JOSUA 13 - Khumi Common Language Bible

Peang vui ai awm rai nai khu ka-peangchi

¹ Josua ly miteaung cheng bo. Areng my Josua teng y, “Nang ly saneng len i miteaung cheng dudu bo. Peang vui ai nai khu ka-peangchi neangneang awm asai rai.

² Philistia pri verei, Kesuri khu verei hawi,

³ tokalawi mang y awm nai Avim chengchi i peang nai khu verei ai, peang vui ai nai awm rai nai ne. (Aikupta pri khujyh theung y awm nai Shihor micheaung dengdairei, tosyh mang Ekron khujyh tym pa-rei kau nai khu ka-peang ly Kanan chengchi awm nai khu ka-peang ne. Philistia samrangchi ly kaza mary, Arzu mary, Esakalon mary, Kath mary hawi Ekron marychira y peang nai ne.)

⁴ Zidon chengchi i khu ka-peang Mearah dengdairei, Arphet mary hawi Amori chengchi i khujyh tym pa-rei awm nai Kanan chengchi i khu verei,

⁵ Kebala chengchi i pri, Heramon mawi tokalawi mang y awm nai Balakat mary dengdai Hamath mawi aleaung ryrei, nisi mang y awm nai Lebanon pri bawibawichi ai peang ai nai awm asai rai nai ne.

⁶ Peang vui ai nai awm rai nai khu ka-peangchi ly Lebanon mawi hawi Misrepho Main mary sala, mawi aheung meingtym y awm nai Sidon chengchi i khu ka-peang bawibawi py abawi nai ne. Israela chengchi ly hini prichi ai peang vui ai nai amsa u nai khala, nichi bawibawi ai kaimy paryh vui ai. Kai ly nang ai leu kang pei nai kamta, Israela chengchi i vui khu ka-peang bawibawi ai phy paji pi ai nai tla.

⁷ Hunai deaungkho y vai, nang ly Israela cheng theaung takawreichi hawi Manase theaung ka-hyhreichi teng y, hini khu ka-peangchi amtym ai nai phy paji pi,” nanai leu pei bo.

Jordan tavo nisi mang khu ka-peang phy paji pi nai

⁸ Ruben, Kad hawi Manase theaung ka-hyhreichi ly Jordan tavo nisi mang y awm nai khu ka-peang ai, Areng i miseaung Mosi my phy paji pi nai kamta, nga u chum nai ne.

⁹ Nichi i nga nai khu ka-peang ly (Arnon tavo leaunghawi kachawnra awm nai) Arraw mary hawi tavo leaunghawi sala y awm nai mary tym pa-rei kau iy, Medeba mary hawi Dibon mary sala y awm nai mawi aheung verei abawi nai ne.

¹⁰ Huni khu ka-peang Hesabon mary y peang nai Amori samrang Sihon i anui y awm nai mary bawibawichi abawi i, Ammon pri khujyh ryrei kau.

¹¹ Kilead khu, Kesuri khu, Maaka khu, Heramon mawi verei hawi, Salekah pri tym pa-rei kau nai Basen pri vereichi py,

¹² Asataroth mary hawi Edrei marychi peang iy, Riphaiah chengchi i kangkhym amtym nai Oka samrang i pri py abawi. Mosi ly hini samrang leaungnyhrei ai padei vui iy, nichi i prichi peang vui bo.

¹³ Na i py Israela chengchi ly Kisuri cheng hawi Maaka chengchi ai patheu y nai deaungkho y, vaini khrairei Israela pri y awm u nai ne.

¹⁴ Mosi ly Levi theaungchi ai khu ka-peang paji pi y. Areng my Mosi teng y leu pei nai kamta, nichi ly Israela chengchi i Areng Tameuh teng y maicham tleaung y mai hawi leng patlum naira i phy nga u nai ne.

Ruben theaungchi ai phy pi nai khu ka-peang

¹⁵ Mosi ly Ruben theaung yhm dengtheungchi teng y khu ka-peang phy pi nai ne.

