JOBA 17 - Khumi Common Language Bible

¹ Kai ly dei ai nai neng kasa bo. Kai ly hawihai palai taho thai y na; kai ly tapreaung y tym ai nai awm khyh bo.

² Kai i tlang tleaung y khumichi my mana tanrei leuram ang preaung u na mo, nanai kapany bo.

³ Aw Tameuh, kai ly leu kahawi katheu nai ne. Kai i leu ym ba. Kai i thui nai leu ai nangmy ny y baly, pajeaung pi ai nai khumi by y.

⁴ Nang ly huni khumichi ai adawn thai naira awm ai nai pei y bo. Vai, nichi ly kai i tlang tleaung y eaung naira ngo u moh sy.

⁵ Khumi ly paisa tangka molam y ahawi kamrawichi i tlang tleaung y tapawp reng i, ni i cho chanauchi ly patang naira avum u nai ne,” nanai thui achi nai leu awm.

⁶ Vai i neng y khumichi ly huni thui achi nai leu teaung iy, kai ai hawi y nai ang pei u lawh. Nichi ly jeu iy kai i meimai y pachi pathawi u bo.

⁷ Kai ly khri pa-rei paleung si paleung mawn nai y, mei py angvang y vui na bo. Kai i kiu kheuchi ly pa-pui kamta, akreaungkrang na bo.

⁸ Amychi ai kahawi ne, nanai thui nai khumichi ly athengra iy, kai ai tameuh by y nai khumi, nanai ang thui tamawn u.

⁹ Amychi ai tahm awm, nanai thui naichi ly mychi mang kateng ne, nanai ymra ymra u bo.

¹⁰ Na i py nichi bawibawi ly kai i mo y jeu iy angdo u baly, nichi theung y khumi kacheng leaungrei py, hau nai kaniu ai ny y.

¹¹ Kai i neng kanichi ly kheih veng bo; kai i dawn tau naichi ly phra pawn veng bo. Kai i athang khai naira by y leang bo.

¹² Na i py kai i ahawichi my, vum ly kanithun palawn u bo. Nichi ly angvang ai nai neng kasa bo, nanai thui u teu i py, kai ly kaveng theung y awm jo rai, nanai kapany.

¹³ Kai i athang khai naira harei ly tavau pri ne. Kai ly huni meingtym, kaveng theung y aseaung naimy ka-i ai nai tla.

¹⁴ Tapreaung angawm i ampo, kai i ngan cha u nai kaleungchi ly kai i amhm, kai i tuichochi, nanai kapalau ai nai tla ai.

¹⁵ Kai i vui athang khai naira ly ma y awm rai mo? Athang khai naira ly ami niu mo?

¹⁶ Tavau pri y kai chei nai khala, huni athang khai naira ly kai hawi vanrei abang ai ny y leang bo.