I PETERA 4 - Khumi Common Language Bible

Heng nai sai takhra nai

¹ Hunaibaly Krista ly tlang mang y patang nai deaungkho y nangchi py hunai kamta paleung ly hai kamta teaung u teang; tlang mang y patang nai khumi ai ly kamngo mang y anawn hai veng nai bo;

² hunaibaly vai i dengdairei nangchi ly tlang mang y awm nai sala ryrei ly khumi i ngai phi teng y naira y ny y naimy, Tameuh i ngai naira y awm u ai bo.

³ Cheng Takhrachi i kangai sa ai nai hawi paleaung naira y hawi, tlang i ngai phi teng y naira y hawi, pavui naira y hawi, mhm nei khrukhra naira y hawi, mhm nei ryry naira y hawi, myn y chiu nai kamso awm parai naira y py tako ai nai, jangni i neng ly hawi khyp bo;

⁴ naibaly nangchi ly hunira y mymychi i saw ala nai kamta so teang y lawh nai ly nichi rengrang tlai napi iy, nangchi ai ang thui tamawn lawn nai ne;

⁵ nichi ly kanghengchi hawi kadeichi ai tara chih ai nai angveirym nai keung teng y mymychi i satang thui pi ai nai tla.

⁶ Hini deaungkho y chy bo nichi ai ly tlang mang y khumichi kamta tara chih nai teu iy py, phailo mang y ly Tameuh kamta heng u thai ai nai, kadeichi teng y Satang Kahawi thui pi nai ly. i

Tameuh i pahen nai ai kry nai keungch

⁷ Na i py atiti bawibawi i tem naira ly kasa bo, hunai deaungkho y nangchi ly chiu sa thai ai nai paleung kateng awm iy amkym u;

⁸ atiti bawibawi tleaung y py hawihai palai atamen u leungtang: tamen naira my ly kamngo neangneang ai khiu lawh veng:

⁹ jo sei y naimy angvynchi ai kawn u leungtang:

¹⁰ khumi leaung leaungrei ly sa thai naira nga nai kamta, Tameuh i pahenra amjy cheaungkhang ai kry nai keungchi kamta nangmychi tengtawi akry u leungtang;

¹¹ khumi ami py leu thui baly, Tameuh i leu kamta thui sy; khumi ami py sabawm baly Tameuh i ham naira ang pei nai kamta so sy; hunaibaly Isu Krista deaungkho y Tameuh ai ly ati cheaungkhangra y palo nai awm thai ai: nang parai naira hawi peang naira ly deungtasarei mymy i ne. Amen.

Kristianchi avum nai ngari kamtang

¹² Amjo amnau ngai parai naichi awi, nangmychi ai cham ai nai, nangchi i tlang tleaung y tym nai, nangchi theung y awm nai mai kamta cham naira ly rengrang tlai, nanai dawn u moh:

¹³ huni ny y naimy nangchi ly Krista i patang naira y patang ahawi nai keungchi lawn nai deaungkho y kawn u: hunaibaly mymy i nang parai naira amteng nai khala y nangchi ly amo theu parai naimy kawn u teang thai ai.

¹⁴ Krista i amyn deaungkho y nangchi ai ang jo nai ne baly nangchi taham hawi; ati mana nai mo nabaly nang parai nai Phailo hawi Tameuh i Phailo ly nangchi i tlang tleaung y awm.

¹⁵ Na i py nangchi theung i ami py kasi nga nai keung mo, paviu nai khumi mo, hawi y sa nai khumi mo, khumi takhrachi i atiti sa naira y pacheang rumrang nai keung ne nai deaungkho y mo patang moh sy;

¹⁶ na i py Kristian ne nai deaungkho y patang nai ne baly, kaji moh sy; huni i amyn deaungkho y Tameuh ai phai palo sy.

¹⁷ Tara chih ai nai ly Tameuh i dengtheungchi theung y amteaung ai neng veng bo; naibaly achi teng y malawn py amteaung man baly, Tameuh i Satang Kahawi patawm y naichi i tem naira ly mana tanrei awm ai mo?

¹⁸ Naibaly khumi kahawi malawn py heng naira nga e ei khyh baly, Tameuh ai tahm khai y nai khumi hawi khumi kamngo ly ma mang y amteng ai mo?

¹⁹ Hunai deaungkho y Tameuh i avo hai nai kamta patang naichi ly atiti kahawi sa iy nichi i phailo ai ly Sa nai Keung ka-ym awm parai nai teng y au u sy.