I KORINTH 7 - Khumi Common Language Bible

Apom nai kahm

¹ Naibaly vai ly nangchi i atiti tajiu nai huni satang ly.

² Neampacho i vui ly neampachy ai nam y baly hawi. Na i py angai naira awm reng nai deaungkho y neampcho ly amy i vui kypkyp aju lo bawibawi sy, naibaly neampachy py amy i vui kypkyp juvo nang bawibawi sy.

³ Juvo my ly mymy i aju teng y ni i nga ai avo nai ly pei sy; hunai kamta teang aju my py juvo teng y pei teang sy.

⁴ Aju ly mymy i tlang y apeang y leang, juvo my peang lawh nai ne; hunai kamta teang juvo py mymy i tlang y apeang y leang, mymy i aju my peang lawh nai ne.

⁵ Chiu sa ai nai apei hawi thai ai nai hawi, amkawm hawi bi thai ai nai, kra y nai sala chy i vui y avo na hawi mei nai ny y baly, apei y ai nai so moh, ti y baly amkym pajau y nai deaungkho y Setan my nangni ai parawi lawh na.

⁶ Na i py huni ly kang thui pi nai teu, leu pei nai ny y leang.

⁷ Na i py khumi bawibawi ly kaimy kamta khyp awm bebe i khyly kai i ngai nai ne. Ne mang ly khumi leaung leaungrei ly Tameuh teng i dengdairei atiti sa thai naira pei nai, leaungrei ly hinai kamta, leaungrei ly hunai kamta amy i nga nai awm bawibawi.

⁸ Na i py kai ly apom vai y naichi hawi neampachy lumaichi teng y ly hina nai kang napi; kaimy kamta awm i khyly mychi i vui hawi khyp.

⁹ Na i py amkym pajau ai naira by y baly apom u sy; paleaung ai nai tleaung y ly apom ai nai hawi keh.

¹⁰ Naibaly apom nai angchichi teng y leu kang pei (kai i pei nai ny y leang, Areng i pei nai teu), aju ly my i juvo hawi amprei moh sy;

¹¹ amprei makho baly juvo nang y naimy awm tlam tlam sy, ti y baly mymy i juvo hawi aly teang sy. Naibaly juvo ly my i aju ai khai moh sy.

¹² Na i py khumi takhraichi teng y ly Areng my ny y naimy kaimy thui pi nai ne: amjo amnau ami py aju ly ym y nai ne iy mymy ly ni teng y awm jo ai nai avo nabaly, juvo ly mymy ai khai moh sy.

¹³ Neampachy py juvo ly ym y nai ne iy juvo ly ni teng y awm ai nai avo nabaly, aju ly ni ai khai moh sy.

¹⁴ Juvo ym y nai ly aju i saho y chai hai bo; aju ym y nai py juvo i saho y chai hai teang; huna nai ny y baly nangchi i chanauchi ly chai ai ny y, na i py nichi ly chai jo mang.

¹⁵ Na i py ym y nai khumi ly akhai saly akhai tlam tlam sy, huna naira y ly amjo amnau neampacho ai mo, neampachy ai mo kam nai ny y leang; na i py Tameuh ly achi ai aly naira y ang palau nai ne.

¹⁶ Aw aju awi, nang i juvo ai ly paheng ai mo paheng y ai mo nang ly mana pany mo? Aw juvo awi, nang i aju ai ly paheng ai mo paheng y ai mo nang ly mana pany mo?

Tameuh my vawi takhra nai saho y heng nai

¹⁷ Ati py ne sy, Areng ly khumi leaung leaungrei teng y paji bawibawi nai kamta hawi, Tameuh my khumi leaung leaungrei ai palau bawibawi nai kamta awm sy. Hunai kamta palau takhra kamkawm bawibawi y leu kapei reng.

¹⁸ Ami ai py lengkhym takip nai bo y palau nai awm a? Mymy ly lengkhym takip y nai khumi lawn moh sy. Ami ai py lengkhym takip y nai palau nai awm a? Mymy ly lengkhym takip moh sy.

¹⁹ Lengkhym takip nai ly ati sai py ny y leang; lengkhym takip y nai py ati sai py ny y leang; Tameuh i leu pei naichi patawm ai nai harei awm khyh.

²⁰ Khumi leaung leaungrei ai palau nai thym khala y nga naira y ly awm jojo sy.

²¹ Nang ly miseaung y awm nai thym khala y ang palau nai ly ne a? Huni ly dawn y han, na i py nang ly alaw thai nai ka-vo awm baly theu.

