I PETERA 1 - Khumi Common Language Bible

¹ Petera, Isu Krista i amtaw thau nai my ly, Ponto pri y hawi, Kalatia pri y hawi, kapadokia pri y hawi, Asia pri y hawi,

² Bithunia pri y py ahei nai, leu tangai ai nai hawi Isu Krista i thi hei nai nga ai nai Phailo i khai takhra nai hawi, Ampo Tameuh i pany rym nai kamta vawi naichi teng y ly; Nangchi i tlang tleaung y pahenra hawi awmnem naira py peung hai dudu nai tym sy.

Athang khaira kangheng

³ Achi i Areng Isu Krista i Tameuh hawi Ampo ai ly palo nai awm sy. Mymy i khri pa-rei pahen nai reita kamta, kadeichi theung i dengdairei Isu Krista angthau bi nai deaungkho y athang khai naira kangheng hawi,

⁴ mawn thai y nai yhmtheaung kamtym, anyng akau y nai, rawm thai y nai kani pri mang y nangchi i vui khai pi nai py nga ai nai achi ai ang tapen hai bi bo;

⁵ nangchi ly kangkhym kangtem i neng y amteng ai nai sa rym nai paheng naira nga ai nai, ym naira deaungkho y Tameuh i sa thai naira y nangchi ai ang typ nai ne.

⁶ Nangchi ly huni naira y khri pa-rei amo theu nai ne; ne mang ly mai y cham reng nai phra thai nai muku tleaung y teng keh nai nangchi i ym naira ai cham nai ly,

⁷ Isu Krista amteng nai khala y ly palo naira hawi, nang parai naira hawi, tahm asang naira py lawn thai ai nai, kra y nai sala y parawi naira cheaungkhang deaungkho y nangchi ly paleung mawn u rai.

⁸ Nangchi ly mymy ai niu vai y iy py tamen u bo; nangchi ly mymy ai niu vai y iy py ym u iy kawn naira thui pajau y nai hawi nang parai naimy khri pa-rei amo theu u reng;

⁹ ati mana nai mo nabaly nangchi i ym naira deaungkho y nangchi i phailo ai paheng naira nga u nai ne.

¹⁰ Nangchi i tlang tleaung y pahenra tym ai nai leu ang thui pi rym nai amochi ly huni paheng naira satang hawihai palai dawn py dawn, hau py hau:

¹¹ mymychi theung y awm nai Krista i Phailo my ly Krista i patang ai nairachi hawi, huni bo y nang parai naira awm ai naichi satang ly ang pany hai rym nai thym khala y ly, mani neng y mo, mani ka-tawm neng mo ang pany hai, nanai nichi ly hau u reng.

¹² Naibaly nichi ly amychi i vui ny y naimy, nangmychi i vui y atiti sa u lawh veng, nanai nichi teng y amteng hai nai bo; huni satang ly kani pri mang i dengdairei pato nai Phailo Kachai my sabawm nai, Satang Kahawi ang thui pi nai keungchi ly vai nangchi ai thui pi bo; huni atitichi ai ly kani pri i amtaw thau naichi ly bih ai nai ngai.

Khumi kachaichi lawn ai nai

¹³ Hunai deaungkho y nangchi i paleung akry nai atyp u ly, Isu Krista amteng nai khala y ly nangchi ai nga hai ai nai pahenra mang y angym pa-rei athang khai u jojo.

¹⁴ Leu tangai nai chanauchi kamta ly, nangchi i pany y nai thym khala i jangni y nangchi i tlang i ngai phi teng y nai kamta awm u moh;

¹⁵ nangchi ai ang palau nai keung i chai nai kamta, nangchi py amhi amtlau u nai bawibawi ra y chai nai awm u;

¹⁶ ati mana nai mo nabaly, “Kai ly kachai ne nai deaungkho y nangchi py kachai awm ai nai tla,” nanai tajiu nai awm chy bo.

¹⁷ Naibaly patle naira by y naimy, khumi leaung leaungrei i kalop sa nai kamta tara chih nai keung ai ly Ampo kamta palau u baly, hi y ni awm u nai sala y ly jei naimy awm u;

¹⁸ nangchi i amsi sangumchi i pei pateang nai, nangchi i ati sai py ny y nai reita i dengdairei ly atiti mawn thai nai amjychi, tangka hawi muku y ny y naimy,

¹⁹ beram cho meimai cheh ai by y nai hawi anyng akau y nai kamta, Krista i thi vang teng parai nai hawi nangchi ai atleu nai ne, nanai ly pany u.

²⁰ Ni ai ly khaileaung palum y rai khala y khai rym nai awm khypkhyp nai bo, na i py kangkhym kangtem y ly nangmychi deaungkho y mymy ai amteng hai bo;

²¹ mymy deaungkho y ni ai kadeichi theung i dengdairei pathau nai hawi, nang parai naira pei nai keung Tameuh ai nangchi ly ym nai ne; hunaibaly nangchi i ym naira hawi athang khai naira ly Tameuh mang y awm bo.

²² Amjo amnauchi ai tamen tatang ai nai leu meitang patawm u iy, nangchi i phailo ai chai hai u chum nai deaungkho y paleung y hawihai palai atamen u leungtang:

²³ ti phra thai nai ny y naimy, Tameuh i heng jojo nai hawi awm jojo nai leu y ly ti phra thai y naira y kangtha tapen nai lawn u bo.

²⁴ “Khumi bawibawichi ly acha kangheng kamta ne, Huni i apu nai sai ly acha pau kamta ne. Acha kangheng ly jei iy, Pau ly tla reng,

²⁵ Areng i leu naini deungtasarei awm jo nai ne,” Naibaly nangchi teng y Satang Kahawi ang thui pi nai leu ly huni ne.