JOBA 20 - Khumi Common Language Bible

Zawpha

^1-2 Joba awi, kai i paleung ai pachei nai deaungkho y vai, kai ly awm pypy thai y i, kang pathang pi ai.

³ Nang i katheu nai leuchi ly khumi aniu y nai leuchi ne. Na i py nang ai mana kang pathang ai mo, nanai kai pany.

⁴ Jangni jangkhawn y, khaileaung pri y khumi awm angchei khala i dengdairei,

⁵ khumi hawi y nai ngiereichi ly neng kasau amo theu naimy, awm ai nai nga, nanai by awm y nai ly nang pany.

⁶ Ni i sa thai naira ly kani khusang y khrairei asang iy, ni i lu py tamai y angteu na;

⁷ na i py ni ly spryh kamta ahei phro vui ai. Ni ai pany nai khumichi ly ni i tym nai meingtym deng iy, adawn pasym u ai.

⁸ Ni ly vum y amang amang nai kamta tami veng ai. Khumichi ly mo mang y mana khala py, niu u ai ny y.

⁹ Ni ai niu reng nai mei ly niu ali bi ai nai ngo y ai; ni ly my i meingtym i nai tama vui ai.

¹⁰ Ni i chapochi py, khumi kamawnchi teng i lawm vui nai vawnsaichi ai, pe u ali teang ai nai tla.

¹¹ Ni i tlang ly ka-veang thym ngan tlang y awm vai teu i py, kra y naimy spryh kamta lawm vui ai.

^12-13 Ni ly hawi y sa nai ai, hawi pany nai deaungkho y my i palai tleaung y khai iy khreip, nanai pa-rei hawi pany thai nai ne.

¹⁴ Na i py huni teicha ly kajeu theung y tym nai khala, deira thailai kamta kho ai.

¹⁵ Khumi hawi y nai ly my i paviu nai vawnsaichi paleu ali teang ai. Hunichi ai Tameuh ly ni i taku theung i nai patheu pi vui ai.

¹⁶ Khumi hawi y nai i pajawn nai ly dei asi atawm; Huni ly pavui kangso my patiu nai kamta, ni ai dei hai ai.

¹⁷ Ni ly olive asitui leaung nai tavochi, kanutui hawi khawihang leaung nai micheaungchi niu ai ny y leang bo.

¹⁸ Ni ly my i lop-pan iy, nga nai vawnsai ngiereichi ai khai su ai nai tla ai.

¹⁹ Ni ly khumi kamawnchi ai ana iy tahm khai y naimy, ami i sa yb nai yhm hlauchi lawm vui nai deaungkho y, my i yhmtheaung katui amtym ai ny y.

²⁰ Ni i ngai phi ala nai ly mana khala py dam pajau y.

²¹ Ni i cha nei nai khala, ati sai py kamlai khai vai y. Hunai deaungkho y ni i yhmtheaung katui ly akan ai ny y.

²² Ni ly yhmtheaung katui khri pa-rei, nang chawn nai neng khala py, paleung bi naira khrikhri pa-rei avum ai.

²³ Ni i cha ai ngai nai ngierei cho palai sy! Tameuh ly khri pa-rei kado theu nai y, ni ai kamngo vang pajeng ai.

²⁴ Ni ly tamo haisau bo i nai tleaung ai nai angpreng nai khala, kheupaja thailiho hawi ko nai, prileu nai avum ai.

²⁵ Thailiho chyn ly ni i tlang prileu vui ai; amchai na nai thailiho chyn meaung i nai, thichi leaung ai. Huna nai khala ni ly jei hyn naimy kaso theu ai.

²⁶ Ni i pateung achu nai vawnsai ngiereichi ly tama pawn ai; khumi my paeng y nai mai ly ni hawi ni i yhm dengtheung bawibawichi ai kang vui ai.

²⁷ Ni i kamngo ai kani khusang my patei iy, khaileaung my pany hai ai.

²⁸ Tameuh i kado theu nai neng kani y, ni i awm nai vawnsai ngiereichi ly taphra naira avum ai.

²⁹ Huni ly khumi hawi y naichi i khym taham ne. Huni ly nichi i vui Tameuh my, khai pi yb nai khym taham ne.