JOELA 2 - Khumi Common Language Bible

Areng i tara chih nai neng kani y akhutama kanghu tla nai

¹ Tameuh i nang parai nai mawi napi nai Zion mawi salo y baw eng u; pany hai nai katyn pei u. Juda khumichi awi, kaso tahyn theu u! Areng i neng kani ly kra y naimy tym ai.

² Huni kani ly veng khiu nai kani, veng cheng naimy khupanym kawi nanai kani ne ai. Mawi aheungchi ai khiu nai kaveng kamta, akhutama kanghu pui ly mo mang ang jeu dudu bo. Hina nai kamta ly mana khala py tym vai y; mo mang i neng y py tym vai ai ny y.

³ Akhu-tamachi ly amti amjangchi ai mai kamta cha bo. Khaileaung ly nichi i mo y Eden akho hawi atawm iy, nichi i lawi ly amti amjang by y nai, khutaha meingtym hawi atawm. Nichi teng i dengdairei law tleaung nai amti amjang, nanai by y.

⁴ Akhu-tamachi ly keaungngochi hawi mo-cha atawm iy, tavai keaungngo kamta angpreng rang nai ne.

⁵ Nichi ly mawi aheungchi salo y ampyh u iy tavai keaungngo ka-richi i katyn kamta py, acha kajeichi ai mai my kang nai kamta py, hang u nai ne. Nichi ly tavai atiu ai angveirym nai tavaimi kamkawm pui kamta, amjyn u bo.

⁶ Nichi tym nai khala y khumi bawibawichi ly jei naimy kaso theu u. Khumi lutengchi i meimai y thi by y na bo.

⁷ Akhutama michi ly tavaimi risachi kamta tiu u. Nichi ly risachi kamta mary apaichira y lyn u. Nichi bawibawi ly mo kataw lyn u prei nai ne. Mychi i lam amphri vui y.

⁸ Mychi tengtawi ha harei a-ei nai py by y. Nichi ly amtangra meingtymchi ai akheang prei i py, nichi ai ami py paka pajau y.

⁹ Nichi ly mary mang y angpreng u; nichi ly mary apaichi takan iy, yhmchi salo y lyn chum baly kangviuchi kamta thaibeng pa-khochi mang kun u bo.

¹⁰ Nichi ang jeu nai neng khala, kaleih theu. Kani khusang py amchyh neung na. Kanito hawi lo ly veng na bo i, ka-si taukichi py angvang y bo.

¹¹ Areng ly mymy i tavaimichi ai, kani pajyh nai katyn ka-tawm hawi leu pei nai ne. Mymy i leu pei nai tangai u nai tavaimi risachi ly vuikanai nawi, sa thai naira py awm. Areng i neng kani ly khri pa-rei jei ai hawi na ly! Huni neng kani ai ami katlen vui pajau ai mo?

Uikheih ai nai palau nai

¹² Areng my, “Na i py nangchi ly vaimy uikheih u tatang. Biu hai nai hawi vo tangam naimy, kai teng y vawi u ali teang.

¹³ Nangchi ly nangmychi i ateaungchi sei nai ny y naimy, paleung apanem nai hawimy, nangchi i paleung si nai amteng sy.” Nangmychi i Areng Tameuh teng y vawi u teang ba. Mymy ly tamen nai hawi pahen naira kawi angym nai ne. Mymy ly neaung hawi iy, mymy i adeu nai kamta sa reng. Mymy ly kamngo palawi pi ai nai angveirym yb nai deaungkho y, pajeng ai ny y.

¹⁴ Nangchi i Areng Tameuh ly paleung amtlau tan amtlau lym ai i, nangchi ai amti amjang neangneangchi hawi amtheaung hai ai. Huna nai khala nangchi ly mymy teng y chohpui chomaw hawi, kreip hang katalamrachi talam u pajau ai.

¹⁵ Zion mawi salo y baw eng u; biu hai u ai nai leu pei iy, achupui palau u!

¹⁶ Khumichi ai pangym iy, tahm awm nai achupui angvei u rym. Saneng len nai khumichi ai palau iy, deaungdi katheangchi hawi kanu nei thym naichi ai angym hai u; apom ang vawi nai aju juvochi malawn py, mymychi i yhm takunchi khai su ai nai tla ai.

