KALATIA 3 - Khumi Common Language Bible

Reita leu pei nai a, ym nai a?

¹ Aw Kalatia pri i cheng y nai khumichi awi, nangchi ai ly ami my ang dawi mo? Krista Isu ai tahen nai ly nangchi i mei ka-niu y my chai pyn pa-rei amteng hai chy bo.

² Hini harei nangchi teng i dengdairei pany ai nai kangai; nangchi ly Phailo nga u nai ly Reita i atitichi sa nai deaungkho y a, thai iy ym nai deaungkho y a?

³ Nangchi ly hina tanrei pathu u a? Phailo y amteaung u chum veng nai iy, tlang y angym u pajau ai a?

⁴ Nangchi ly huna tanrei atiti patang u rumrang a? (Patang rumrang tatang nai ne i khyly.)

⁵ Naibaly nangchi teng y Phailo ang pei nai keung hawi nangchi theung y atiti rengrang sa nai keung ly, Reita i atitichi i sa nai deaunkho y sa nai a, ym nai deaungkho y tangai naira y sa nai a?

⁶ Hunai kamta Abraham ly Tameuh ai ym i, huni ym naira ly mymy i tlang tleaung y hawi naira y palawn bo.

⁷ Hunaibaly pany u, ym naira y awm naichi ly, hunichi kypkyp ly Abraham i chanauchi ne.

⁸ Naibaly Tameuh i cha-iu ly Tameuh ly ym naira deaungkho y Cheng Takhrachi ai ly eaung hai ai, nanai pany hai rym i, “Nangmy y ly cheng cheaungkhangchi ly amtheaung hai naira nga ai,” nanai Abraham teng y Satang Kahawi thui pi yb bo.

⁹ Hunaibaly ym naira y awm naichi ly ka-ym awm nai Abraham hawi amtheaung hai naira y ly awm teang nai ne.

¹⁰ Reita i atitichi sa naira y awm naichi ly amsawi lawi nai anui y awm u lawh veng; “Reita cha-iu y bawibawi tajiu nai kamta sa ai nai awm jo y nai ngierei ly amsawi lawi reng,” nanai tajiu nai ne.

¹¹ Naibaly ami py Tameuh i mei ka-niu y ly Reita deaungkho y eaung naira ngo y leang, nanai amteng angchi yb nai ne. Ati mana nai mo nabaly, “khumi kahawi ly ym naira y heng ai,’ nanai ne.

¹² Reita ly ym naira i nai ny y leang, na i py, “Hunai kamta sa nai keung ly hunira y ly heng ai,” nanai ne.”

¹³ Hunaibaly Abraham ai amtheaung hai naira ly Krista Isu y ly Cheng Takhrachi i tlang tleaung y awm thai ai nai, Krista ly achi i jeng y amsawi lawi nai ne i, Reita i pasawi naira i dengdairei achi ai atleu bo;

¹⁴ (ati mana nai mo nabaly, “Dengkeaung y dang nai ngierei ly amsawi lawi nai ne,” nanai tajiu nai ne:) hunaibaly achi ly ym naira deaungkho y adeu nai Phailo ly nga pajau ai.

Reita leu pei nai hawi adeu nai

¹⁵ Amjo amnauchi awi, khumi kamta kathui nai ne; khumi i leu maikawm py ne sy, khaw hai chum nai bo y ly taprei vai y, tabi py tabi panawi vai y leang.

¹⁶ Naibaly Abraham teng y hawi, mymy i kangpreangchi teng y py atiti leu adeu hai nai ne. Khumi neangneangchi i molam leu thui nai kamta, “Kangprengchi teng y py,” tapi y; na i py leaungrei molam leu thui nai kamta, “Nang i kangpreang teng y py,” napi nai ne lawh veng; huni ly Krista ne.

¹⁷ Naibaly hina nai kathui nai ne. Leu maikawm Tameuh i khaw hai chum nai ly, Reita saneng chungvai palyh pangngo saneng phairei nai bo y tym nai ly huni leu adeu nai ai ly ati sai py so hai y naimy tamo hai y leang.

¹⁸ Amtym ai nai ly Reita deaungkho y ne baly, leu adeu nai deaungkho y ny y leang bo; na i py leu adeu nai deaungkho y Tameuh my Abraham teng y pei nai ne.

¹⁹ Naibaly Reita ly ati mana nai y awm nai mo? Adeu nai nga ai nai kangpreang tym y ryrei ly taphra nairachi deaungkho y tabi panawi bo, naibaly kani pri i amtaw thau naichi ai teaung iy savai i kiu y chih nai ne.

²⁰ Naibaly savai nanai ly khumi leaungrei i khyh ne vai y leang; Tameuh naini harei khyh.

Reita leu pei nai hawi patyp nai

²¹ Naibaly Reita ly Tameuh i leu adeu naichi ai ly paka nai sai a? Ny y leang; Reita y ang paheng thai nai ly ang pei chum makho baly, hawi naira ly Reita deaungkho y awm takengkei ai nai tla.

²² Na i py Isu Krista ai ym nai deaungkho y atiti adeu nai ly mymy ai ym nai keungchi teng y pei nai lawn thai ai nai, Tameuh i cha-iu ly kamngo i anui y ati cheaungkhang bebe kho hai veng.

²³ Na i py ym naira tym y rai khala y, ym naira amteng ai nai vui ly kho hai iy, Reita i anui y achi ai ang typ nai ne chy bo.

²⁴ Hunaibaly achi ly ym nai deaungkho y eaung naira nga thai ai nai, Reita ly achi ai Krista teng y ang pahawi nai ne.

²⁵ Na i py vai ly ym naira tym nai bo y ly, achi ly pahawi nai keung i anui y awm y leang bo.

²⁶ Nangchi ly Krista Isu ai ym u nai deaungkho y Tameuh i chanau lawn u be bo;

²⁷ nangchi theung y Krista y baptisma nga nai ngiereichi ly Krista ai amthyp u bo.

²⁸ Hunai ra y ly Juda khumi py Krik khumi py awm thai y leang, hunaira y ly miseaung py miseaung ny y nai py awm thai y leang, hunaira y ly neampachy py neampacho py awm thai y leang;

²⁹ Krista y ly nangchi bawibawi bomrei lawn u bo. Naibaly nangchi ly Krista i ne u baly, nangchi ly Abraham i kangpreang, leu adeu nai kamta amtym ai nai keungchi ne u bo.