JEREMIA 8 - Khumi Common Language Bible

¹ “Huni neng khala khumichi ly Juda samrangchi, samrang i bangtangchi, pathyp pi nai keungchi, amochi hawi Jerusalem mary khumichi i hiuchi ai, mychi i tapreaung angawmchira i patheaung u ai.

² Nichi ly mychi i kangai tahm khai nai, chiu sa nai, adeng ahui u nai kanito, lo, ka-sichi anui y, huni hiuchi ai jang jaai ai. Hunichi ai pakym iy up ai nai tleaung y ly khaileaung kahawi lawm ai nai pala jawn ai.

³ Kaimy ahei hai phro nai meingtymchira i dei kamthumchi, hini hawi y nai khumi chengchi ly mychi heng jo ai nai tleaung y dei ai nai ngai u keh alam ai. Hini ly ati cheaungkhang sa thai nai keung Areng i thui nai leu ne,” napi.

Kamngo hawi tara chih naira

⁴ Khumichi teng y thui pi ai nai Areng i leu pei nai ly “Atlym iy ang thau teang y nai ly ami awm ai mo? Lam tamang iy ali teang y nai ly ami awm ai mo?

⁵ Kai i khumichi awi, nangchi ly ati mana nai y kai teng i nai amphri vui iy jeu teang y lawh mo? Nangchi ly li-tapawp naira y paleung apei thleng nai deaungkho y, kai teng y ali teang ai nai akhi u bo.

⁶ Kai ly hawihai palai katangai pi teu i py, nangchi ly leu meitang katheu u y. Nangchi theung y ami py nangmychi i hawi y nai molam y paleung mawn u y. ‘Kai ly ati hawi y nai kasa lawh mo?’ nanai ami py deng u y. Tavai keung y athorei my angpreng nai keaungngo kamta, khumi luteng ly amy ngai ngai sa u lawh.

⁷ Kani mang y akheang nai obeaung asang malawn py, vawi teang nai neng pany. Amprym buhu, phengphi hawi obeaung-a puichi py, mychi i teicha tlai nai meingtym, ang pyn nai neng pany. Na i py kai i khumi nangchi ly nangmychi i Areng my khai pi yb nai reita pany u y.

⁸ Kai i reita pany iy nangchi ly khumi kacheng ne, nanai ati mana nai nangchi thui u thai ai mo? Leu meitang teaung y nai reita pany nai keungchi my, reita sa palai pawn nai ne.

⁹ Nangchi i khumi kachengchi ly kangji nga u bo. Nichi ly paleung khrukhra naimy deaung y man u bo. Nichi ly kai i leu khai u su bo i, vai nichi ly ati cheng naira awm u jau mo?

¹⁰ Hunai deaungkho y nichi i li hlauchi ai yhmkeung kangtha teng y hawi, nichi i ajuchi ai takhra khumichi teng y py kapei pi vui ai. Khumi katheang kalen khyh chang y, khumi bawibawichi ly teng y naimy paisa tangka hau u bo. Amochi hawi pathyp pi nai keungchi malawn py, khumichi ai tapawp u nai ne.

¹¹ Nichi ly kai i khumichi i tamo kalemchi ai tahm pateng pi y naimy hawi sa pi. ‘Cheaungkhangra y amsym y nai neng khala, cheaungkhangra amsyn bo’, nanai thui u bo.

¹² Kai i khumichi ly amso ngai naichi sa u nai molam y kaji u a? Lym lym kaji u y, kangji meimai py amteng y! Hunai deaungkho y nangchi ly khumi takhrachi kamta atlym u ai. Kaimy pajeng nai khala nangchi ly ang thau u pajau ai ny y. Hini ly kai Areng i thui nai leu ne.

¹³ “Li hlau sa nai khumi ly my i amti amjangchi pakym achu nai kamta, kai Areng ly kaimy i khumichi ai pakym achu ai nai ngai. Na i py nichi ly ngamchi ajawi iy athai by y nai kreip keungchi, athai y nai thaidu keungchi hawi atawm nai ne. Hunai deaungkho y kaimy kang pei nai pri ly cheng takhrachi kiu y tym hai veng bo.

¹⁴ Tameuh i khumichi my, “Achi ly ati mana nai y ateh u tliu lawh mo? Jeu u ly amtangra marychi mang y angpreng iy, achi dei u sina. Achi i Areng Tameuh ly achi ai dei hai bo. Achi ly mymy i tlang tleaung y kamngo sa nai deaungkho y, mymy ly achi nei ai nai dei asi abawi nai tui panei bo.

¹⁵ Achi ly tlamsa ai nai athang khai u teu i py, atyhtyh teu bo; noso aho ai nai athang khai u teu i py, ka-jeira naini nga u lawh nai ne.

¹⁶ Paleung ka-echi ly tosyh mang y awm nai Dan mary tym pa-rei tym u i, nichi i keaungngochi i noseng eng nai katyn achi thai bo. Nichi i keaungngochi hang nai khala, pri verei kasotheu u nai ne. Nichi ly achi i pri hawi achi i pri y awm nai ngierei, achi i mary raurei, mary i mipuichi ai tamyh pawn ai nai ang tym u nai ne,” nanai thui u bo.

¹⁷ Areng my, “Dawn amcheng naimy awm u! Kai ly nangchi theung y pavuichi, pavui sara my dawi pajau y nai pavui kangsochi ai kang pato ai. Huni pavuichi ly nangchi ai ang patiu ai.

Jeremia ly mymy chengchi i vui paleung si nai

¹⁸ Kai i paleung si nai rym vui pajau y. Kai i paleung ly patang bo.

¹⁹ Tangai u! Khri pa-rei palo parai nai pri takhra y awm nai kai i khumichi i vo hang nai raawi kathai bo. “Areng ly Zion mary y awm y lawh a? Zion mary i samrang ly huni mary y awm y lawh a? Nichi i samrang Areng my, “Nangchi ly ati mana nai y mynchi hawi cheng takhrachi i tameuhchi ai chiu nai hawimy kai ai kado patheu u lawh mo?,” napi.

²⁰ Khumichi my py, “Kanipui kheih iy amti amjang pakym nai neng katlen vui teu i py, achi ly atleu naira ngo y rai,” nanai aeu u bo.

²¹ Kai i chengchi ly tamyh naira avum u nai deaungkho y, kai i paleung ly phra piu veng bo. Kai ly vo tangam naimy khri pa-rei phailo seaung na bo.

²² Kilead pri y asi akhang by y lawh bo a? Daitang py by y lawh bo a? Ati mana nai y kai i chengchi i no-na hawi pa-rei so u thai y lawh mo?