JOELA 3 - Khumi Common Language Bible

Tameuh my khumi cheng cheaungkhangchi ai tara chih ai nai

¹ Areng my, “Huna nai khala kai ly Juda pri hawi Jerusalem mary y nang chawn hai teang ai.

² Khumi cheng cheaungkhangchi ai angym hai teang iy tara chih nai leaunghawi mang y pahawi ai. Kai i khumichi ai nichi my sa nai molam y huni meingtym y nichi ai, kaimy tara chih ai. Nichi ly Israela chengchi ai, pri takhra mang y ahei hai i, kai i pri Israela ai ahei hai akyhkyh nai ne.

³ Nichi ly langheng y hawi naichi ai ami teng y au ai mo, nanai tambe va u bo. Bimachi ai vang pei ai nai hawi, kreip hang vang pei ai nai molam y deaungdi neampacho, neampachychi ai miseaung y jo u nai ne.

⁴ Turu mary, Sidon mary hawi Philistia pri meingtym tleirei i khumichi awi, nangchi ly kai ai ati sa ai nai atho sa u nai mo? Kai ai vawitheung tha ai nai atho sa u nai a? Huna nai atho sa u lawh baly, kai ly nangchi ai vawitheung tha manme ai!

⁵ Nangchi ly kai i muku, tangka, yhmtheaung katuichi ai, nangmychi i achura yhmchi mang y syn u bo.

⁶ Juda khumichi hawi Jerusalem mary i khumichi ai, mymychi pri i dengdairei palo paraira mang y hawi iy, Krip chengchi teng y jo u nai ne.

⁷ Nichi ai nangchi my jo nai meingtym i dengdairei, kaimy kapahawi ali teang ai. Nichi i tlang tleaung y nangchi my sa nai kamta, nangchi ai vai, kaimy sa teang ai.

⁸ Kai ly nangchi i cho chanauchi ai, Juda khumichi i miseaung ka-jo ka-van lawm hai ai. Juda khumichi py nichi ai palo parai nai Seba khumichi teng y jo vui ai. Hini ly kai, Areng i kang thui pi nai leu ne.

⁹ “Khumi cheng cheaungkhangchi teng y ‘Tavai atiu ai nai angvei u rym; tavaimi risachi ai palau u; tavaimi risachi ai pangym iy tavai thau u, nanai satang thai hai u.

¹⁰ ‘Nangchi ly li thawnra tamochi ai haisau palawn ai nai py, changpi kalei nai akeichi ai tivichi palawn ai nai py thip u. Atho by y naichi malawn py, tavai thau u ai nai tla ai.

¹¹ Tengpang sahawi y awm nai khumi cheng cheaungkhangchi awi, jeu u kaliki iy, leaunghawira y angym u,’ napi. Aw Areng, huni khumichi ai tiu ai nai nang i tavaimi kamkawm ai pato ba.

¹² Areng my, “Khumi cheng bawibawichi ly angveirym iy, tara chih ai nai leaunghawira jeu u ai nai tla ai. Tengpang sahawi i khumi cheng bawibawichi ai tara chih ai nai huni meingtym y kai ateh ai.

¹³ Nichi ly khri pa-rei khumi hawi y naichi ne; choh tyn nai neng khala y chohpui chomaw ai tyn nai kamta, nichi ai py so u. Kreip athaichi hawi kawi nanai athai nip nai angawmra i kreip hangchi lem nanai pa-rei, kreip athaichi ai ati nai kamta, huni khumichi ai ati u,” napi.

¹⁴ Khumi sang neangneangchi ly tara chih nai leaunghawira y awm u bo. Huni leaunghawira y Areng i neng kani ly kra y naimy ang tym ai.

¹⁵ Kanito hawi lo ly veng ai i, ka-si taukichi py angvang ai ny y leang bo.

Tameuh my mymy i khumichi ai amtheaung hai ai nai

¹⁶ Areng ly Zion mawi salo y aeu bo. Jerusalem mary i dengdairei aeu. Khaileaung hawi kani khusang py amchyh u bo. Na i py mymy ly mymy i khumichi ai ama hai ai.

¹⁷ Areng my, “Israela chengchi awi, huna nai khala kai ly nangchi i Areng Tameuh ne, nanai pany u ai. Kai ly kaimy i Zion mawi kachaira y kaawm nai ne. Jerusalem mary ly mary kachai lawm ai. Cheng takhra khumichi ly huni mary ai, mana khala py peang u bi pajau ai ny y.

¹⁸ Huni neng khala mawichi ly kreip akhochi hawi kawi na ai. Mawi aheungchira py sichi tlai nai niu ai. Juda pri verei y tui hawihai palai nga u ai. Tavo micheaung tui ly Areng i Achura yhm mang dengdairei leaung ai i, Akasia leaunghawi ai am-i hai ai.

¹⁹ “Aikupta pri ly khutaha meingtym lawm iy, Edom pri ly phra ai i, khumi angso by y nai meingtym lawm ai. Ati mana nai mo nabaly huni prichi ly Juda pri ai tiu iy, khumi kahawichi ai padei u nai deaungkho y ne.

^20-21 Kai ly tleh naira avum nai khumichi i vui vawitheung tha ai. Khumi kamngochi ai tlamsa naira pei ai ny y. Na i py Juda pri hawi Jerusalem mary ai ly deungtasarei khumichi awm naira lawm hai ai. Kai, Areng my py Zion mawi salo y awm ai,” napi.