KALATIA 6 - Khumi Common Language Bible

¹ Amjo amnauchi awi, ami my kamngo ati py sa nai thym khala y theaugma nai awm khyly nangchi phailo mang y, asa naichi awi, “Kai py parawi naira avum teang lawh na,” nanai hawihai atyp u nai tarawi y huna nai khumi ai ly leu kanem chy y my angdo hai u.

² Nangchi i myn kaji pho nai ly alawn u, hunaibaly nangchi ly Krista i reita patawm u nai keung lawn ai.

³ Khumi ly ati sai py ny y pui nai awm iy, khumi kalen amlawn baly, amy ai atapawp amang atyhtyh nai teu.

⁴ Na i py khumi leaung leaungrei amy i atiti sa nai bawibawi acham sy, huni bo y ly khumi takhra i molam ny y naimy amymy i molam y harei amlyh ai naira nga ai.

⁵ Khumi leaung leaungrei ly amymy i myn pho bawibawi ai nai tla.

Myn laji alawm u

⁶ Naibaly leu amtiu ai nga nai keungchi ly atiti kahawi bawibawi patiu nai keung teng y pei u vawitheung teang sy.

⁷ Tapawp naira y awm u moh; Tameuh ai ly khen nau ai nai vuilam ny y leang; ami my hei nai ngierei ly huni ly bebe pakym ali teang ai.

⁸ Amymy i tlang mang y hei nai keung ly tlang i veaung naira pakym ai i, Phailo mang y hei nai keung ly Phailo mang i deungtasarei hengra pakym ai.

⁹ Hunaibaly atiti kahawi sa ai nai palei u reng moh sina; achi ly apatlaw jo y baly neng khyp nai khala y ly pakym ai.

¹⁰ Hunaibaly achi i avo nai neng tleirei ly khumi bawibawichi i tlang tleaung y atiti kahawi so u sina, naibaly ym nai dengtheungchi i tlang tleaung y so u patyp keh sina.

Kangkhym i leu pei nai hawi kawn nai leu

¹¹ Kaimy i kiu kypkyp y cha mawih kalen pui pui tlai katajiu nai ly khen u.

¹² Angam mang i tlang y atiti khen nai ka-pu asa ai ngai nai ngiereichi my ly nangchi ai lengkhym takip hai akhikan reng nai ne; atiti takhra ny y leang, nichi ly Krista i kraws deaungkho y ana naira patang u y ai nai sa nai harei khyh.

¹³ Ati mana nai mo nabaly lengkhym takip naichi malawn py Reita patawm u lawh y leang, nangchi i tlang y amlyh naira nga u thai ai nai nangchi ai lengkhym takip hai ai nai ngai u atyhtyh nai teu.

¹⁴ Na i py kai naini achi i Areng Isu Krista i kraws ai ny y baly kai i amlyh ai naira awm moh sy, huni i saho y ly khaileaung pri ly kai i vui tahen nai awm bo, kai py khaileaung pri i vui y tahen nai kaawm teang nai ne.

¹⁵ Kangtha sa vui nai ny y baly, lengkhym takip nai py, takip y nai py ati sai py ny y leang.

¹⁶ Naibaly huni i reita kamta tako nai ngiereichi hawi Tameuh i Israelachi i tlang tleaung y py awmnem naira hawi pahen naira py awm sy.

¹⁷ Vai i dengdairei ly ami py kai ai khrukhra hai reng moh sy; kai i tlang tleaung y ly Isu i ka-ma-rachi ka-pu nai bo.

¹⁸ Amjo amnauchi awi, Areng Isu Krista i pahenra ly nangchi i phailo teng y awm sy. Amen.