JOBA 35 - Khumi Common Language Bible

^1-2 Joba awi, nang ly “Tameuh i mei keung y kai ly kamngo by y nai khumi ne.

³ Kai i kamngo ly mymy ai ati rai naira tym hai mo? Kamngo so y naimy awm nai molam y, kai teng y ati hawi naira awm mo?,” nanai Tameuh teng y thui pi ai nai avo y.

⁴ Kai ly nang hawi, nang i ahawichi i leu ai pathang teang ai.

⁵ Kani mang y khen cham! Tamaichi ly mana tanrei asang na mo, nanai khen u cham!

⁶ Nang kamngo sa nai khala, huni kamngo my Tameuh ai ati sai py khrukhra hai pajau y. Nang i tamang nai sai nawi baly, huni tamang naira my, mymy ai ati khrukhra hai pajau ai mo?

⁷ Nang ly kahawi sa nai deaungkho y, Tameuh ai sabawm pajau na a? Tameuh ly nang teng i, ati kasabawmra py aly ngai y.

⁸ Nang i sa nai kamngochi ly nang kamta, khumichi ai patang naira tym hai pajau; nang i kahawi sa naichi py, khumichi ai hawi naira nga hai pajau nai ne.

⁹ Khumichi ly ana naira avum nai khala, vo tangam naimy, mychi ai sabawm ai nai khumi leaung leaungrei teng y kaau u nai ne.

¹⁰ Na i py nichi ly patang nai veng nanai thym khala, athang khai naira pei pajau nai, sa nai keung Tameuh teng y ly ahihawi u y.

¹¹ Nichi ly achi ai tawnbawichi hawi tavochi tleaung y cheng naira awm hai nai Tameuh teng y ly ahihawi u y.

¹² Nichi ly amlyh am-e iy, khumi hawi y naichi ne nai deaungkho y, sabawm naira nga ai nai mymy teng y vo naimy hnei takeng u teu i py, Tameuh ly pathang pi y.

¹³ Huna nai vo u teu i py, nichi i vui kamran by y; ati cheaungkhang sa thai nai Tameuh ly nichi ai niu y; nichi i raawi py thai y.

¹⁴ Joba awi, nang ly Tameuh ai niu pajau y, nanai thui; kham naimy ajeng iy awm ba. Nang i sa nai ly mymy i mo y tym bo.

¹⁵ Tameuh ly kamngo pajeng vai y; kamngo ai py dawndan y, nanai nang dawn bo.

¹⁶ Nang katheu veangveang baly, kamran by y leang; nang ly nangmy ati thui nai mo, nanai pany y nai ly amteng bo.