JOBA 26 - Khumi Common Language Bible

Joba

^1-2 Nangchi ly kai ka-tawm atho di nai khumi ai khri pa-rei kasabawmra pei u bo!

³ Nangchi ly kai kamta akhum nai khumi ai, hina tanrei tau kahawichi pei iy, amychi i tau kacheng phy paji pi u na ly!

⁴ Hina nai katheu pajau ai nai, ami my patiu pi mo? Nangchi ai ami my ang pachei mo?

Bilada

⁵ Khumi kadeichi i phailochi ly khaileaung anui i tui theung y jei hyn naimy awm u bo.

⁶ Tavau pri ly Tameuh i mo y tleangkhym by y; daihaulau naimy awm.

⁷ Tameuh ly tosyh mang y awm nai kani khusang kadai iy, khaileaung ai ly khusang deaungdura y banghau nai ne.

⁸ Khupanymchi ra y tui kawi hai mang iy, huni tui kaji molam y apeu y ai nai, typ pi nai keung ly Tameuh ne.

⁹ Mymy ly lo-um kangvang ai, khupanym hawi dang hai khyp bo.

¹⁰ Mymy ly suida pangli tui salo, khuteng deaungdu saho y, kangvang hawi kaveng patleh takhra pi bo.

¹¹ Kani khusang y tawi nai yhmtawichi ly mymy parip nai khala jei nai deaungkho y anghyn u bo.

¹² Mymy ly sa thai naira hawimy pangli ai tiu iy, tau cheng naira hawi pangli naka rahabi ai tamyh vui bo.

¹³ Mymy ly my i taho nai ali hawi kani khusang chai hai iy, preang veng nai pangli naka ai, mymy i kiu hawi padei vui bo.

¹⁴ Na i py hini leaungsaichi ly Tameuh i sa thai naira i, maidenreichy teu rai. Huni sa thai naira i satang ly khumichi i leu kamsyh y katheu nai ryrei khyh nai ne. Tameuh ly sa thai naira awm tatang, nanai ami pany khyp pajau ai mo?