JEREMIA 1 - Khumi Common Language Bible

Jeremia

¹ Hini cha-iu theung y Jeremia i thui nai leuchi abawi nai ne. Ni ly Benjamin khu, Anatho mary y awm nai pathyp pi nai keung Hilkiah i chapo ne.

² Josia i chapo Ammon ly Juda samrang y lyn nai saneng holai thomrei khala y, Areng ly Jeremia teng y leu pei nai ne.

³ Areng ly Josia i chapo samrang Jehojakim deung y py, ni teng y leu pei bi bo. Naibaly mymy ly Josia i chapo Zedekiah samrang y lyn nai saneng holai ha, pa-ngo lo khala y, Jerusalem mary i khumichi pri pala nai neng tym pa-rei, ni teng y tlen neangneang leu pei nai ne.

Jeremia ai palau nai

⁴ Areng my,

⁵ “Kai ly nang ai hengra kang pei y rai khala my vawi takhra veng bo. Nang ai tapen y rai khala my khai takhra iy khumi cheng cheaungkhangchi i amo lawm ai nai kang khai bo,” nanai kai teng y leu pei.

⁶ Naibaly kaimy, “Aw Areng, kai ly saneng theang ala nai deaungkho y, ati mana katheu ai mo, nanai pany y,” napi.

⁷ Na i py Areng my, “Nang ly saneng theang ala, nanai thui moh. Kaimy pato nai khumichi teng y nang chei iy, kai i leu pei nai ngiereichi amti pi.

⁸ Kai ly nang hawi vanrei awm iy, nang ai asa hai ai. Hunai deaungkho y nang ly nichi ai jei moh; hini ly kai, Areng i thui nai leu ne! " nanai kai teng y leu ang pei bo.

⁹ Naibaly Areng ly mymy i kiu jaha iy, kai i labeaung y ang teaung chum baly, “Tangai ba, nang i thui ai nai leu, vaimy nang ai kang pei ryp bo.

¹⁰ Khumi cheng cheaungkhangchi hawi pri cheaungkhangchi ai theih vui, panawi vui, taphra vui, nui phro vui, palum teang, ui teang thai nai sa thai naira, vaini nang ai kang pei bo,” napi.

Paleung mei y niu nai amjy nyhrei

¹¹ Areng my, “Jeremia awi, nang ly ati niu mo? " nanai deng baly kaimy, “Baden keung changpi kaniu,” napi.

¹² Huna nai khala y Areng my, “Nang i thui nai teng mang. Kai py kaimy i leu teng, nanai ajeng nai ne,” napi.

¹³ Naibaly Areng ly kai ai leu ang pei bi bo. Mymy ly “Nang ly ati takhra niu bi rai mo? " nanai angdeang. Kaimy, “Tosyh mang y tuibi kado nai laawm kaniu; huni laawm ly tokalawi mang y cheaungkai i, aliu vi nai kamta awm,” nanai kapathang.

¹⁴ Mymy ly kai teng y, “Hini pri y awm nai khumi bawibawichi tlang tleaung y tosyh mang dengdairei, patang naira tym ai.

¹⁵ Kai ly tosyh mang i khumi cheng cheaungkhangchi ai kapalau bo,” nanai Areng my leu pei nai ne. Nichi i samrangchi ly jeu iy, mychi i samrang atehra ai Jerusalem mary ka-ki hawi, mary apai katheu pa-khochi sahawi y py, Juda marychi tengpang sahawi y py, khai u ai.

¹⁶ Hina nai kamta kai ly kamngo sa tamang nai khumichi, kai ai khai su nai khumichi, tameuh takhrachi teng y mui katuichi leng patlum nai khumichi hawi, mychi i sa nai mynchi ai chiu nai khumichi ai ly kapajeng ai.

¹⁷ Nang ly vam parai naimy chei iy, huni khumichi teng y kai i thui pi nai ngiereichi thui pi. Nichi ai jei moh; nang ly nichi ai jei lawh teu baly, kai ly nang ai nichi i mo y jei hai ra ai.

^18-19 Jeremia awi, tangai ba! Hini pri y awm nai khumi bawibawichi napi nai Juda samrangchi, samrang i bangtangchi, pathyp pi nai keungchi hawi, mipuichi ly nang ai ang tiu u ai. Na i py nichi ai amtang pajau ai nai pa-rei, nang ai vaini kang sa pi ai. Nang ly amtangra mary kamta py, tamo yhmmawm hawi kheupaja angpang kamta py lawm ai. Kai ly nang hawi vanrei awm ai i, nang ai ama hai ai. Hunai deaungkho y nichi ly nang ai ang tiu pajau ai ny y. Hini ly kai Areng i thui nai leu ne, napi.