¹⁶ Nichi i khu ka-peang ly (Arnon tavo leaunghawira awm nai) Arraw mary hawi tavo leaunghawi tleaung mang y awm nai marychi ryrei kau iy, Medeba mary tengpang sahawi y awm nai mawi ka-sang verei abawi nai ne.

¹⁷ Hesabon mary hawi mawi ka-sang salo y awm nai marychi napi nai Dibon mary, Bamoth Bala mary, Beth Balameon mary,

¹⁸ Jahaz mary, Kedumuth mary, Mepha mary,

¹⁹ Kiriathaim mary, Chibama mary, leaunghawi mawi aheung salo y awm nai Zereth-shaha mary,

²⁰ Bethpekura mary, Pisaka mawi aheung hawi Bethjisimon marychi abawi nai ne.

²¹ Mawi ka-sang salo y awm nai mary bawibawichi hawi, Hesabon mary y peang nai Amori samrang Sihon i pri verei abawi. Mosi ly huni samrang hawi raurei, Midian samrangchi napi nai Avim samrang, Rekem samrang, Zura samrang, Hura samrang hawi Reba samrangchi ai pajau vui nai ne. Huni samrang leaung pangreichi ly Sihon samrang i anui y awm u nai ne,

²² Israela chengchi my padei naichi theung y, Bora i chapo atam sara Balam py abawi nai ne.

²³ Ruben theaungchi i peang nai khu ka-peang, nidym mang khu ka-peang ly Jordan tavo ne. Huni marychi abawi nai khu ka-peang ly Ruben theaung yhm dengtheungchi i vui phy ne.

Kad theaungchi ai phy pi nai khu ka-peang

²⁴ Mosi ly Kad theaung yhm dengtheungchi ai py, khu ka-peang phy pi nai ne.

²⁵ Nichi i khu ka-peang ly Jaza mary hawi Kilead pri y awm nai mary bawibawichi, Rabah mary nisi mang y awm nai Arraw mary tym pa-rei kau nai Ammon pri ka-hyhrei abawi.

²⁶ Nichi i khu ka-peang ly Hesabon mary dengdairei, Ramah Mizpeh mary hawi Betonim mary ryrei py, Mahanaim mary dengdai Lodeba khujyh ryrei py kau.

²⁷ Jordan tavo leaunghawira y sa nai Besarim mary, Benimara mary, Sukkkoth mary, Zaphon marychi hawi, Hesabon samrang Sihon ka-peang theung i awm rai nai khu ka-peangchi abawi nai ne. Nichi i khu ka-peang khujyh ly Jordan tavo jeungrei tosyh mang Kalili ang ryrei ne.

²⁸ Salo mang i marychi abawi nai khu ka-peang ly Kad theaung yhm dengtheungchi i vui phy ne.

Nisi Manase theaungchi ai phy pi nai khu ka-peang

²⁹ Mosi ly Manase theaung ka-hyhrei yhm dengtheungchi teng y py, khu ka-peang phy pi nai ne.

³⁰ Nichi i khu ka-peang ly Maphanim mary ryrei kau iy, Bashan samrang Oka i peang nai pri verei hawi vanrei, Bashan pri theung y awm nai Ja-ira i avang vuitariurei abawi.

³¹ Kilead pri ka-hyhrei hawi, Oka samrang my peang nai Bashan pri i mary puichi napi nai, Asataroth mary hawi Edrei marychi py abawi. Hunichi abawi nai khu ka-peang ly Manase i chapo Makhira i yhm dengtheung ka-hyhreichi i vui phy ne.

³² Mosi ly Moba adym y tym nai thym khala, Jeriko mary hawi Jordan tavo nisi mang y awm nai khu ka-peang ai salo mang i kamta, phy paji pi nai ne.

³³ Mosi ly Levi theaungchi teng y khu ka-peang paji pi y leang. Israela chengchi i Areng Tameuh teng y talam nai katalamra i phy ly nichi nga ai, nanai Mosi my leu pei pi yb veng bo.