JOBA 7 - Khumi Common Language Bible

¹ Khumi ly khaileaung y akawm parai naimy kalop sa ai tla nai ne. Kalop ram sa nai khumi hawi atawm.

² Khumi ly savairu nai ka-khui kadeaung nai miseaung, kalop sa nai vang ajeng nai, lop-pan nai khumi hawi atawm.

³ Kai i vui ly lorei bo y lorei, heng ai nai paleung ka-no maidenreichy py by y. Kai ly vum tleitleirei, paleung bi paleung mawn naimy kaawm bo.

⁴ Ira tleaung y aseaung nai khala py neng ly kheih lei y i, vumtorei amkhiu lawh amthai lawh iy, khutawi ai nai ajeng naimy kaawm bo.

⁵ Kai i ngan tlang ly angvawichi, kaleungchi hawi kawi na bo. Kai i angvawichi ly naih leaungsup na bo.

⁶ Kai i neng kanichi ly athang khai naira by y naimy kheih veng bo. Kalang tengkaleng tleaung y malawn py, neng kheih nai rang keh.

⁷ Aw Tameuh, kai i heng nai ly taho kathiu taho kalau nai ryrei khyh, nanai pany pi ba. Kai ly mo mang y amo theu bi ai nai ny y leang bo.

⁸ Nang ly kai ai vai, niu teu i py mo mang y mana khala py, niu ali bi ai ny y leang bo. Nang ly kai ai hau teu i py, kai kaawm ai ny y leang bo.

^9-10 Aheang pawn vui nai khupanym kamta, khumi ly dei nai bo y, mana khala py tym ali bi ai ny y leang bo. Ni hawi ama naichi py, ni ai tami u pawn ai bo.

¹¹ Kai ly awm pypy thai y! Kado theu, paleung no-ei naimy awm nai deaungkho y, kang thui pi keng nai ne.

¹² Nang ly ati mana nai y kai ai, tamcheaung hawi khai lawh mo? Kai ai pangli naka palawn lawh a?

¹³ Kai ly aseaung iy ka-kawm pry ai nai atho kasa. Amy i no patang nai sai, hawira nga ai nai kahau bo.

¹⁴ Na i py nang ly kai ai ka-jei hawi parai nai amang kasichi hawi, mo mang y ka-jei awm naichi amang hai bo.

¹⁵ Kai ly vai i kamta tlang heng naimy awm ai nai tleaung y ly kaneaung taau iy, dei ai nai kadeaung nai pa-rei, amang kasichi amang hai bo.

¹⁶ Kai ly kamjau kang pei mang; heng nai py kapaleih na bo. Kai i tlang tleaung y ngai nai kamta, lyra lawm hai ba. kai i heng nai py atyhtyh teu bo.

¹⁷ Khumi ly ati mana nai khumi ne iy, nang ly ni ai hina tanrei dawn hai lawh mo? Ni i sa nai leaungsaichi ai, ati mana nai y tahm pateng lawh mo?

¹⁸ Nang ly ni ai khawn tleirei khen patawm iy, minit tleirei tajiu pi typ nai ne.

¹⁹ Kai pachi pajawm nai thym y nang ly takhra mang y hi pi vui ai nai ngo y a?

²⁰ Khumichi ai khen patawm nai keung, kai i kamngo my nang ai khrukhra naira tym hai lawh a? Ati mana nai y kai ai nang i cham nai amthiura kamta teaung lawh mo? Kai ly nang i vui khri pa-rei, ji nai myn kaji lawm lawh a?

²¹ Nang ly kai i kamngo pahen pi pajau y a? Kai i sa tamang nai pahen pajau y nai sai a? Kra y naimy kai ly tapreaung angawm y kasatla ai; nangmy hau nai khala, kai kaawm ai ny y leaung bo.