JEREMIA 27 - Khumi Common Language Bible

Jeremia ly si tamtleang tleang nai

¹ Juda pri y Josia i chapo Zedekiah samrang y atheng nai bo y, kra y naimy Areng ly kai teng y leu pei nai ly

² Mawipeih vuinawnchi, si kaneaung y beung nai tamtleang sa iy, nang i kaneaungra y atleang ba.

³ Naibaly samrang Zedekiah hawi avum ai nai Jerusalem mary y tym nai savaichi dengdairei, Edom samrang, Moba samrang, Ammon samrang, Turu samrang hawi Sidon samrangchi teng y satang thai hai pi ba,” napi.

⁴ Israela chengchi i Tameuh, ati cheaungkhang sa thai nai keung Areng ly kai teng y, “Nang ly huni savaichi dengdairei nangmychi i samrangchi teng y, Areng i leu thui pi:

⁵ “Kai ly kaimy i sa thai naira len parai nai haiho hawi khaileaung pri, khumichi, khaileaung pri y awm nai tawnbawichi hawi raurei kaimy sa nai ne i, huni khaileaung pri ai kaimy ngai nai teng y kapei pajau nai ne.

⁶ Khumi cheng cheaungkhangchi ai kai i miseaung Babulon samrang Nebukhadnezar i anui y tym hai nai keung ly kai ne. Kai ly daichi mawichi ai malawn py, ni i miseaung y lawm hai nai ne.

⁷ Ni i pri phra nai neng tym y ryrei ly khumi cheng cheaungkhangchi ai ni i miseaung y py, ni i chapo hawi ni i katu i miseaung y py achei hai ai. Naibaly ni i khumi cheng ly sa thai naira len nai chengchi hawi samrangchi i miseaung y achei u ai.

⁸ Na i py mani khumi cheng, ti y baly mani pri ly huni samrang i peang nai anui y awm y baly, huni khumi chengchi ai Nebukhadnezar my taphra y ryrei ly tavai ka-jeira, tahum takang hawi no kanghawichi hawimy kai ly pajeng ai.

⁹ Amang thui pachai kawp naichi, khumi kadei i phailo palau iy dawi kawp naimy mo mang i satang thui thai nai keungchi, ti y baly nangmychi amochi i leu py tangai u moh. Nichi bawibawi my py nangchi ai Babulon samrang i miseaung y awm y ai nai ang thui pi bo.

¹⁰ Nichi ly nangchi teng y ka-chawi naimy ang thui pi nai ne. Hunaibaly nangchi ly nangmychi pri i dengdairei, pri kamlora y hawi vui nai avum u ai. Kai py nangchi ai kang patheu pawn ai; nangchi ly myh kang u ai.

¹¹ Na i py mani khumi cheng ly Babulon samrang teng y tamawi aseih iy, miseaung y achei bo. Huni khumi cheng ai kai ly mychi i pri y, li hlau sa naimy awm ai nai pei ai. Hini ly kai Areng i thui nai leu ne,” napi.

¹² Kai ly Juda samrang Zedekiah teng y py, hina nai kamta amti pi teang nai ne. “Nang ly Babulon samrang i peang nai anui y tamawi aseih ba. Huni samrang hawi ni i chengchi i miseaung y awm baly tlamsa naira nga ai.

¹³ Ati mana nai y nang hawi nang i chengchi ly tavai keung y, ti y baly tahum takangra y, ti y baly no kanghawi y dei u ai mo? Babulon samrang i miseaung y awm y nai khumi cheng ly hina nai kamta lawm u ai, nanai Areng my leu pei bo.

¹⁴ Babulon samrang i miseaung y awm y ai nai, nang ai ang thui pi nai amochi i leu tangai moh. Nichi ly nang ai ang tapawp nai leu thui nai teu.

¹⁵ Areng mymy kypkyp my, huni khumichi teng y kaimy pato nai ny y leang, napi veng bo. Nichi ly mymy i amyn y ka-chawi thui u nai teu. Hunai deaungkho y Areng ly nang ai ang patheu vui ai. Nang hawi vanrei nang ai ka-chawi naimy ang thui pi nai amochi ly dei u ai,” napi.

¹⁶ Naibaly kai ly Areng i thui pi nai leu ai, pathyp pi nai keungchi hawi khumichi teng y amti pi bo. Areng my, “Achura yhm i yhmtheaung katuichi ly kra y naimy Babulon pri i dengdairei ang tym ali teang ai, nanai thui nai amochi i leu tangai u moh. Nichi ly nangchi ai ang tapawp nai teu.

¹⁷ Nichi i leu tangai u moh! Babulon samrang i miseaung y awm u; hunaibaly nangchi ly chymme naira nga u ai! Huni mary ly ati mana nai y phra seaungkhrang lawh ai mo?

¹⁸ Huni khumichi ly amo tatangchi ne iy, kai i leu nga nai keungchi ne lawh teu baly, Jerusalem mary Achura yhm hawi samrang yhmchira i awm asai rai nai yhmtheaung katuichi ai Babulon pri mang y tawn vui y ai nai, ati cheaungkhang sa thai nai keung kai, Areng teng y takeng u na sy,”

^19-20 (Babulon samrang Nebukhadnezar ly Jehojakim i chapo Juda samrang Jehojakhin hawi, Juda pri hawi Jerusalem mary i lu sa naichi ai py, Jerusalem mary i dengdairei Babulon pri mang y hawi vui nai thym khala my, daw jo nai kheupaja yhmmawm puichi, kheupaja tuikanchi hawi, anui mang i panui nairachi, Achura yhm i takhra yhmtheaung katuichi phyreichi ai daw mai nai ne.)

²¹ “Jerusalem mary Achura yhm hawi samrang i yhm y daw mai nai yhmtheaung katuichi molam y, Israela chengchi i Tameuh, ati cheaungkhang sa thai nai keung kai, Areng my leu pei nai ly tangai u.

²² Huni yhmtheaung katuichi ly Babulon mary y syn iy, hunichi ai kaimy adawn ali teang nai neng tym y ryrei ly huni mary y awm jo ai. Naibaly kai ly huni yhmtheaung katuichi ai, huni meingtym y katym hai ali teang ai. Hini ly kai Areng i thui nai leu ne,” nanai leu pei nai thui pi bo.