JOBA 24 - Khumi Common Language Bible

¹ Tameuh ly mymy teng y ahihawi iy chiu nai khumichi i vui, tara chih nai neng kani, ati mana nai y khai pi y lawh mo?

² Khumichi ly khaileaung meingtym nga panawi bi ai nai molam y, khaileaung jyh chenghengchi, kasyh vui reng. Nichi ly beramchi paviu iy, mychi i beram kanghuchi hawi vanrei khai u reng.

³ Nuro nukai chochi i keaungngo kano kasauchi paviu iy, lumai cheaungti i si ai, ka-peaung talam reng nai ne.

⁴ Nichi ly khumi kamawnchi i nga sang naichi paka pi vui iy, khumi kamawnchi ai kamjau kamteang paryh iy, aheu hai bo.

⁵ Hunai deaungkho y khumi kamawnchi ly keaungngo kano kasau karamchi kamta, tui by y nai daichi ka-vym theung y teicha teinei hau u nai ne. Nichi ly mymychi i cho chanauchi i vui teicha teinei hau ai nai ly huni daichi ka-vym ny y baly, takhra meingtym by y.

⁶ Nichi ly ami i li hlauchira i choh tyn u. Khumi hawi y naichi i kreip akho theung i, kreip athaichi jaw u nai ne.

⁷ Nichi ly vum y kasavai akhiu ai nai, kanih by y naimy i u.

⁸ Mawi mang i nai nai kani my sui i, lengseaungchi sala y abyh u bo.

⁹ Khumi hawi y naichi ly nuro nukai chochi ai, miseaung palawn u bo. Kalai pe pajau y nai khumi kamawnchi i, cho chanauchi la pi pawn.

¹⁰ Huna nai y khumi kamawnchi ly tlang ka-keu naimy aleaung ali u nai ne. Nichi ly choh tyn nai thym y malawn py, kajeu alam u bo.

¹¹ Nichi ly Olive asitui nip iy, kreip athai ati pi teu i py, mychi kypkyp ly alam naimy awm u.

¹² Marychira y tamokalem nga naichi hawi, dei enten nai khumichi aeu u bo; na i py Tameuh my nichi i chiusa nai dawn pi y.

¹³ Khumi phyreichi ly kangvang ngai u y; nichi ly kangvang i awm nai sai pany u thai y. Kangvang my patei nai lam y abang u y.

¹⁴ Khumichi ai padei nai keung ly khutawi neng khala theu iy, khumi kamawnchi ai tleh reng nai ne. Ni ly vum y kangviu sa reng.

¹⁵ Ami i yhm hlau taphra reng nai khumi ly kani kadym ajeng iy, ami py niu pajau y ai nai, my i meimai amym reng nai ne,

¹⁶ Kangviu sarachi ly vum y yhmchi atengvau iy, kun u reng; kanithun y ly aheu iy, kangvang asyn u reng nai ne.

¹⁷ Nichi ly kanithun i kangvang ai jei u; na i py kaveng ai ly jei u y.

Zawpha

¹⁸ Khumi hawi y nai ly tui my um naira y amjau reng nai ne. Ni i peang nai khaileaung meingtym py, Tameuh i amsawi lawi bo. Ni ly my i kreip akho y chei iy, kalop so y leang bo.

¹⁹ Kani kabi jengha nai neng khala, kani amaichi tama vui nai kamta, kamngo sa nai khumi ly khaileaung pri i nai tama vui reng nai ne.

²⁰ Ni ai ami my py pany y leang bo; my i amhm my malawn py, ni ai tami veng bo. Ni i ngan tlang ai thaideaung my cha ai. ni ly paliu vui nai dengkeaung keung kamta, phra vui ai.

²¹ Huna nai kamta lawm nai ly ni ly lumai cheaungtichi ai ana iy cho chanau so y nai neampachychi ai, pahen y nai deaungkho y ne.

²² Tameuh ly atho haiho len nai khumichi ai, mymy i sa thai naira hawimy taphra reng. Mymy tara chih nai khala, khumi hawi y nai ly tlang vui tem nai ne.

²³ Tameuh ly ni ai tlamsa naimy awm ai nai pei lym ai; na i py khen patawm jojo reng nai ne.

²⁴ Khumi hawi y nai ly tanareichy eaung naira nga reng; na i py acha kamta py, tyn vui nai choh keung kamta py, jeirawm veng reng nai ne.

²⁵ Hini molam y ami ei pajau ai mo? Kai i leu teng y, nanai ami pany hai pajau ai mo?