KALATIA 2 - Khumi Common Language Bible

Pawla hawi takhra amtaw thauchi

¹ Naibaly saneng holai palyhrei nai bo y ly Tita ai py hawi iy Barnaba hawi vanrei Jerusalem avang y kachei bi bo.

² Naibaly amteng hai naira deaungkho y kachei i, Cheng Takhrachi theung y Satang Kahawi ka-eu hai reng nai ly mymychi ai kathuipi; na i py khumi kalenchi ai ly mymychi my tlairei kathuipi takhra bo, ti y baly vai i nai py jangni i py jawm my kangpreang atyhtyh nai ne lawh na.

³ Na i py kai teng y awm nai Tita py Krik khumi ne teu i py lengkhym takip pi tanga y leang;

⁴ huni ly tapawp nai amjo amnauchi ai kangviu y kun hai nai deaungkho y teu; hunichi ly kaichi ai miseaung ang palawn u thai ai nai kaichi i Krista Isu y tlamsa naira nga nai ly khen paryp ai nai kangviu y kun u bo.

⁵ Na i py Satang Kahawi leu meitang ly nangchi teng y awm jojo thai ai nai, kaichi ly tanarei chy py aau iy nichi i leu patawm y leang.

⁶ Na i py khumi kalen y palawn naichi (mani mo khumi ka-tawn py ne sy, kai i vui y ati sai py ny y leang; Tameuh ly ami ai py patle takhra y), nichi khumi kalen kyh y palawn naichi teng i nai kai ati sai py panawi bi y leang, kang napi.

⁷ Huna nai tleaung y ly Petera ai lengkhym takip naichi teng y Satang Kahawi thui pi ai nai au nai kamta ly, lengkhym takip y naichi teng y Satang Kahawi thui pi ai nai ly kai teng y au veng bo.

⁸ (Lengkhym takip naichi i amtaw thau nai khumi lawn ai nai Petera i vui sa pi nai keung my ly, Cheng Takhrachi i amtaw thau nai khumi lawn ai nai kai i vui py ang sa pi:)

⁹ naibaly kai ai pahenra ang pei nai ly nichi ly pany u nai khala y, yhm mawm y palawn nai Jakob, Kipha, Johanchi ly, kaini ly Cheng Takhrachi teng y chei ai nai hawi, nichi ly lengkhym takip naichi teng y chei ai nai py Barnaba kaini ai vanrei adawi nai lamtang mang i kiu ang pei u lawh.

¹⁰ Ne mang ly kaini my kamawnchi ai pany jo ai nai harei ngai u khyh i, huni ly kai i sa ai nai tau tatang nai angchi yb nai ne.

Antiokei y Pawla my Petera ai preng nai

¹¹ Na i py Kipha ly Antiokei avang y jeu nai thym khala y ly khri pa-rei padeng ai asa nai deaungkho y kai ly mymy i mo y my kapaka bo.

¹² Ati mana nai mo nabaly khumi amichi mo Jakob teng i dengdairei jeu u y rai khala y, mymy ly Cheng Takhrachi teng y biu cha reng; na i py nichi tym u bo nabaly lengkhym takip naichi ai jei nai deaungkho y mymy ly abawi ali y i awm takhra veng bo.

¹³ Juda takhrachi my py tapawp naira y abawi u lengleang veng, hunaibaly Barnaba malawn py nichi i tapawp naira y abang teng vi na veng.

¹⁴ Na i py nichi ly Satang Kahawi leu meitang kamta hawihai palai awm u y nanai kapany i, Kipha teng y nichi bawibawi i mo y, “Nang ly Juda khumi ne baly Judachi i awm nai kamta awm y naimy nang ly Cheng Takhrachi i awm nai kamta awm lawh nai ly, ati mana nai y Cheng Takhrachi ai ly Judachi i awm nai kamta nang ly awm hai akhikan lawh mo?” kanapi.

Judachi hawi cheng takhrachi ym nai y atleura nga nai

¹⁵ Achi ly Cheng Takhra khumi kamngochi kamta ny y i, achi ly Juda khumi y tapen angchi yb nai ne;

¹⁶ na i py Reita i atitichi sa nai deaungkho y ami my eaung naira ngo y leang, Isu Krista ai ym nai deaungkho y harei nga khyh, nanai achi py Reita i atitichi sa nai deaungkho y ny y i, Krista ai ym nai deaungkho y eaung naira nga thai ai nai, achi ly Krista Isu ai ym nai ne; khumi nanai ly Reita i atitichi sa nai deaungkho y eaung naira ha py ngo y leang.

¹⁷ Na i py achi ly Krista y eaung naira nga naira y awm ai tau nai tarawi y achi kypkyp py khumi kamngo ne vui lawh baly, Krista ly khumi kamngo i kalop sa nai keung ne lawh a? Ny y leang.

¹⁸ Kai i atiti aphrei naichi ly kai kasa ali teang lawh baly, kai ly Reita taphra nai keung ne, nanai kapany hai nai ne.

¹⁹ Kai ly Tameuh mang y kaheng thai ai nai Reita deaungkho y Reita y kadei chum veng bo.

²⁰ Kai ly Krista teng y tahen nai awm bo; na i py kai ly heng nai ne; na i py kai ly ny y leang bo, Krista kaimy y heng nai ne; naibaly vai kai i tlang heng nai ly ym naira y kaheng nai ne, Tameuh i Chapo my kai ai ang tamen nai kai i jeng y apei nai keung ai ym naira y.

²¹ Tameuh i pahenra ly kataphra y leang, Reita deaungkho y hawi naira awm lawn baly, Krista ly jawm dei atyhtyh nai tla bo.