¹⁷ Maicham hawi Achura yhm katheu pa-kho sala y Areng i kalop sa nai pathyp pi nai keungchi ly vo naimy chiu sa ai; “Aw Areng, nang i khumichi ai pahen pi kyh ba. Cheng takhrachi ly ‘Nichi i Tameuh ly ma y mo?’ nanai thui i, kaichi ai niu ngai y iy panui hai u moh sy,” nanai chiu sa u ai nai tla ai.

Tameuh my pri kahawi palum teang nai

¹⁸ Naibaly Areng ly mymy i pri vui, paleung mawn nai amteng hai iy, mymy i khumichi ai pahen nai ne.

¹⁹ Mymy ly nichi teng y, “Vai, kai ly nangchi teng y chohpui chomaw, kreip hang hawi olive asitui kang pei ai i, nangchi ly paleung tuinem u ai. Takhra chengchi my py, nangchi ai panui hai y leang bo mang.

²⁰ Kai ly tosyh ngan mang jeu nai akhutama kanghuchi tama hai vui ai. Akhu-tama phyreichi ai khutaha meingtym mang y paryh vui ai. Nichi i mo kamtheungchi ai, pangli kadei theung mang y, nithun mang amtleng naichi ai ly mrethe pangli theung mang y tla hai ai. Nichi i nganchi ly veaung iy mui ai. Nangchi tlang tleaung y nichi my sa nai molam y, kai ly nichi ai tamyh ai.

²¹ “Aw li adymchi awi, mawn u moh; na i py kawn u ly amo theu u. Ati mana nai mo nabaly nangchi i vui Areng my sa pi nai ne.

²² Aw daichi mawichi awi, mawn u moh. Sui tlai nairachi ly heng-yh naimy awm nai ne. Dengkeaung keungchi ly athaichi athai; thaidu athaichi hawi kreip athaichi py neangneang awm.

²³ “Aw Zion mary i khumichi awi, amo theu u; nangchi tlang tleaung y nangchi i Areng Tameuh my ang sa pi nai sai molam y amo theu u. Mymy ly nangchi ai kaseih kani angym pa-rei nai hai bo. Kaseih khei nai kani ai py, vaichi khala i kamta nai hai iy, kanipui kamteaung kani ai py, nangchi teng y nai hai bo.

²⁴ Choh atyhra meingtymchi ly chohpui chomawchi hawi kawi meng ai. Thengthai atyhra angawmchi py, kreip hang, olive asituichi hawi lem phraiphreaung na ai.

²⁵ Nangchi i amti amjangchi ai akhutama kanghuchi my cha krai nai sanengchi khala, nangchi i phra nai ai, kaimy kang heung pi teang ai. Nangchi teng y huni akhutama kanghuchi ai, pato nai keung ly kai ne.

²⁶ Vai ly nangchi teicha teinei aleu pa-rei nga u ai i, paleung tienem naimy awm u ai. Nangchi ly nangmychi i vui lyh ai hawi naichi sa pi nai keung, kai, nangchi i Areng Tameuh ai palo u ai. Kai i khumichi ly thui tamawn naira mana khala py avum u bi ai ny y.

²⁷ Aw Israela chengchi awi, kai ly nangchi ai kang awm hai nanai py, kai, Areng ly nangchi i Tameuh ne iy, kai ny y baly Tameuh takhra by y nanai py, huna nai khala y nangchi pany u ai. Kai i khumichi ly mana khala py, thui tamawn nai avum u bi ai ny y.

Areng i neng kani

²⁸ “Naibaly kai ly kaimy i Phailo ai, khumi bawibawichi tlang tleaung y leih pi ai. Nang i cho chanauchi ly kai i leu pei nai ahei hai ai. Saneng len nai khumichi ly amangchi amang u ai i, thawndeang deaungdichi ly paleung mei y niu u ai.

²⁹ Huni neng khala kai ly kaimy i Phailo ai neampacho miseaungchi hawi, neampachy miseaungchi tlang tleaung y tym hai ai.

³⁰ “Kai ly huni neng kani molam y kani khusang mang py, khaileaung salo y py, ka-ma-rachi patei pi ai. Thinai theu nai, mai kadeu, maikhyh theu naichi tym ai.

³¹ Areng i ka-jei awm nai neng kani tym y rai khala, kanito ly veng ai. Lo py thi kamta pasen vui ai.

³² Na i py Areng teng y kasabawmra hnei nai khumi bawibawichi ly atleu naira nga u ai. Areng my leu pei nai kamta, ‘Jerusalem mary y awm nai khumi phyreichi ly deira i nai tleaung u ai; kai i vawi takhra nai khumichi ly dei y naimy awm u jo ai,’ napi.”