JOBA 2 - Khumi Common Language Bible

Joba i ka-ym awm nai sai ai setan my cham bi nai

¹ Areng i mo y kani pri mang ichi, ahihawi nai neng kani tym bi nai khala, setan py nichi hawi vanrei abawi teang bi nai ne.

² Ni ai Areng my, “Nang ly ma mang i jeu nai mo?” nanai deng. Setan my, “Kai ly khaileaung pri y aki aleaung nai ne,” nanai pathang.

³ Areng my, “Khaileaung pri y hawi angym iy kai, Tameuh ai jei kaji naimy hawi y naira asyn ai nai pany nai khumi, kai i miseaung Joba kamta leaungrei py by y, nanai pany bo a? Nang ly ni i vui hawi y ai nai atyhtyh naimy kai teng y takeng. Na i py Joba ly ka-ym awm tleaung awmra bo,” napi.

⁴ Setan my, “Khumi nanai ly tlang heng naimy awm thai ai nai, my i yhmtheaung katui awm nai ngireichi khai su ai nai ne.

⁵ Vai, nang ly Joba i ngan tlang ai no patang hai lawh baly, ni ly nang ai mei ka-niu y my ang pasawi ai,” napi.

⁶ Hunaibaly Areng my, “Ni ai nang i kiu y kang-au mang. Na i py nang ly ni i tlang ai ly padei moh,” nanai leu pei.

⁷ Huna nai khala setan ly Areng mo i nai leh vui iy, Joba i ngan tlang verei y uisaluchi man hai bo.

⁸ Joba ly my i angvawichi tahu ai nai laawm phei la iy, maidym theung y ateh.

⁹ Ni i aju my, “Nang ly ka-ym awm asai rai a? Tameuh ai pasawi iy dei jau be,” napi.

¹⁰ Joba my, “Nang ly neampachy ka-khum kamta katheu lawh ly! Achi ly Tameuh teng i dengdairei, tlamsa naira nga baly, patang naira py avum ai nai tlo y a?,” napi. Joba ly hini patang naira avum teu i py, Tameuh i tlang tleaung y labeaung palai hawi malawn py tamang y nai ne.

Joba i ahawi leaung thomrei tym nai

¹¹ Joba i ahawi leaung thomrei ly Teman mary i Eliphe, Shua pri i Vilada hawi, Naamah pri i Zawphachi ne. Nichi ly Joba manatanrei no patang na mo, nanai satang thai u nai khala, ni teng y chei iy paleung awm hai nem ai nai neng adeu u bo.

¹² Nichi ly kamlo mang dengdairei Joba ai niu u teu i py, mo ma u y na bo. Joba ne, nanai pany u nai khala, nichi ly vo tangam naimy, mychi i ateaungchi sei iy, mychi i lu tleaung y spryh tla hai ai nai pachaw u bo.

¹³ Hunaibaly nichi ly Joba manatanrei no patang naira avum na mo, nanai niu nai deaungkho y, kani saryh ryrei, vum kanithun leu katheu y naimy ni hawi vanrei, khaileaung y ateh u bo.