JOELA 1 - Khumi Common Language Bible

¹ Hini leu pei nai ly Pethuela i chapo Joela teng y Areng my pei nai leu ne.

Amti amjangchi phra nai molam y khumichi paleung si nai

² Nangchi saneng kalenchi awi, kai i thui nai leu ai hawihai palai tangai u. Juda mipuichi awi, tangai u. Nangchi deung y py, amsi pajochi i deung y py, hini atitichi tym vai a?

³ Hini leaungsaichi ai nangchi i cho chanauchi teng y thui pi u; nichi ly mychi i cho chanauchi teng y thui pi iy, huni cho chanauchi my py, mo mang i deung kangthauchi teng y thui pi ai.

⁴ Akhu-tamachi ly kanghu harei bo y harei, amti amjangchi tleaung y satla. Akhu-tama kanghu harei cha nai bo y, cha kamthum ai ly takhra kanghu hareichi my cha bo.

⁵ Nangchi nei cha ala naichi awi, anglaw ly vo u; nangchi kreip hang nei naichi awi, vo tangam u; kreip hang kangtha sa ai nai kreip athaichi phra be bo.

⁶ Akhu-tama kanghu pui ly achi i pri y khri pa-rei ang tiu bo; nichi ly atho awm iy, kati pajau y na pa-rei nawi; nichi i hochi ly khrangsi i ho kamta chiu parai.

⁷ Nichi ly achi i kreip angjyn keungchi taphra iy, achi i thaidu keungchi ai kei pawn nai ne. Nichi ly changpichi kaleungrau na pa-rei, keung kichi ai be pawn nai ne.

⁸ Nangchi khumichi awi, angam yb nai juvo dei pi veng nai deaungkho y vo tangam nai anglo kamta, vo tangam u.

⁹ Achura Yhm y talam ai nai chohpui chomaw py, kreip hang py, by y leang bo; pathyp pi nai keungchi ly Areng teng y talam ai naichi by y nai deaungkho y, vo tangam u bo.

¹⁰ Khaileaung y ly amti amjang by y bo; ati mana nai mo nabaly chohpui chomaw phra iy, kreip athaichi jei pawn nai y, olive keungchi deirawm veng bo. Naibaly khaileaung ly vo tangam nai ne.

¹¹ Nangchi li, hlau sa naichi awi, paleung si tangam u; ati mana nai mo nabaly chohpui chomaw, chajai hawi amti amjang bawibawichi phra be veng bo. Naibaly nangchi kreip akho yhmkeungchi awi, vo tangam u.

¹² Kreip angjyn keungchi hawi thaidu keungchi ly a-au jawn iy deirawm veng bo. Thengthai keung bawibawichi ly jeirawm iy dei be bo. Khumichi py amo theura by y leang bo.

¹³ Maichamra amsi nai nangchi pathyp pi nai keungchi awi, paisiu kanih akhiu iy vo tangam u! Kai i Tameuh mo y kalop sa nai keungchi awi, Achura yhm theung y kun iy, vumtorei vo tangam u! Nangchi i Tameuh teng y talam ai nai chohpui chomaw hawi, kreip hangchi by y leang bo.

¹⁴ Biu hai ai nai leu pei nai ahei hai ly mipui achu nai pawi harei so u! Nangchi i Areng Tameuh i Achura yhm y Juda mipuichi hawi lu sa naichi ai angym hai chum baly, mymy teng y vo naimy aeu u.

¹⁵ Areng i tara chih ai nai neng kani ly kasa bo. Huni neng khala, ati cheaungkhang sa thai nai keung my, khri pa-rei ka-jeira tym hai ai. Huni kani ly jei ai nai khri pa-rei hawi ai na a!

¹⁶ Kaichi ly kaimychi i amti amjangchi phra naira avum khala, ati sai py so thai y, khen su na bo. Tameuh i Achura yhm theung y py, amo theu naira by y leang bo.

¹⁷ Amti amjang tichi ly khaileaung jengha nai theung y veaung veng bo. Pateung achu ai nai chohpui chomaw by y nai deaungkho y akeu rang nai chohpaichi ly phra pawn nai ne.

¹⁸ Sichi ly sui tlaira by y nai deaungkho y, patang naira avum i, a-u lengleang bo. Beram kanghuchi py, hunai kamta patang teang nai ne.

¹⁹ Sui tlai nairachi hawi dengkeaung keungchi ly mai my kang nai kamta deirawm pawn nai ne. Huna nai y aw Areng, kaichi ly nang teng y vo u nai ne.

²⁰ Tavo micheaungchi kang rawm pawn iy, sui tlai nairachi py mai kang pawn nai deaungkho y, daichi mawichi malawn py, mymy teng y kaau u bo.