JOBA 31 - Khumi Common Language Bible

¹ Kai ly anglo ai pajang ai ngai nai paleung hawi mana khala py khen y ai nai vaineng abeu nai ne.

² Ati cheaungkhang sa thai nai Tameuh ly achi i vui ati sa pi mo? Khumichi i atiti sa nai molam y, ati kamranra pei pi mo?

³ Mymy ly hawi y sa nai khumichi ai patang naira hawi myh kang naira tym hai bo.

⁴ Tameuh ly kai i sa nai ngiereichi ai pany iy, kai i takan nai kheukanchi niu nai ne.

⁵ Kai ly mana khala py amichi ai li-tapawp ai nai atho so y, nanai vaineng abeu bo.

⁶ Tameuh ly kai ai sie khyry kateng hawi neh cham lawh baly, kai teng y kamngo by y, nanai pany ai.

⁷ Tumbaly kai ly lam kateng envui lawh baly, hawi y naira mang y abang lawh baly, kai i kiu y chainem y nai abawi lawh baly,

⁸ kai i amti amjangchi ly phra pawn sy. Kai i li ra i theu nai ly khumi takhrachi i vui teicha teinei lawm sy.

⁹ Kai ly kaimy yhm deaungpa i aju ai khrei tahau nai paleung hawi, ni i katheu pa-khora y abyh iy, ajeng lawh teu baly,

¹⁰ kai i aju ly takhra neampacho leaungrei ai pacho panei ai nai tlo sy; takhra neampacho hawi vanrei i ahawi na sy.

¹¹ Huna nai hawi y nai sai ly padei ai ataing nai leaungsai ne.

¹² Kai i kanang kachawn ngierei ai, kang hai ai nai mai hawi atawm.

¹³ Kai i miseaung neampacho neampachy ly kai i tlang tleaung y paleung angai y nai sai thui nai khala, kai ly tangai iy nichi i tlang tleaung y kahawi sa pi nai ne.

¹⁴ Kai ly hunai kamta so pi y naimy awm lawh teu baly, Tameuh hawi mana avum vam ai mo? Kai ai Tameuh my tara chih ai nai ang jeu nai neng khala, kai ly mana nai hnei takeng bi thai ai mo?

¹⁵ Kai ai sa nai Tameuh ly kai i miseaungchi ai py sa nai keung ne.

¹⁶ Kai ly khumi kamawnchi ai sabawm ai nai mana khala py, akhi vai y; Paleung phra atho di nai neampachy lumaichi ai mana khala py, athang khai y naimy nai awm vai y.

¹⁷ Kai ly nuro nukaichochi ai kapacho kapanei y naimy, kaimy tlairei kacho vai y.

¹⁸ Kaimy deungrei nichi ai kakhen, kakry nai ne.

¹⁹ Ateaung alang van pajau y na pa-rei, kamawn acheang nai leaung leaungrei ai avum nai khala,

²⁰ kai ly kaimy i beram kanghura i nga nai beram miu hawi aneang nai ateaungchi, ni ai pei pi nai ne.

²¹ Kai ly tara jeng y eaung ai, nanai pany iy, nurocho leaungrei ai li-tapawp lawh teu baly,

²² kai i kiuban ly tleu iy, paleang thla vui sy.

²³ Kai ly Tameuh my kamngo pajeng ai, nanai jei nai deaungkho y, hini leaungsaichi mana khala py kaso vam y.

²⁴ Kai ly mana khala py, yhmtheaung nang chawn ai nai a-ym vai y.

²⁵ Yhmtheaung katui nang mang nai molam py, amlyh am-e vai y.

²⁶ Kai ly angvang parai nai kanito hawi savairu nanai lo ai, mana khala py chiu vai y.

²⁷ Kai ly ka-dawn tamang naimy hunichi ai kiu pheu iy, mana khala py tahm kakhai vai y leang.

²⁸ Hini kamngo ly ati cheaungkhang sa thai nai Tameuh ai khai su nai lawm i, padei ai ataing nai kamngo ne.

²⁹ Kai ly kaimy i paleung ka-echi patang nai khala, amo theu nai awm vai y; nichi khrikhri pa-rei patang naira avum nai khala py, paleung ateng hai vai y.

³⁰ Kai ly chiu sa nai khala, nichi dei ai nai mana khala py katabawi vai y.

³¹ Kai ly apany vai y nai khumichi ai lamchung iy, pacho panei jojo reng, nanai kai i kalop sa pi nai khumi bawibawichi pany u nai ne.

³² Kai ly khuleaung angvynchi ai, kai i yhm y anga hai ai nai palau nai ne. Mana khala py nichi ai lam y i hai vai y.

³³ Khumi takhrachi ly mychi i kamngochi apha u; na i py kai ly mana khala py, kaimy i kamngochi apha vai y.

³⁴ Kai ly khumichi my thui preaung u ai, nanai mana khala py jei vai y. Nichi my cheh ai nai jei i, mana khala py awm pypy iy yhm theung y aheu phyh vai y.

³⁵ Kai i thui nai leuchi ai tangai pi ai nai khumi leaung leaungrei py by y na bo a? Huni leu bawibawichi ly teng, nanai kai vaineng abeu nai ne. Ati cheaungkhang sa thai nai Tameuh ly kai ai leu pei ali teang sy. Kai ai seu nai khumi ly seu nai saichi kai pany pajau ai nai, cha hawi tajiu pi teu i khyly,

³⁶ kai ly tahm khai amlyh naimy huni cha ly kaimy i paleangra y ka-bi ai; kaimy i lu tleaung y areng lukhym kamta adeung ai.

³⁷ Kai ly kaimy i sa nai leaungsai ngiereichi ai Tameuh teng y pany hai iy, mymy i mo y lu dengtheang ai.

³⁸ Kai ly kaimy thawn nai li khaileaung ai, kapaviu lawh teu baly, yhmkeung tatangchi teng i kala vui lawh teu baly,

³⁹ kai ly huni li ra i nga nai amti amjangchi kacha iy, hunichi ai pati nai li sa naichi ai kajeu kanglam khai lawh teu baly,

⁴⁰ kai i li y choh hawi chajai keungchi i jeng y, acha keungchi hawi aleng keungchi prau hai sy. Joba i thui nai leuchi ly hinira y tem bo.