²² Miseaung y awm nai thym khala y Areng y palau nai ly Areng i miseaung alaw nai ne; hunai kamta khyp teang miseaung alaw nai thym khala y palau nai ly Krista i miseaung ne.

²³ Nangchi ai ly vang y ang van nai bo; khumichi teng y miseaung y achei reng moh.

²⁴ Amjo amnauchi awi, khumi leaung leaungrei ai palau nai thym khala y nga naira y ly Tameuh teng y awm jojo sy.

Yhmtheaung so y nai hawi neampachy lumaichi kahm

²⁵ Naibaly anglo kachai molam leu ly kai ly Areng i leu pei nai by y leang; na i py ka-ym awm naimy awm ai nai Areng teng i dengdairei tamen naira kanga nai deaungkho y kai i dawn nai sai kang thui pi ai.

²⁶ Hunaibaly vai dymkhawn i kamtang awm nai deaungkho y hinai kamta sa ai nai avo, nanai kadawn; neampacho ly mymy i awm nai kamta awm jo ai nai hawi.

²⁷ Nang ai ly aju hawi kawm tabom nai ne a? Su ai naira hau moh. Nang ly aju by y a? Aju hau moh.

²⁸ Na i py nang ly aju la baly nangmy kamngo tlo y leang mang; anglo kachai py juvo nang baly mymy ly kamngo tlo y leang mang. Na i py huna nai khumichi ly tlang y ngari patang ai; naibaly kai ly patang hai y ai nai kang ngai hai.

²⁹ Na i py amjo amnauchi awi, hina nai kang napi, neng ly dawi hai nai ne. Hunai deaungkho y vai i dengdairei aju awm naichi ly by y nai kamta awm u sy;

³⁰ vo naichi ly vo y nai kamta awm u sy, kawn naichi ly kawn y nai kamta awm u sy, van naichi ly vawnsai by y nai kamta awm u sy,

³¹ khaileaung pri y teaung naichi ly teaung u ala y nai kamta awm u sy: ati mana nai mo nabaly hini khaileaung pri i awm nai reita ly tama dudu bo he.

³² Na i py nangchi ly paleung bi naira awm y ai nai kangai. Aju by y nai khumi ly Areng ai kawn hai thai ai nai sai dawn nai, Areng mang y atiti dawn nai nawi.

³³ Aju awn nai khumi ly aju ai kawn hai thai ai nai sai dawn nai, khaileaung pri mang y atiti dawn nai nawi.

³⁴ Naibaly juvo awm nai neampachy hawi anglo kachai hawi ly atawm y leang. Juvo by y nai neampachy ly mymy i tlang hawi phailo y ly chai parai naimy awm thai ai nai, Areng mang y atiti dawn nai nawi: na i py juvo awm nai neampachy ly juvo ai kawn hai thai ai nai sai dawn nai, khaileaung pri mang y atiti dawn nai nawi.

³⁵ Naibaly huni ly nangmychi i chawn ai naira kang thui pi nai ne; vuinawn y kang thang thai ai nai kang thui pi nai ny y leang; awm nai reita apu khyp nai ryrei awm u thai ai nai hawi, Areng i kalop ly khrukhra y naimy sa u thai ai nai py kang thui pi nai teu.

³⁶ Na i py ami py mymy i chaniu anglo kachai i tlang tleaung y sa nai sai teng y, nanai athang khai baly, ni ly hawi thym nai ne iy aly aeang baly, mymy ly mymy i ngai nai so sy, mymy ly kamngo tlo y leang; apom hawi sy.

³⁷ Na i py paleung khaw parai naimy apu iy aly aeang ti y naimy, mymy i ngai nai ly sa jo thai ai nai, mymy i chaniu anglo kachai ai kry jo ai nai paleung theung y tau cheng nai keung ly mymy i sa nai ly hawi.

³⁸ Hunaibaly mymy i chaniu anglo kaichi ai juvo nang hai nai keung i sa nai sai hawi: na i py juvo nang hai y nai keung i sa nai ly hawi kyh.

³⁹ Aju ly mymy i juvo heng nai sala ryrei ly kawm tabom nai ne; na i py juvo dei nai bo y ly mymy i ngai nai ngierei apom pajau, na i py Areng ai ym nai khumi ai ne ai nai tla.

⁴⁰ Na i py kai i dawn nai ly mymy ly mymy i awm nai kamta awm jo baly hawi kyh ai; kai py Tameuh i Phailo kanga teang nai athang awm.