I THESALONIKA 5 - Khumi Common Language Bible

Areng i jeu ai nai molam y angveirym nai

¹ Na i py amjo amnauchi awi, neng hawi kani molam nanai ly nangchi ai sai py tajiu pi ai nai aly by y leang.

² Areng i kani ly vum y kangviu kamta ly tym ai, nanai ly nangmychi kypkyp my chai pyn pa-rei my pany u veng bo.

³ Khumichi ly, “Awm nem naira hawi chymme naira awm bo,” na naichi i thui nai thym khyp khala y ly, neampachy i chanau tapen ai nai no nai kamta ly tlenrei khyh my tama ai naira ly nichi i tlang tleaung y tym ai i, tleaung ai naira pipi ngo y ai.

⁴ Na i py amjo amnauchi awi, huni kani ly kangviu kamta nangchi ai ang kai ai nai kaveng y awm u y leang bo;

⁵ nangchi ly kangvang i chanauchi hawi kanithun i chanauchi ne bebe veng: achi ly vum i khumi hawi kaveng i khumi ny y leang.

⁶ Hunai deaungkho y khumi takhrachi i kamta ly i u ngym moh sina ba, amkym iy atyp u sina.

⁷ I naichi ly vum y i reng nai ne; mhm pavui naichi py vum y pavui reng nai ne.

⁸ Na i py achi ly kanithun i khumi ne nai deaungkho y ym naira hawi tamen naira khupui ly adang iy paheng naira nga ai nai athang khai naira ly lukym y teaung iy, atyp u sina.

⁹ Tameuh my kado theu naira ny y naimy, achi i Areng Isu Krista i saho y paheng naira nga lawh ai nai achi ai ang khai rym nai teu;

¹⁰ achi ly i iy py, anglaw iy py achi ly mymy hawi vanrei heng thai ai nai, achi i vui y ang dei pi.

¹¹ Hunai deaungkho y nangchi i sa reng nai kamta ly apachei u leungtang iy akhaw hai u.

Kangkhym i leu pei nai hawi kawn nai leuchi

¹² Na i py amjo amnauchi awi, nangchi theung y sa akawm nai hawi, Areng y ly krykeung y awm nai hawi, nangchi ai parip nai keungchi ai ly kawn u i,

¹³ nichi i atiti sa nai deaungkho y tamen iy khri pa-rei tahm khai ai nai kang takeng.

¹⁴ Nangmychi tengtawi aly nai awm u. Naibaly amjo amnauchi awi, reita ny y nai kamta awm naichi ai ly parip u ly, vam y naichi ai pachei u ly, ham y naichi ai sabawm u ly, bawibawichi teng y amnym naimy awm u.

¹⁵ Ami i hawi y sa nai py hawi y sa nai vawitheung tha y ai nai amkym u; nangchi i atiti sa pi leungtang naira y hawi, khumi bawibawichi i tlang tleaung y sa pi naira y py hawi nai ngierei ai phai hui u jojo.

¹⁶ Kawn u jojo; anawn y naimy chiu so u ly;

¹⁷ cheaungkhangra y kawn nai leu thui u jojo:

¹⁸ huni ly nangmychi molam y Krista Isu y ly Tameuh i kangai ne khyp veng.

¹⁹ Phailo ai ly taphom u moh;

²⁰ leu thui nai ai ly tahm khai y nai awm u moh;

²¹ cheaungkhangra y phai cham u; hawi nai ngiere ly patawm u ly;

²² hawi y nai bawibawira y ly amsym u.

²³ Naibaly aly nai Tameuh kypkyp my nangchi ai angym pa-rei pachai sy; naibaly nangchi i phailo hawi, paleung hawi, tlang ai ly achi i Areng Isu Krista ang jeu nai khala y ly cheh ai nai by y pa-rei my bom verei chymme naimy awm sy.

²⁴ Nangchi ai ang palau nai keung ly ka-ym awm i, ang sa pi khyp ai.

²⁵ Amjo amnauchi awi, kaichi i vui chiu so pi kyh.

²⁶ Amjo amnau bawibawichi ai ly apachawm nai kachai y kawn u.

²⁷ Hini cha ly amjo amnau bawibawichi teng y phain ai nai Areng y kang takeng.

²⁸ Achi i Areng Isu Krista i pahenra ly nangchi teng y awm sy.