I PETERA 5 - Khumi Common Language Bible

Tameuh i Beram kanghu

¹ Hunaibaly kai, miteaung keh ne teang nai hawi, Krista i patang naira niu nai hawi, amteng ai nai nang parai naira phy nga nai khumi ly nangchi theung y miteaung kehchi ai kang pachei:

² Nangchi theung y awm nai Tameuh i beram kanghu ai ly kry u: sa ai nai tla nai deaungkho y ny y naimy Tameuh i ngai nai kamta ngai parai nai tarawi y kry u; chai y nai kamran nga ai nai ngai nai deaungkho y ny y naimy, paleung ngai parai naimy kry u;

³ nangchi teng y au naichi i tlang tleaung y atho sa nai kamta ny y naimy, beram kanghu i vui y amtiu naira apalawn u.

⁴ Naibaly Beram Typ nai Keung kalen keh my ly amteng nai khala y ly nangchi ly rawm thai y nai nang parai nai areng lukhym nga u ai.

⁵ Hunai kamta ly nangchi cheangthli nangchi awi, miteaung kehchi teng y aau u. Ne, nangchi bawibawi ly asabawm u leungtang ai nai leu anui naira amthyp u; Tameuh my am-e naichi ai ly paka iy, tahm apanem naichi ai ly pahenra nga hai lawh reng.

⁶ Hunai deaungkho y neng khyp nai khala y ly nangchi ai tahm ang pasang thai ai nai, Tameuh i ham parai nai kiu anui y apanem u ly;

⁷ mymy ly nangchi ai dawn hai reng nai deaungkho y nangchi i paleung bi naira bawibawi ly mymy tleaung y amtei u bebe.

⁸ Amkym u ly, atyp u; nangchi i paleung ka-e diabola ly pa-u reng nai khrangsi takai kamta ly ang cha thai ai naira hau nai ami kalaka na veng;

⁹ khaileaung pri y awm nai ngamjo ngamnauchi i tlang tleaung y hunai kamta patang naira ly tym reng nai ne, nanai pany u iy, khaw parai pa-rei ym iy ni ai tiu u.

¹⁰ Naibaly pahenra bawibawi i sangum Tameuh, mymy i deungtasarei nang parai naira nga ai nai Krista y ang palau nai keung kypkyp my ly, nangchi kra y nai sala chy patang nai bo y nangchi ai angym py angym hai ai, khaw py khaw hai ai, ham py ham hai ai mang.

¹¹ Mymy teng y ly peang naira ly deungtasarei awm sy. Amen.

Kangkhym i kawn nai leuchi

¹² Achi i amjo amnau ka-ym awm parai nai, athang kakhai nai Silvana i kiu y ly nangchi ai pachei ai nai hawi, huni ly Tameuh i pahenra tatang ne, nanai pany hai ai nai py nangchi teng y cha kadawi pe chy katajiu nai ne: hunira y ly kahawi angdo u.

¹³ Nangmychi kamta vawi nai Babulon avang y awm nai neampachy hawi, kai i chapo Marka py kawn nai leu thui pi. Tamen nai pachawm naira akawn u.

¹⁴ Nangchi theung y Krista y awm nai ngiereichi teng y awmnem naira awm sy.