JEREMIA 43 - Khumi Common Language Bible

Jeremia ai Aikupta pri y hawi nai

¹ Kai ly khumichi teng y thui pi ai nai nichi i Areng Tameuh my pato iy taviu nai leuchi thui pi chum nai khala y,

² Hoshaiah i chapo Azariah, Kareah i chapo Johanan hawi takhra paleung len amlyh nai khumi bawibawichi ly kai ai, “Nang ly ka-chawi leu katheu nai ne. Kaichi i Areng Tameuh ly kaichi ai Aikupta pri mang y chei moh, nanai thui pi ai nai nang ai pato nai ny y.

³ Neriah i chapo Baru ly kaichi ai Babulon chengchi my padei ai nai py, Babulon pri y hawi u thai ai nai py, nichi i kiu y kaichi ai au ai nai nang ai pachei nai bo,” napi u.

⁴ Hunai deaungkho y Johanan, tavailu arengchi hawi khumi bawibawichi ly Juda pri y awm ai nai Areng i leu pei nai tangai u y.

⁵ Naibaly Johanan hawi tavailu areng bawibawichi ly Juda pri y awm jo rai nai khumichi ai, Aikupta pri y hawi u bo. Nichi ly pri tleirei y ahei akyhkyh naira i, Juda pri y awm ai nai vawi u ali teang nai,

⁶ neampacho, neampachy, deaungdichi hawi samrang i chaniuchi napi nai khumi bawibawichi ai py, Kedalia i kiu y Nebuzaradan my au nai kai hawi Baru napi nai khumi bawibawichi ai py, hawi pawn nai ne.

⁷ Nichi ly Areng i leu pei nai tangai y naimy Tapaneh mary y tym pa-rei, Aikupta pri theung y kun u bo.

⁸ Tapaneh mary y Areng ly kai teng y,

⁹ “Lengseaung kalen phyrei la iy hini mary ai peang nai keungchi i yhm apai katheu pa-khora up ba. Nangchi i hina nai sa nai py Israela cheng phyreichi my niu na sy.

¹⁰ Hunaibaly nichi teng y, Israela chengchi i Tameuh, ati cheaungkhang sa thai nai keung kai, Areng ly kaimy i miseaung Babulon samrang Nebukhadnezar ai hini meingtym y kahawi ai. Kaimy up hai nai hini lengseaungchi salo y, ni i areng atehra sa iy ni i kanih yhm kaimy kadai ai.

¹¹ Nebukhadnezar ly ang jeu iy Aikupta pri y tiu i, eaung ai. Ni ly no kanghawi y dei ai nai khumichi ai, no kanghawi y dei hai ai. Langheng y hawi ai nai khumichi ai langheng y hawi ai. Tavai keung y dei ai nai khumichi ai, tavai keung y dei hai ai.

¹² Kai ly Aikupta pri tameuhchi i achura yhmchi ai mai kaleng ai. Babulon samrang ai huni achura yhmchira i tameuhchi ai mai leng hai ai, ti y baly la hai pawn ai. Beram tym nai keungchi ly mychi ateaungra i heichi hau pyn nai kamta, Babulon samrang ly hini pri i vawnsaichi hau pyn iy, eaung naimy vawi hai pawn ai.

¹³ Ni ly Aikupta pri i kanito mary puira y awm nai ka-ma-ra leungcheng pado naichi taphra pawn iy, Aikupta pri i tameuh achura yhmchi ai mai leng pawn ai,’ nanai leu pei nai thui pi,” napi.