhangra y athai iy, Tameuh ai pany naira y py chawn ryh chawn ryh iy, ati cheaungkhangra y mymy i paleung i kangai sa ai nai, Areng teng y abang ai ataing nai lawn u thai ai nai, chiu kang sa pi nai hawi kang hnei pi nai py anawn y leang.

¹¹ Naibaly nangchi ly amo theu parai naimy kham pajau naira hawi, amnym naira cheaungkhang nga u ai nai, mymy i nang parai naira ham nai sai kamta sa thai naira y ham naimy,

¹² Ampo, kangvang i khumi kachaichi i yhmtheaung ahum ai ataing nai ang sa pi nai keung teng y ly kawn nai leu thui u.

¹³ Mymy ly achi ai kaveng aly peang naira i nai ang law hai i, mymy i Chapo tamen parai nai i peang naira y achi ai ang khai vui bo;

¹⁴ achi ly mymy y ly atleu naira nga nai ne, huni ly achi i kamngochi pahen nai ne.

Krista i tlang hawi sa nai sai

¹⁵ Mymy ly niu thai y nai Tameuh kamta atawm khyp nai, atiti sa nai bawibawichi tleaung y tapen manme nai ne;

¹⁶ mymy i saho y ati cheaungkhang sa nai ne iy, kani mang y awm naichi hawi, khaileaung y awm naichi py, niu thai naichi hawi niu thai y naichi py, areng atehra py, peang naira py, areng naira py, aly peang naira py, ati cheaungkhang mymy i saho y sa nai ne i, mymy i vui y py sa nai ne teang.

¹⁷ Naibaly mymy ly ati cheaungkhang by y rai khala y awm angchi yb nai ne i, mymy y ly ati cheaungkhang awm nai ne. Ni ly tlang i lu; huni ly palau takhra kamkawm ne:

¹⁸ naibaly mymy ly ati cheaungkhangra y salo keh lawn thai ai nai, mymy ly pakeung, kadeichi theung i dengdairei tapen manme nai ne.

¹⁹ Ati mana nai mo nabaly angym naira cheaungkhang ly mymy y awm nai hawi, mymy i kraws thi saho y aly naira sa iy,

²⁰ mymy y ly ati cheaungkhang amy hawi aly hai nai ly Ampo i paleung ngai nai tatang ne; mymy kypkyp y ly khaileaung pri y atiti awm naichi ai hawi, kani mang y atiti awm naichi ai py aly hai nai ly.

²¹ Naibaly nangchi ly jangni y atiti kamngo hawi y sa naira y Ampo hawi amprei nai awm u iy, nangchi i paleung y ly mymy i paleung ka-echi ne u veng;

²² na i py vai ly nangchi ai ly mymy i mo y chai parai nai hawi, meimai cheh ai by y nai hawi, thui ai by y nai angdo hai ai nai, mymy i ngan i tlang y ly dei naira i saho y nangchi ai aly hai nai bo:

²³ nangchi ly ym naira y awm u jojo i, amchym naira nga u iy khaw parai pa-rei awm u naimy, nangchi i Satang Kahawi thai nai athang khai naira i dengdairei asyh vui y baly; huni ly kani anui y atiti sa nai bawibawichi theung y aeu hai nai ne chy bo; naibaly kai, Pawla ai ly huni ai kry ai nai keung y ang palawn nai ne.

Ialau takhra ai kry nai Pawla i kalop sa nai

²⁴ Kai ly vai nangchi i vui y kang patang pi naira y ly kakawn, Krista i ngari patang nai kamthom ly mymy i tlang deaungkho y kai i ngan y ly kapatawm veangveang nai ne;

²⁵ mymy i tlang ly palau takhra kamkawm ne. Tameuh i leu thui pi angym ai nai Tameuh my nangchi i vui kai ai ang pei nai kamta, kai ai ly huni theung y krykeung lawn ai nai ang sa hai nai ne.

²⁶ Huni Tameuh i leu ly jangni jangkhawn i neng hawi deung kangthau awm nai dengdairei leu kathiu aheu nai ne; na i py vai ly mymy i khumi kachaichi teng y amteng hai bo.

²⁷ Hunichi teng y Cheng Takhrachi theung y huni leu kathiu nang parai naira i nang nai sai ly Tameuh ly pany hai ai nai ngai nai ne: huni ly hini ne he, Krista, nangmychi y awm nai, nang parai naira nga ai nai athang khai naira ne;

²⁸ kaichi my khumi leaung leaungrei ai parip iy, khumi leaung leaungrei ai cheng naira cheaungkhang y patiu nai, mymy i satang kaichi my thui pi reng nai ne:

²⁹ hunai kamta angdo hai thai ai nai mymy i kaimy theung y sa thai naira khrikhri pa-rei ang sa hai nai sai kamta sa tanga nai kasa akawm nai ne.