JEREMIA 15 - Khumi Common Language Bible

Juda khumichi i vui taham kasi

¹ Naibaly Areng my kai teng y, “Mosi hawi Samuela nini ly hini meingtym y angdo iy, kai teng y ahui kajeaung kaji lawh teu i py, hini khumichi ai kapahen ai ny y. Nichi ai kai i mei ka-niu i nai theu u pawn ai nai kaparyh veng.

² Nichi my, kaichi ly mani mang y kachei u ai mo?, nanai nang teng y ang deng u nai khala, hina nai thui pi: “Nangchi phyrei ly no kanghawi man iy dei u ai i, no-na man naira mang y chei ai! Phyrei ly tavai keung y deu u ai i, tavai atiu naira mang y chei u ai! Phyreichi ly takang theu naira y dei u ai i, takang theu naira mang y chei u ai! Phyreichi ly patiu iy langheng y hawi ai i, patiu naira avum ai naira mang y chei u ai!,” nanai kai teng y leu ang pei nai ne.

³ Nichi i tlang tleaung y ka-jeira hawi parai nai sai palyhrei katym hai ai nai, kai Areng my leu pacheang yb nai bo. Nichi ly tavai keung y dei u ai. Nichi i veuchi ai uichi my tawn ai. Huni kadei veuchi ai tavochi my patiu ai. Huni bo i nai ly mawi kasichi my cha ai.

⁴ Juda pri y Hezakia i chapo samrang Manase my peang nai thym khala, Jerusalem mary y atitichi sa nai molam y, kai ly khaileaung pri verei i khumi bawibawichi my hunichi niu khala ly kaso theu hai ai.”

⁵ Areng my, “Jerusalem mary i khumichi awi, nangchi ai ami my ang pahen ai mo? Nangchi i vui ami my paleung si ai mo? Ami nai ly lam y angdo iy, nangchi i noso satang ang deng u ai mo?

⁶ Nangchi ly kai ai khai u su bo. Nangchi ly kai ai nithun thun u bo. Kai ly kado theu nai am-yh keaung nai deaungkho y, kiu pheu iy nangchi ai kang taphra bo,” napi.

⁷ Ali y akheang nai choh ali maidym kamta nangchi ai hini pri i mary tlei tleireichira y ahei hai pawn bo. Kai i khumi nangchi hawi, nangmychi i cho chanauchi raurei, kaimy tamyh pawn ai; ati mana nai mo nabaly nangchi ly nangmychi i hawi y sa naichi khai su y nai deaungkho y ne.

⁸ Kai ly nangchi i neampachychi ai lumai lawm hai i, pangli spryh tleaung y py nawi bo. Kai ly deaungdichi ai hawi thym khala my kapadei pawn nai deaungkho y nichi i amhmchi ly vo tangam u bo. Nichi ly vaimy kaso theu u i, paleung bi, paleung mawn u nai ne.

⁹ Cho chanau leaung saryhrei dei nai i amhm ly paleung pany y na bo. Ni i kanithun kangvang ly kaveng lawm veng bo. Ni ly kangji nga naimy paleung si ngam jo nai ne. Nangchi theung i dei kamthumchi ai ly kaimy paleung ka-echi ai katleh hai ai. Hini ly kai, Areng my thui nai leu ne.

Jeremia ly Areng teng y tangam nai

¹⁰ Kai ly amo theu naira by y nai khumi lawm lawh bo ly! Kai i amhm ly kai ai hini khaileaung pri y ati mana ang tapen lawh mo? Hini pri y awm nai khumi ngiereichi hawi leu nawi, rai ai nai tla bo. Kai ly ami teng y py paisa tangka alai ai nai pei vai y. Ami teng i py alai vai y. Na i py khumi bawibawichi ly kai ai pasawi u lawh.

¹¹ Areng my, “Kai ly hawi naira nga ai nai nang ai atleu ai. Ka-jeira hawi paleung ka-mawn tym nai neng khala, nang i paleung ka-echi ly kai teng y ahui u ai,” napi.

¹² (Thui patyp ai nabaly, tosyh mang i nga nai tamo hawi kheupaja katlen nai tamo ai, ami py kadi pajau y)

¹³ Areng my kai teng y, “Kai ly pri verei y kai i khumichi sa tamang nai kamngochi molam y kapajeng ai. Nichi i nang chawn nai muku tangka, vang katengchi la pi pawn ai nai paleung ka-echi kapato ai.

¹⁴ Kai i kado theu naira ly mai hawi atawm i, angveaung jojo nai deaungkho y, kai ly kaimy i khumichi ai nichi tym vai y nai pri y, paleung ka-echi i miseaung y khai ai.

¹⁵ Huna nai khala kaimy, “Nang ly pany nai ne. Kaichi ai pany jo ly sabawm kyh ba. Kaichi ai pahyp y naimy ana nai khumichi ai, vawitheung tha teang ai nai pei kyh ba. Nichi ly kaichi ai padei ai nai neng tym nai pa-rei, neaung kham pi moh. Kaichi i tlang tleaung y mei aniu y nai ly nang deaungkho y ne, nanai pany pi jo kyh ba.

¹⁶ Nangmy leu pei nai khala y kai ly hawihai palai tangai nai ne. Nang i leu pei naichi ly kai i paleung ai kawn hai nai hawi amo theu hai naira ne. Ati cheaungkhang sa thai nai Areng Tameuh, kai ly nang i amyn apu nai ne.

¹⁷ Kai ly khumi takhrachi hawi panui iy, amo theu saw ala naira y neng pasum y ai. Nangmy pei nai kalop molam y, kai ly kaimy tlairei awm nai y, kado theu naira my kawi bo.

¹⁸ Kai ly ati mana nai y kado theu naira avum veangveang ai mo? Kai i tamo kalemchi ly hawi sa iy hawi pajau y nai mo? Ati mana nai y huni tamo kalemchi ly tamo tha y nai mo? Nang ly kani pui khala y tavo micheaung tuino kang nai kamta, kai ai paleung phra hai ai a?,” nanai takeng bo.

¹⁹ Huna nai takeng nai khala y Areng my, “Nang ly kamngo uikheih ai nabaly, nang ai kawn leaung ai. Nang py kai i miseaung lawm ali teang ai. Nang ly vang teng y nai leu katheu y naimy tahm awm nai leu katheu lawh baly, kai i amo lawm ali teang ai. Khumi mipuichi ly nang teng y vawi u teang ai. Nang ly nichi teng y chei ai nai aly ngai y leang bo.

²⁰ Nang ly huni khumichi ai amtang pajau ai nai, kai ly nang i kheupaja apai kamta lawm ai. Nichi my nang ai ang tiu u teu i py, nang ai tiu pajau ai ny y. Nang ly chymme pa-rei awm thai ai nai nang ai kry iy, kai ly nang hawi vanrei awm ai,” nanai Areng my thui nai leu ne.

²¹ Nang ai khumi hawi y naichi kiu i nai atleu iy, khrukhra hai nai khumichi kiu i py lawi hai ai.”