JUDA 1 - Khumi Common Language Bible

¹ Juda, Isu Krista i miseaung hawi Jakob i amnau ly, Ampo Tameuh my tamen nai hawi, Isu Krista i vui y khai pi rym nai palau naichi teng y ly:

² Pahen naira hawi, awmnem naira hawi, tamen naira py nangchi teng y peung dudu sy.

Tapawp nai amochi

³ Ngai parai naichi awi, achi ai paheng ahum nai satang ly nangchi teng y tajiu ai katau tanga nai thym khala y, khumi kachaichi teng y tlenrei au nai ym naira mang y atho sa patyp ai nai, nangchi ai pachei ai nai cha kang tajiu hai ai nai aly aeang, nanai kapany bo.

⁴ Ati mana nai mo nabaly khumi amichi mo ly kangviu y kun lawh i, nichi ai ly hini sum naira nga hai ai nai jangni y khai rym naichi ne; nichi ly Tameuh ai tahm khai y i, achi i Tameuh i pahenra ai ly paleaung naira palawn u iy, achi ai Peang nai Keung hawi Areng leaungrei awm khyh nai Isu Krista ai ly apha u vui.

⁵ Naibaly nangchi ly tlenrei ati cheaungkhang pany be teu i py, Areng my ly Aikupta pri i dengdairei khumichi ai lawi hai iy, huni bo y ym y naichi ai ly ang tama hai, nanai pany hai vau ai nai kang ngai hai.

⁶ Naibaly kani pri i amtaw thau naichi, mychi i awm angchi nai sai kamta awm jo y naimy, mymychi i awm reng nai meingtym khai su naichi ai ly huni kani aly len parai nai i tara chih naira i vui y kaveng anui y deungrasarei kawm naimy ang khai nai bo.

⁷ Sodom hawi Komora hawi, huni ahawi tengtang avang py hunai kamta khyp angai naira y bom verei apei nai, tlang takhra y hui teang nai deaungkho y deungtasarei mai pajeng naira nga jojo naimy amtiu ai naira kamta lawn u bo.

⁸ Na i py hunichi py huna nai kamta mymychi i amang mang y tlang chai hai y i, aly peang naira tahm khai y iy, nang parai nai keungchi ai thui tamawn lawh.

⁹ Na i py Mikaila, kani pri i amtaw thau nai salo keh i nai my ly Mosi i veu molam y aei hawi nai thym khala y diabola ai chih pi nai thui tamawn vam y naimy, “Areng my nang ai jo sei sy,” napi alam.

¹⁰ Na i py huni khumichi ly mymychi i pany y nai ngierei ai thui tamawn reng, naibaly dawn pasym naira by y nai mawichi kamta nichi i tlang mang y asa naira y pany naichi khypkhyp deaungkho y phra u nai ne.

¹¹ Nichi ly taham si! Mymychi ly Kaina i lam y tako i, vang nga ai nai Balam i tamang naira y angpreng lengleang naimy, korah i aei naira y ly tama nai bo.

¹² Hunichi ly nangchi hawi vanrei atamen nai pawi cha u nai thym khala y ly amtengru nai lengseaungchi ne: jei y naimy apacho nai beram typ nai keungchi ne:tui by y nai khupanym ai ali my hm naichi ne: athai by y nai ngam aau nai thengthai, tleng nyhrei dei nai, tangjyn khrairei akyn rau naichi ne:

¹³ pangli tui sampyh thi nai, mymychi i kaji ai nai satang ly phawn achen naichi ne: ajau nai ka-si, hunichi i vui ly deungtasarei kaveng thokha nai pateung nai ne.

¹⁴ Naibaly Adam i dengdairei kangthau saryhrei nai Enoka ly hunichi teng y py leu thui yb i, “Khen cham, khumi bawibawichi ai tara chih ai nai hawi,

¹⁵ Tameuh ai tahm khai y nai bawibawichi i tahm khai y nai sala y Tameuh ai dawndan y nai sa naira bawibawi lam y hawi, Tameuh ai tahm khai y nai kamngo sa nai keungchi i mymy i tlang tleaung y leu kasi thui nai bawibawi lam y py pasum ai nai, Areng my ly mymy i tep rep ma pany y nai khumi kachaichi hawi ang jeu nai bo,” napi.

¹⁶ Hunichi ly athui apreaung naichi, cheh nai keungchi ne, mymychi i ngai phi teng y nai kamta khyp naimy tako nai ne; nichi i labeaung py am-e parai nai leu kawi bo, atiti kamran cha ai nai khumichi ai patle takhra naichi ne.

Pany hai nai hawi leu taviu naichi

¹⁷ Na i py ngai parai naichi awi, nangchi ly achi i Areng Isu Krista i amtaw thau naichi i jangni y leu thui nai ly pany u jo ba.

¹⁸ Mymychi ly nangchi teng y, “Kani kangkhym y ly panui hai nai keungchi ly mymychi i Tameuh ai tahm khai y nai ngai phi teng y nai kamta tako nai awm u ai,” napi.

¹⁹ Hunichi ly akhawi hai takhra naichi ne, tlang mang y asa nai, Phailo by y naichi ne.

²⁰ Na i py ngai parai naichi awi, nangchi ly nangchi i ym naira chai parai nai ai akhaw hai iy

²¹ Phailo Kachai y chiu sa naimy deungtasarei hengra nga ai nai pa-rei achi i Areng Isu Krista i pahen naira ajeng nai tarawi y Tameuh i tamen naira y akry u.

²² Ym thai y nai phyreichi ai pahen u; phyreichi ai mai theung i nai atheu praw naimy paheng u;

²³ tlang kakhawi akau nai ateaung mang y amso awm nai py niu ngai y naimy, jei nai tarawi y phyreichi ai pahen u.

Palo nai hawi chiu sa nai

²⁴ Hunaibaly atlym y ai nai pa-rei nangchi ai ang typ thai ai nai hawi, ni i nang parai naira mo y khrikhri pa-rei amo theu hai iy, chai y naira akau y naimy ang tym hai nai keung, achi ai Paheng nai keung Tameuh leaungrei awm khyh nai teng y ly,

²⁵ Isu Krista achi i Areng deaungkho y neng den py by y rai khala y py, vai py deungtasa khrarei py palo naira hawi, nang parai naira hawi, peang naira hawi, sa thai naira py awm sy. Amen.