JONA 2 - Khumi Common Language Bible

Jona i chiu sa nai

¹ Naibaly Jona ly ngo kalen pui taku theung i dengdairei, my i Areng Tameuh teng y,

² “Aw Areng, kai ly patang naira avum nai deaungkho y, nang teng y kang kaau bo. Nangmy py thai nai ne. Kai ly dei kho peang i dengdairei nang ai kang kaau nai raawi ly nangmy thai bo.

³ Nang ly kai ai thiu parai nai pangli theung y py, pangli paichi y tym pa-rei py, aphi vui nai deaungkho kai ly pangli tui my takimeuh nai avum iy, nang i tui sampyh puichi ly kai ai um meuh na bo.

⁴ Nang i mei ka-niu i nai kai ai patheu vui nai deaungkho y, nang i Achura yhm kachai ai, mana khala py niu ai ny y leang bo, nanai dawn.

⁵ Tui ly kai ai takimeuh nai deaungkho y, kai ly taho thai y na bo. Pangli tui ly kai ai um iy, pangli acha keungchi my py, kai i lu y pi na bo.

⁶ Kai ly mawichi kheutang y tym pa-rei py, vawi lam by y nai tavau pri mang y py, anum vui bo. Na i py, aw kai i Areng Tameuh, nang ly kai ai thiu paraira i dengdairei atleu bo.

⁷ Kai ly dei enten nai neng khala, aw Areng, kai ly nang teng y chiu kang sa. Nang py nangmy i Achura yhm kachai mang my, kai i chiu sa nai raawi tangai pi kyh ba.

⁸ Ati sai py ny y nai mynchi y chiu nai khumichi ly nang i tlang tleaung y ka-ym by y naichi ne.

⁹ Na i py kai ly nang i nang parai nai ai palo ai; nang teng y apathyp ai. Naibaly kaimy i adeu nai kamta tangai ai. Ati mana nai mo na baly atleu naira ly Areng teng i dengdairei tym nai ne!” nanai chiu sa.

¹⁰ Naibaly Areng my ngo teng y leu pei nai deaungkho y, ngo ly Jona ai kacheng y paleu teang bo.