Kati Nai 9 - Khumi Common Language Bible

Pa-nyh Katlen vui nai Pawi

¹ Areng my Mosi teng y, Israela chengchi Aikupta pri i dengdairei theu u nai pa-nyh saneng, angchei i lo y, Sinai daichi ka-vymra thui pi nai leu ly

^2-3 “Hini lo kani holai palyhrei kani, kani avah nai dengdairei Israela cheng mipuichi ly Katlen vui nai Pawi sa ai nai leu pei yb nai kamta, sa u ai nai tla,” napi.

⁴ Hunaibaly Mosi ly Israela cheng mipuichi teng y Katlen vui nai Pawi sa ai nai leu pei i,

⁵ nichi ly angchei i lo kani holai palyhrei dym y, Sinai daichi ka-vymra Katlen vui nai Pawi sa u bo. Areng my Mosi teng y leu pei nai kamta, Israela chengchi sa u nai ne.

⁶ Na i py phyrei khumichi ly khumi tlaiveu ai nam lawh nai deaungkho y reita leaungsai y chai y i, nichi ly huni kani y Katlen vui nai Pawi sa naira y abawi ai nai ngo u y bo. Nichi ly Mosi nini Aron teng y chei iy,

⁷ “Kaichi ly khumi tlaiveu nam lawh nai deaungkho y chai y bo; takhra khumichi kamta kaichi py, Areng teng y kapathypra talam ai nai ngo y ai bo a?” nanai deng u.

⁸ Naibaly Mosi my, “Areng ly kai ai ati mana leu pei na mo, nanai ajeng u rai,” nanai pathang.

⁹ Areng my Mosi dengdairei

¹⁰ Israela chengchi teng y thui pi nai ly “Vai mo, vai mo mang y mo, Israela cheng theung i amimi py ne sy, Katlen Vui nai Pawi thym khala khumi tlaiveu ai nam lawh nai deaungkho y chai y nai khumi py, khuleaung kamlora tym vui nai khumi py, Katlen Vui nai Pawira abawi ai nai ngai baly,

¹¹ lorei ajeng pi iy pa-nyh lo, kani holai palyhrei kani dym y Pawi sa pajau; ni ly beram mawi ai angbo abawi y nai tako, an kakhochi hawi cha iy Pawi sa naira abawi pajau nai ne.

¹² Kani pa-nyh khawn khrairei teicha teinei palai ai nai avo y; beram hiu kadi ai nai avo y. Reita leu pei nai kamta khyp Katlen Vui nai Pawi sa ai nai tla.

¹³ Na i py nangchi theung i leaung leaungrei ly reita leaungsai y chai iy, khuleaung kamlo y chei vui nai ny y naimy Katlen Vui nai Pawi sa nai thym khala, kai teng y kapathypra talam y lawh baly, huni khumi ai kai i khumichi theung i nai nyn va vui ai. Ni ly my i kamngo nai y pajeng naira avum ai.

¹⁴ “Nangchi hawi vanrei khuteng sa nai cheng takhrachi py Katlen Vui nai Pawi sa naira y abawi ai nai ngai u lawh baly, nichi py reita hawi leu pei yb nai kamta sa u ai nai tla. Israela chengchi py ne sy, cheng takhrachi py ne sy, hini leu pei naichi tangai ai nai tla,” napi.

Mai angveaung nai Tamai

^15-16 Areng i awmra Tabynako ai tahyh nai kani y, tamai beu i huni ai khiu meuh bo. Vum y huni tamai ly maiteaung kamta angvang nai ne.

¹⁷ Tamai angteang nai tleirei Israela chengchi ly tai naira vym iy tamai beu nai meingtym y tai u bi bo.

¹⁸ Khumi mipuichi ly Areng my leu pei nai kamta, tai vym nai, tai tahyh nai sa u; Tabynako salo y tamai khiu nai ryrei nichi ly hu y awm u jojo nai ne.

¹⁹ Tabynako salo y tamai kakra awm jo baly nichi ly Areng i leu pei nai tangai i, meingtym asyh u y leang.

²⁰ Tlen tlenrei tamai ly Tabynako salo y kani kratleh y naimy awm; na i py nichi ly Areng i leu pei nai tangai iy, tai naira tahyh nai, tai vym nai sa u bo.

²¹ Tlen tlenrei tamai ly dym mang dengdai khawn khutawi nai ryrei awm khyh; nichi ly tamai angteang baly khuleaung amsa u nai ne.

²² Tamai ly Tabynako salo y kani nyhrei mo, lorei mo, sanengrei, ti y baly sanengrei bo y mo, khiu jo nai ryrei, nichi ly khuleaung amso u y nai ne. Na i py tamai angteang nai khala ly khuleaung amsa u teang bo.

²³ Areng my Mosi dengdairei leu pei nai kamta, nichi ly tai naira tahyh nai, tai naira vym nai sa u bo.