JOBA 5 - Khumi Common Language Bible

¹ Joba awi, nangmy palau baly, pathang nai khumi awm na a? Nang i paleung pado pajau nai, kani pri amtaw thau awm a?

² Paleung kham pajau y nai deaungkho y, amymy ai no patang hai iy, dei nai ly akhum nai hawi ati sai py ny y nai ne.

³ Khumi ka-khumchi chymme naimy awm nai ly kaniu vai reng; na i py kai ly nichi i yhm dengtheungchi i tlang tleaung y, vaimy taham si naira tym hai ai nai kapasawi bo.

⁴ Nichi i cho chanauchi ly mana khala py, tlamsa naira ngo pajau y. Tara jeng y nichi mang y asa hai nai khumi awm ai ny y.

⁵ Kajeu alam nai khumi ly khumi ka-khum i pakym achu nai choh cha u ai. Aleng reaung y prau nai choh malawn py cha u ai. Tui ahai nai khumichi py, khumi ka-khum i yhmtheaung katui paleung no u ai.

⁶ Sa tamang nai ly khaileaung pri y prau nai ny y. Ngari kamtang py, khaileaung theung i theu nai ny y.

⁷ Mai kadeu ly mai kalichi lawm hai reng nai kamta, Khumi py amy i ngari kamtang tym hai reng nai ne.

⁸ Kai naini nang i heng nai kamta avum lawh ai nabaly, Tameuh teng y ahihawi naimy, kaimy i molam kapany hai ai.

⁹ Kaichi ly mymy i sa nai nang parai nai saichi pany pajau y. Mymy i lyh ai awm parai nai saichi ly kati pajau y leang.

¹⁰ Mymy ly khaileaung y kani nai hai iy, li-prangchi salo y tui lei pi bo.

¹¹ Tahm anem naichi ai tahm asang hai iy, vo tangam nai khumi bawibawichi ai amo theu hai nai keung ly Tameuh ne.

^12-13 Mymy ly tau awm nai khumichi i ka-dawnchi phra hai ai. Khumi kachengchi ai py, mychi i paran nai hawimy pakhum hai reng nai ne. Hunai deaungkho y nichi ly mychi i sa nai leaungsai ngiereichira y, eaung naira ngo u y.

¹⁴ Nichi ly kanithun neng khala malawn py, kaveng theung y kamta, kiu hawi patham iy tako u ai nai tla ai.

¹⁵ Na i py Tameuh ly khumi kamawnchi ai deira i nai, khumi kamawn kateuchi ai ana naira i nai atleu bo.

¹⁶ Mymy ly khumi kamawnchi ai athang khai naira pei iy, khumi hawi y naichi i labeaung tamym nai ne.

¹⁷ Tameuh i thui parip naira avum nai khumi ly taham hawi! Nang i tlang tleaung y mymy i parip nai, tangai ai ngai y nai paleung awm moh.

¹⁸ Tameuh ly mymy i no pei nai tamo kalemchi ai kanih hawi bam pi. Mymy ly my i kiu hawi pajeng iy, huni kiu hawimy no hawi hai bo.

¹⁹ Mymy ly avaw avawrei, nang ai patang naira i nai atleu ai.

²⁰ Cha nei takang nai neng khala, tlang heng ai nai pei iy, tavai atiu nai neng khala py, deira i nai ama hai ai.

²¹ Tameuh ly nang ai li-tapawp nai hawi, tahm panem nairachi dengdairei ama hai iy, khri pa-rei patang hai naira tym nai neng khala py atleu bo.

²² Nang ly khri pa-rei ty nanai kamtang hawi, cha nei takang nai khala paniu iy, daichi mawi kasichi my khrukhra hai nai py, jei hyn ai ny y.

²³ Nang i sa nai li hlauchi ly lengseaungchi awm ai ny y. Daichi mawichi ly mana khala py, nang ai tabau ai ny y.

²⁴ Huna nai khala, nang ly kanih tambeung theung y, tlamsa naimy awm ai nai nga ai. Amy i beramchi ai khen nai khala, chymme naimy awm nai niu ai.

²⁵ Nang i katu chanauchi ly acha kamta peung u ai.

²⁶ Pakym achu nai neng tym pa-rei, mynjawm nai chohpui chomaw kamta, nang ly miteaung acheang pa-rei heng sau ai.

²⁷ Joba awi, kaichi ly huni leaungsaichi ai, neng kra parai naimy amtiu i pany bo. Hunichi ly teng khyp nai ne i, vai, kai i thui nai leu tangai ba.