JOSUA 16 - Khumi Common Language Bible

Ephraim theaung hawi Manase theaungchi ai khu ka-peang phy pi nai

¹ Josepha i kangpreang cheng theaungchi teng y, phy pi nai khu ka-peang tokalawi mang khujyh ly Jeriko mary sahawi i Jeriko tuikho, nisi Jordan tavo dengdairei amteaung iy, daichi ka-vym katlen baly, mawi aheung ra i Bethela mary y tym.

² Huni bo y Bethela mary dengdairei Luza mary y py, hu i dengdairei Ahkhi chengchi awm nai Ataroth Adar mary y py tym.

³ Huni bo y nidym mang Japhaleti chengchi awm nai, tlawi Beth Horon meingtym y tym. Hu i nai bi baly Keza mary takoleu iy, Mrithe pangli ra y tem nai ne.

⁴ Josepha i kangpreangchi napi nai, Ephraim theaung hawi nidym mang i Manase theaungchi ly mychi i vui hini khu ka-peang amtym u bo.

Ephraim

⁵ Ephraim theaung yhm dengtheungchi i vui phy pi nai khu ka-peang khujyh ly anui mang ichi ne. Nisi mang khujyh ly Atarothada mary dengdairei amteaung iy, nisi mang i tleng Beth Horon mary ai takoleu i,

⁶ Mrithe pangli mang y tym. Tosyh mang y Meimetha mary awm. Huni meingtym nisi mang i khujyh ly Taanach Shiloh mary mang y amhi iy, mary nisi mang y takoleu baly Janoah mary mang y tym nai ne.

⁷ Hunaibaly Jonoah mary dengdairei, Ataroth mary hawi Naarah marychi mang y satla kathiu baly, Jeriko mary y tym iy Jordan tavo y patem nai ne.

⁸ Huni bo i khujyh ly Tapuah mary i dengdairei, nidym mang i Kanah micheaung mang y tym iy, Mrithe pangli y tem. Hini khujyh ly Ephraim theaung yhm dengtheungchi i vui amtym ai pei nai ne.

⁹ Huni bo y Manase i khu ka-peang theung i, mary katheang kalen phyreichi ai py amtym u.

¹⁰ Na i py nichi ly Keza mary y awm nai Kanan chengchi ai patheu pawn y naimy, mychi teng y miseaung palawn iy awm hai bo.