KALATIA 4 - Khumi Common Language Bible

¹ Na i py kai ly hinai kana nai ne; Yhmtheaung amtym ai nai keung ly ati cheaungkhangchi i tlang tleaung y lu ne i py, deaungdi nai khala y ly miseaung hawi ati sai py takhra lawh y leang;

² ampo my pasym pi rym nai neng tym y ryrei ly mymy ly typ nai keung hawi kry nai keungchi i anui y awm lawh nai ne.

³ Hunai kamta ly achi py deungdi khala y ly khaileaung pri i pakeungchi i anui i miseaung y awm.

⁴ Na i py neng angym khyp khala y ly achi ly chanau lawn ai naira nga thai ai nai,

⁵ Reita i anui y awm naichi ai ly atleu ai nai, Tameuh my mymy i Chapo ai, neampachy my tapen nai, Reita i anui y tapen iy pato bo.

⁶ Naibaly nangchi ly chanau ne u nai deaungkho y Tameuh my mymy i Chapo i Phailo ai ly Abba, Ngaai, nanai aeu naimy achi i paleung y ang pato bo.

⁷ Hunaibaly nang ly vai i dengdairei ly miseaung ny y leang bo, chanau ne; naibaly nang ly chanau ne baly Tameuh i saho y nang ly yhmtheaung amtym ai nai keung ne.

Kalatia palau takhrachi i vui Pawla paleung mawn nai

⁸ Na i py nangchi ly huni neng khala y Tameuh ai pany u y nai thym khala y, nangchi ly nichi i awm nai sai y py tameuh ny y pui naichi i miseaung lawn u bo.

⁹ Na i py vai ly nangchi ly Tameuh ai pany u nai bo y ly--ny y leang, Tameuh my nangchi ai pany nai bo y ly--nangchi ly ham y nai hawi awm atyhtyh nai pakeungchi i miseaung y awm u bi ai nai ngai u nai ly, hunichi mang y ly nangchi ly ati mana nai ali u teang nai mo?

¹⁰ Nangchi ly kanichi py, lochi py, nengchi py, sanengchi py ja u reng.

¹¹ Kai ly nangchi i vui jawm my atho kasum lawh na mo, nanai kajei.

¹² Amjo amnauchi awi, kaimy ka-tawm awm ai nai kang takeng, kai py nangmychi ka-tawm awm. Nangchi ly kai i tlang tleaung y hawi y nai ati sai py so u y leang.

¹³ Na i py nangchi teng y Satang Kahawi kang thui pi angchei kha i nai ly, kai i tlang ham y nai deaungkho y ne, nanai nangchi pany.

¹⁴ Naibaly kai i tlang y nangchi i vui parawi naira awm nai ly nangchi ly tahm py panem u y, paso py paso u y; na i py nangchi ly kai ai Tameuh i kani pri i amtaw thau nai kamta hawi, Krista Isu ai kamta tanrei kawn u lawh nai ly.

¹⁵ Taham awm, na u nai ly ma mang y awm veng mo? Sa thai iy khyly nangchi i mei ly takhawi u piu vui iy kai ai pei u ai bo, nanai kang pany hai chy bo.

¹⁶ Hunaibaly kaimy leu meitang khyp kang thui pi nai deaungkho y nangchi i paleung ka-e ne lawh a?

¹⁷ Nichi ly hawi ai naira mang y ny y pui naimy nangchi ai hawihai palai hau lawh; ne, nangchi ly mymychi ai hau u thai ai nai nichi ly nangchi ai angam mang y ang kho hai tawp ai ngai nai ne.

¹⁸ Na i py kai nangchi teng y awm nai khala y khyh ny y naimy, hawi naira mang y ly mana khala py hawihai palai ang hau naimy awm jojo ai nai hawi chy bo.

¹⁹ Bechi awi, Krista ly nangchi theung y angpa be y ryrei ly deaungdi tapen ai achai nai kajeu kano bi nai bo he.

²⁰ Ne, vai dymkhawn ly nangchi teng y awm iy, kai i raawi takhra hai ai nai kangai; nangchi i molam y ly kai ly dawn pajau y.

Hakari hawi Chara nini ai pata nai

²¹ Reita i anui y awm ai ngai naichi awi, nangchi ly Reita i leu tangai u reng y a?

²² Hina nai tajiu nai ne: Abraham ly chapo leaung nyhrei sa i, leaungrei nai ly miseaung nu i tapen nai, leaungrei nai ly miseaung nu ny y nai i tapen nai ne.

²³ Na i py miseaung nu i tapen nai ly tlang i reita kamta tapen nai, miseaung nu ny y nai i tapen nai ly leu adeu nai deaungkho y tapen nai ne, nanai he.

²⁴ Huni leu ly pata naira ne; hunini ly leu maikawm nyhrei nai ne; leaungrei nai ly Sinai Mawi i nai, miseaung lawn ai nai tapen nai keung ly; huni ly Hakari ne.

²⁵ Naibaly hini Hakari ly Arabi pri i Sinai Mawi ne i, vai dymkhawn i Jerusalem awm nai hawi vanrei ne: mymy hawi mymy i chanauchi py miseaung y awm lawh veng.

²⁶ Na i py salo mang i Jerusalem naini miseaung ny y i, huni kypkyp ly achi i amhm ne.

²⁷ “Teng iy chanau tapen vai y nai awi, amo theu, Chanau tapen nai no vai y nai awi, aeu; Juvo awm nai tleaung y ly savai tlang nai neampachy ly chanauchi nawi keh lawh,” nanai tajiu nai ne chy bo.

²⁸ Hunaibaly amjo amnauchi awi, achi ly Isaka kamta ly leu adeu naira i chanauchi ne.

²⁹ Na i py hunai thym khala y ly tlang i reita y tapen nai ly Phailo i reita y tapen nai ai ly ana nai kamta, vai py hunai kamta ne teang.

³⁰ Na i py Tameuh i cha-iu ly mana thui mo? Miseaung nu ai ly mymy i chapo hawi raurei patheu; miseaung nu i chapo ly miseaung nu ny y nai i chapo ai ly yhmtheaung amthym hai y ai, napi.

³¹ Hunaibaly amjo amnauchi awi, achi ly miseaung nu i chanauchi ny y leang, miseaung nu ny y nai i chanauchi teu.