JAKOB 5 - Khumi Common Language Bible

Khumi kanangchi ai pany hai pi nai

¹ Khumi kanangchi awi, khen cham, nangchi i tlang tleaung y ngari ang tym dudu nai deaungkho y vo py vo u ly, hang py hang u lengleang.

² Nangchi i yhmtheaung ly phra be bo, nangchi i kanihchi py thaikem my kei be bo.

³ Nangchi i muku hawi tangka py ei cha be bo; huni ei cha nai ly nangmychi i sum nai sai pany hai nai ne, naibaly nangchi i tlang ai ly mai my kang nai ka-tawm ang cha ai. Nangchi ly kani kangkhym y ly yhmtheaung pateung achu lawh ly.

⁴ Khen cham, nangchi hlau choh tyh tham naichi ai tapawp nai pei y nai vang ly aeu; naibaly choh tyn naichi i aeu nai ly Mipuichi i Areng Tameuh i kano y kun bo.

⁵ Khaileaung pri y tlamsa naimy awm u iy, pasum u atyhtyh bo, tleh nai kani y ly nangchi i paleung y saw ala nai apacho u bo.

⁶ Khumi kahawi ai ly nangchi my pasum iy padei i, ni my ly nangchi ai paka y leang.

Kham tanga nai hawi chiu sa nai

⁷ Hunaibaly amjo amnauchi awi, Areng jeu y ryrei ly kham tanga pa-rei awm u. Khen cham, hlau sa nai khumi ly kani nai angchei nai hawi, nai pakhym nai kani palo y ryrei ly khaileaung i athai teng parai nai ly kham tanga pa-rei ajeng.

⁸ Nangchi py kham tanga pa-rei awm u; nangchi i paleung khaw u; Areng ly ang jeu ai nai kasa bo.

⁹ Amjo amnauchi awi, sum naira ngo y ai nai nangmychi tengtawi jo sei u reng moh; khen cham, tara chih nai keung ly katheu pa-kho ahawi y angdo ryhryh bo.

¹⁰ Amjo amnauchi awi, Areng i amyn y leu thui nai amochi i patang nai sai hawi, kham pajau nai sai ly dawn pata u.

¹¹ Khen cham achi ly kham pajau tanga nai keungchi ly tahm hawi, napi. Joba kham pajau nai sai py nangchi thai u bo, naibaly Areng i kangkhym y sa nai sai py nangchi niu u bo, Areng ly pahen naira hawi neaung hawi naira my kawi.

¹² Na i py amjo amnauchi awi, nangchi ly ati mo sa i py vaineng abeu u reng moh, kani tauh i mo, khaileaung tauh i mo, ati takhra amyn y py tauh iy vaineng abeu u reng moh: na i py nangchi i “Ne,” nanai ly “Ne nai” ne sy, “Ny y,” nanai ly “Ny y nai” ne sy: ti y baly nangchi sum naira ngo lawh na.

¹³ Nangchi theung y ami mo patang nai awm a? Chiu so sy. ami mo amo theu nai awm a? Palo nai khulym thui sy.

¹⁴ Nangchi theung y ami mo no nai awm a? Palau takhra kamkawm miteaung kehchi ai palau sy; naibaly nichi my ly Areng i amyn y mymy i tlang tleaung y asi tui paju iy chiu so pi u sy;

¹⁵ naibaly ym nai chiu sa nai ly no nai ai hawihai iy Areng my ly ni ai pathau ai; naibaly mymy ly atiti kamngo sa lawh baly pahen pi ai.

¹⁶ Hunaibaly no hawi ang sa pi thai ai nai nangchi i kamngo ly mang mang ahui u ly, mang mang py chiu aso u. Khumi kahawi i chiu sa nai ly khrikhri pa-rei atiti sa thai.

¹⁷ Elija ly achi ka-tawm khumi teang teu, mymy ly kani nai y ai nai hawihai palai chiu sa pathyp i, saneng saneng thomrei, lo lo tariurei khaileaung y kani nai y bo.

¹⁸ Naibaly mymy ly chiu sa teang i kani my kani nai hai iy, khaileaung my athai patheu bo.

¹⁹ Kai i amjo amnauchi awi, nangchi theung y ami py leu meitang i dengdairei tamang iy, ami my mo ni ai pahawi ali hai sy;

²⁰ mymy ly khumi kamngo ai lam tamang naira i dengdairei pahawi ali hai nai deaungkho y, dei ai naira i dengdairei phailo ai ly paheng ai, naibaly kamngo neangneang ai py khiu ai, nanai pany sy.