JOBA 37 - Khumi Common Language Bible

¹ Alipui khupui ly kai ai paleung ahyn hai thlyh thlyh na bo.

² Nangchi bawibawi ly Tameuh i raawi, napi nai mymy i leu kani pajyh nai katyn tangai u.

³ Mymy ly khaileaung katemra khrairei, kani khusang mang tako prei iy amlosadi theu hai bo.

⁴ Naibaly huna nai amlosadi theu nai thym khala, phum-ang hawi kawi angym nai katyn kani pajyh nai thai na bo.

⁵ Tameuh my leu pei nai khala, rengrang naichi hawi achi pany thai y na pa-rei, lyh ai hawi parai naichi theu hai bo.

⁶ Mymy ly kadam amaichi khaileaung salo y tla hai ai nai leu pei. Kani py khri pa-rei taawi hai nai ne.

⁷ Mymy ly khumichi ai kalop anawn hai vui bo; mymy i sa thai naira haiho, khumichi pany ai nai patei pi.

⁸ Daichi mawi kasichi ly mychi i khaileaung kho theung y kun iy, aeung u bo.

⁹ Ali kamchai ly tokalawi ngan mang dengdai khri pa-rei savai nai ali ly tosyh ngan mang dengdairei theu reng nai ne.

¹⁰ Tameuh my hm nai ali deaungkho y tui amkhan vui i, tui kamkhan prangpui lawm bo.

¹¹ Amlosadichi ly Tameuh i ngai nai kamta amki iy, khupanymchi theung i nai sadi nai ne.

¹² Huni amlosadichi ly khaileaung pri verei y Tameuh i leu pei nai kamta sa u nai ne.

¹³ Tameuh ly khaileaung salo y tui nga ai nai kani nai hai bo; mymy ly khumichi ai kamngo pajeng ai nai py ne sy, hawi hai ai nai py ne sy, kani nai hai nai ne.

¹⁴ Joba awi, tanareichy kaneu iy, tangai kyh rai ba; Tameuh i sa nai lyh ai hawi parai naichi adawn pasym ba.

¹⁵ Tameuh ly ati mana leu pei iy, khupanym theung mang amlosadi theu hai nai mo, nanai nang pany a?

¹⁶ Tameuh i lyh ai hawi parai nai kupe lasa napi nai khupanymchi ly kani khusangra y ali hawi akheang naimy, awm nai sai nang pany a?

¹⁷ Pany pajau y; nang ly khaileaung y tokalawi ali aho nai kamta, kabi kamhui naini avum pajau khyh nai ne.

¹⁸ Nang ly kani khusang kadai ai nai Tameuh ai sabawm pajau a? Huni ai kheupaja kamta amchai iy, tang na pa-rei so pajau na a?

¹⁹ Tameuh teng y ati mana hnei ai mo, nanai kaichi ai patiu pi ba; kaichi ly cheng naira by y nai deaungkho y, kahnei u kawp y.

²⁰ Kai ly Tameuh teng y hnei takeng ai nai vam y; huna nai hnei nai molam y, kai ai tamyh vui ai nai sa thai naira mana pei ai mo?

²¹ Vai ly kani mang y kangvang ly achi i mei phawnja na pa-rei amchai parai nai ne; kani khusang ly ali aho nai deaungkho y, tamaichi chaipyn na bo.

²² Tosyh ngan mang y muku an aleaung nanai Tameuh i nang parai nai sai ly ka-jei awm nai ne.

²³ Tameuh i sa thai naira ly len parai nai deaungkho y, achi ly mymy sahawi y ahihawi pajau y; Mymy ly khumichi hawi amkawm naira y, leu meitang adyh adawi hai nai ne.

²⁴ Hunai deaungkho y khumi bawibawichi ly mymy ai jei kaji naimy tahm khai u bo. Mymy ly amymychi ai khumi kacheng ne, nanai thui naichi ai tahm pateng pi y nai ne.