JOBA 30 - Khumi Common Language Bible

¹ Vai i neng khala ly kai tleaung y saneng nau nai khumichi my, kai ai panui hai u lawh ly! Nichi i ampochi ly ati sai py ny y nai deaungkho y, kaimy i beram typ nai uichi ai sabawm ai nai malawn py teaung vai y.

² Nichi ly atho di nai khumichi ne nai deaungkho y, kai i vui ati kahawi so pi thai y.

³ Nichi ly khri pa-rei mawn iy kajeu alam nai deaungkho y, vum y khumi angso syhp, nanai khala, khutaha meingtym y dengkeaung kajeichi cha u bo.

⁴ Nichi ly daichi ka-vym y awm nai dengkeaung dichi akyn iy cha u. Kalum kathau by y nai yhmpheu keung tangjynchi malawn py cha u lawh ly!

⁵ Khumi bawibawichi ly kangviu khumi ai aeu hai iy, paryh vui nai kamta, nichi ai aeu hai iy paryh u bo.

⁶ Nichi py lengseaung tapiuchira y awm u. Lengseaung parachi ai tai i py awm u nai ne.

⁷ Lymlo kangphochi awm naira y, daichi mawichi kamta hang i, lymlo kangphochi anui y ake chi-u naimy awm u bo.

⁸ Nichi ly khumi hawi y naichi ne i, mychi saleaung i dengdairei, paryh nai avum u bo.

⁹ Vai i neng y nichi ly jeu iy, kai ai panui hai u bo. Kai ly nichi my panui hai ai nai asa lawh veng.

¹⁰ Nichi ly kai ai niu ngai y i, mychi hawi amtawn abi ai nai ataing y, nanai athang khai u bo; nichi ly jeu iy, kai i meimai y malawn py, pachi ang pathawi u bo.

¹¹ Tameuh ly kai ai atho di hai, kajeaung kamang lawm hai nai deaungkho y, nichi ly kai ai athorei my ang tiu u.

¹² Hini khumi kamkawm ly kai ai apadawi-ra nai my ang tiu u nai deaungkho y, kai ly preang vui bo. Huna nai khala nichi ly kangkhym kangtem, kai ai tiu ai nai aeng u rym bo.

¹³ Nichi ly kai i theura pa-kho padeng vui iy, kai ai ang tamyh vui ai nai atho sa u. Nichi ai paka ai nai khumi leaungrei py by y.

¹⁴ Nichi ly kai i amtangra phra vui nai meingtym mang dengdairei ang kun iy, kai ai athorei my ang tiu u bo.

¹⁵ Kai ly khrikhri pa-rei jei nai ne. Kai i tahm awm nai sai ly ali kamta aho veng bo. Kai i yhmtheaung katuichi ly tamai kamta tama vui veng bo.

¹⁶ Vai, kai ly deivi na bo. Kai i avum nai no patangra ly hawi kyh naira by y.

¹⁷ Vum y kai i hiuchi ly no i, athovuichi ly no aninau na bo.

¹⁸ Tameuh ly kai i baichu kano y amkhawcheng iy, ateaungchi ai mie vui nai ne.

¹⁹ Mymy ly kai ai aneaung kapan theung y aphi vui nai deaungkho y, kai ly spryh hawi maidym kamta lawm bo.

²⁰ Aw Tameuh, kai ly nang ai kang palau bo; na i py nang ly mana khala py pathang pi y. Kai chiu sa nai khala tangai pi y.

²¹ Mymy ly kai ai pahyp y naimy ang sa bo; sa thai naira awm nai ngierei hawimy ana bo.

²² Mymy ly kaichi ai ali theung y ahei hai iy, alipui khupui theung y patang hai kalikachi bo.

²³ Mymy ly kai ai dei areng teng y tha nai ne, nanai kapany. Hini khym taham ly khumi luteng avum ai nai khym taham ne.

²⁴ Ahui kajeaung kaji nai ny y baly, takhra ati py so thai y nai khumi ai mymy ly ati mana nai tiu lawh mo?

²⁵ Kai ly patang naira avum nai khumichi hawi vanrei, kavo nai ny y lawh a? Khumi kamawnchi i vui y, paleung si paleung mawn hai nai ny y lawh a?

²⁶ Kai ly amo theu ai nai kadeaung nai khala, patang naira py, kangvang kadeaung nai khala, kaveng py avum nai ne.

²⁷ Kai i paleung pathym bi nai kamtang hawi my, paleung ama na bo. Kai ly ngari kamtangchi kani tlei tleirei avum.

²⁸ Kai ly kani kangvang niu y naimy, katako mengmang bo. Khumi mipuichi theung y angdo iy, kasabawmra kahnei.

²⁹ Kai i raawi ly khiva, ti y baly tavo kula-iu i hang nai kamta paleung ama i, ahawi nipui by y nai khumi i raawi ne.

³⁰ Kai i ngan tlangchi ly panum vui bo; kai ly khri pa-rei keaung taprang nai ne.

³¹ Vaichi khala paleung pathym savairu ai hawi nai khulym raawichi thai i py, vai, kai ly vo tangam nai raawichi naini thai lawh bo.