JEREMIA 10 - Khumi Common Language Bible

Myn ai chiu naira hawi kateng chiu naira

¹ Israela khumichi awi, Areng my pei nai leu tangai u.

² Mymy ly “Nangchi ly cheng takhrachi i reita lam y abang u moh. Kani khusangra niu nai ka-ma-rachi molam khumi cheng cheaungkhangchi ly angtheng u teu i py, nangchi ly angtheng u moh.

³ Huni khumichi i reita ly ati sai py ny y leang. Daichi theung y dengkeaung paliu iy, myn-o kawp nai keung ly seuchi hawi myn-o iy,

⁴ muku, tangkachi hawi ka-pu sa nai ne. Hunaibaly amchyh y pa-rei huni ai sengmo hawi tahen typ bo.

⁵ Hina nai mynchi ly pajawi baira i tavo pajei nai mynchi hawi atawm iy, leu py katheu kawp y. Nichi ly tako thai y nai deaungkho y, nichi ai kajeaung pi ai nai tla. Mynchi ly nangchi ai hawi nai py, hawi y nai py so pi thai y. Nangchi ly hunichi ai jei u moh,” napi.

⁶ Aw Areng, nang ka-tawm Tameuh harei py by y. Nang ly ati cheaungkhang sa thai nai keung ne. Nang i amyn ly nang parai iy phum-ang kawi angym nai ne.

⁷ Khumi cheng cheaungkhangchi i samrang lawm nai nang ai tahm khai y nai ami awm ai mo? Nang ai tahm khai ai nai ataing parai nai ne. Khumi cheng cheaungkhangchi theung i khumi kachengchi theung y py, nichi i samrangchi theung y py, nang hawi atawm nai leaungrei py by y.

⁸ Nichi bawibawi ly ka-khum hawi khumi aso y naichi ne. Dengkeaung mynchi my ly nichi ai ati amtiu naira pei pajau ai mo?

⁹ Nichi i chiu nai mynchi ly Spain pri i theu nai tangka hawi py, Upha mary i theu nai muku hawi py, palum nai deaungkho y kupe kakawpchi i lasa ne. Huni mynchi ly kupe kawp keh naichi my aneng nai kamsen jeaung ngan, kamngau ngan hawi apu pa-rei sa bo.

¹⁰ Na i py aw Areng, nang ly Tameuh tatang ne. Nang ly heng nai Tameuh, deungtasarei samrang ne. Nang i kado theu nai khala, khaileaung pri ly kaso theu bo. Khumi cheng cheaungkhangchi ly nang i kado theu nai haiho kham pajau y.

¹¹ (Nangchi khumichi awi, kani khusang hawi khaileaung so y nai tameuh ai ly kani anui i py, khaileaung salo i py, tama pawn ai, nanai nichi teng y thui pi ai nai tla.)

Areng ai palo nai khulym

¹² Areng ly sa thai nai haiho hawi khaileaung lawm hai bo. Cheng naira hawi khaileaung pri sa iy, Tau cheng naira hawi kani khusang ai kadai pha bo.

¹³ Mymy leu pei nai khala y kani khusang salo i tuichi ly katyn amsau na bo. Mymy ly khuteng taki i dengdairei, khupanymchi sau hai nai ne. Kani nai thym khala amlosadichi theu hai iy, mymy paeaung naira i alichi ai py aho hai bo.

¹⁴ Hini atitichi ai niu nai deaungkho y khumichi ly mynkym vui iy, khumi ka-khumchi lawm u bo. Kheupaja ngan thip kawp nai bawibawichi ly mychi sa nai tameuhchi ly tameuh tatang ny y nai deaungkho y kaji u bo. Ati mana nai mo nabaly mynchi ly hengra by y nai deaungkho y ne.

¹⁵ Hunichi ly atyhtyh teu iy, paso ai naira naini lawm bo. Areng ly pajeng ai nai ang jeu nai khala, hunichi taphra pawn ai.

¹⁶ Jakob i Tameuh ly mynchi kamta ny y. Mymy ly ati cheaungkhang sa nai keung ne. Israela chengchi ai mymy i khumi kypkyp lawm ai nai vawi takhra bo. Mymy i amyn ly ati cheaungkhang sa thai nai keung Areng ne.

Pri pala naira ang tym ai nai

¹⁷ Jerusalem mary i khumichi awi, nangchi ai ly paleung ka-echi my ang katanmeuh bo! Hini mary i dengdairei theu u ai nai, nangmychi i vawnsaichi pangym u.

¹⁸ Nangchi ai lijaira i lijai alyn ko nai kamta, Areng ly nangchi ai hini pri i nai, leaungrei py by y pa-rei paryh pawn ai. Nangchi ly patiu naira avum nai deaungkho y, paleung phra u ai.

¹⁹ Jerusalem mary i khumichi my, “Kaichi ly khri pa-rei patang naira avum u bo! Kaichi i tamo kalemchi ly hawi lei ai ny y. Na i py patang naira ly kham pajau ai, nanai kaichi kadawn u lawh!

²⁰ Kaichi i taichi ly anawi seaungkhrang iy, thang nai vuichi py leu pawn bo. Kaichi i cho chanau bawibawichi malawn py, kaichi teng i nai preang u pawn bo. Kaichi i taichi sa pi palai teang ai nai leaungrei py by y. Tai kanihchi jang pi ai nai khumi leaungrei py by y bo,” nanai aeu u.

²¹ Kaimy, “Achi i lu sa naichi ly khumi aso y naichi ne. Areng i lam patei nai ai hnei y. Hunai deaungkho y nichi ly tau eaung naira ngo y i, achi i chengchi ly ahei u akyhkyh nai ne.

²² Tangai u! Satang harei angym bo! Tosyh mang i cheng harei ly khri pa-rei khrukhra naira theu bo. Nichi ly Juda marychi ai khivachi aeungra, khumi angso savai tlang naira lawm hai ai,” napi.

²³ Aw Areng, amimi py amy i khym taham ly so thai y, nanai kai pany. Amimi py amy i hengra ai peang pajau y.

²⁴ Aw Areng, nang i khumichi ai thui parip kyh ba. Na i py kaichi i tlang tleaung y kado theu hai moh kyh ba. Nang i kado theu hai nai thym khala y, kaichi i tlang tleaung y khri pa-rei pajeng lawh baly, kaichi ly tama be ai bo.

²⁵ Nang ai kado theu hai iy, nang ai chiu y nai chengchi tlang tleaung y nang i kado theu naira leih pi kyh ba. Nichi ly nang i khumichi ai tleh u bo. kaichi ai py tamyh pawn iy, kaichi i pri ai py phra seaungkhrang hai bo.