Kati Nai 1 - Khumi Common Language Bible

Israela chengchi ai amyn la angchei nai

¹ Israela chengchi Aikupta pri i theu u nai pa-nyh saneng, pa-nyh lo angchei i kani y, Areng ly Sinai daichi ka-vym y awm nai Tabynako mang dengdairei Mosi teng y leu pei nai ly

² “Nang hawi Aron ly Israela cheng nupai hawi yhm dengtheung ka-thui ka-thui amynchi la ai nai tla.

³ Tavai thau pajau nai tleaungri ka-cheang saneng apomrei hawi apomrei leng neampacho bawibawi amyn la ai nai tla.

⁴ Theaung ha harei i nupaira lu sa nai leaungrei my nangchi ai sabawm sy,” napi.

^5-16 Khumi mipuichi theung i vawi takhra nai, cheng theungchi theung y lu sa naichi ly hinichi ne: Theaung Nupai lu Ruben Sedeur i chapo Elizura Simeon Zurishadai i chapo Shelumiel Juda Amminada i chapo Nashon Isakhar Zuar i chapo Nethanela Zebulun Helon i chapo Eliaba Ephraim Ammihu i chapo Elishama Manase Pedazur i chapo Kamaliela Benjamin Kideoni i chapo Abidan Dan Ammisadai i chapo Ahieza Aser Okran i chapo Pakiela Kad Deuela i chapo Eliasapha Naphtali Enan i chapo Ahira

Theaung Nupai lu

¹⁷ Mosi nini Aron ly huni cheng theaung lu sa naichi i kasabawm hawi,

^18-19 pa-nyh lo i angchei kani y Israela cheng bawibawichi ai palau achu iy, nupai hawi yhm dengtheung ka-thui ka-thui amynchi la bo. Areng my leu pei nai kamta, saneng apomrei hawi apomrei leng khumi ka-cheang neampacho bawibawichi ai amyn la iy khai typ bo. Mosi ly Sinai daichi ka-vym y khumi amyn la nai ne.

^20-46 Jakob i chapo chalu Ruben theaung dengdairei amteaung iy, tavai thau pajau nai saneng apomrei hawi saneng apomrei leng, tleaungri ka-cheang neampacho bawibawichi ai, nupai hawi yhm dengtheung ka-thui ka-thui amyn la bo; khumi vuikanai ly hinichi ne: Theaung Vuikanai Ruben 46,500 Simeon 59,300 Kad 45,650 Juda 74,600 Isakhar 54,400 Zebulun 57,400 Ephraim 40,500 Manase 32,200 Benjamin 35,400 Dan 62,700 Aser 41,500 Naphtali 53,400 Bawibawi: 603,550

Theaung Vuikanai

⁴⁷ Amyn la naira y Levi theaungchi ai ly amyn lo y leang.

⁴⁸ Ati mana nai mo na baly Areng my Mosi teng y,

⁴⁹ “Nang ly tavai thau ai nai amyn la nai khala y Levi theaungchi tabawi moh.

⁵⁰ Nichi ai tavai thau hai ai nai tleaung y ly kai i awmra Tabynako hawi huni i ateaung bawibawichi ai kry ai nai keung y khai. Nichi ly Tabynako hawi huni i ateaungchi tawn ai nai hawi, hunira y kalop sa ai nai deaungkho y, Tabynako ka-ki tai sa iy awm u ai nai tla.

⁵¹ Nangchi ly tai asyh nai tleirei Levi theaungchi my Tabynako ai vym iy, meingtym kangthara Tabynako ai tahyh bi ai nai tla. Levi theaungchi ny y naimy takhra khumi leaungrei ly Tabynako sahawi y ahai lawh baly, huni khumi ai ly padei takengkei ai nai tla.

⁵² Israelachi ly tai naira meingtym tahyh nai khala mychi i nupai kamkawm ka-thui ka-thui mychi i tamkhawn anui y meingtym la ai nai tla.

⁵³ Na i py khumi leaung leaungrei ly Tabynako sahawi y ahai lawh baly, kai ly kado theu ai i, cheng theaung verei kapajeng lawh ai; hunaibaly Levi theaungchi ly Tabynako typ ai nai, Tabynako ka-ki tai sa iy awm u ai nai tla,” napi.

⁵⁴ Areng my Mosi teng y leu pei nai kamta, Israela chengchi ly sa u bo.