I KORINTH 6 - Khumi Common Language Bible

Kristian amjo amnau tengtawi ajo athui nai

¹ Nangchi theung y ami py khumi takhra i tlang tleaung y atiti leu hawi y nai awm iy khyly, khumi kachaichi i mo y tym hai y naimy khumi hawi y naichi i mo y tym hai u vam ai a?

² Ti y baly khumi kachaichi ly khaileaung pri ai chih ai nai pany u y nai sai a? Naibaly nangchi ly khaileaung pri ai malawn py chih ai nabaly atiti theang keh naichi ai py chih ai nai ataing y a?

³ Vai heng nai sala chy y awm nai leu khyh ny y, achi ly kani pri i amtaw thau naichi ai malawn py chih ai, nanai pany u y nai sai a?

⁴ Hunaibaly nangchi ly vai heng nai sala y awm nai saichi chih ai nai awm baly, palau takhra kamkawmchi i mei ka-niu y tahm anem keh naichi my chih ai nai khai u lawh a?

⁵ Nangchi ai kangji kang pei nai kathui nai ne. Amjo amnau sala y leu atlym hai pajau nai khumi kacheng leaungrei py nangchi theung y ngo u pajau y ngaw khyh,

⁶ amjo amnau my amjo amnau ai tara chih naira y tym hai lawh be, ym y naichi i mo y ne vui bi rai.

⁷ Ne, hini nangchi i hawi naira patawm u angym y naira harei ne ryp bo, nangchi tengtawi aseu nai ly! Ati mana nai teng y parai nai sa naira y ly kham u y lawh mo? Ati mana nai tapawp naira y ly kham u y lawh mo?

⁸ Ne, na i py nangmychi kypkyp my hawi y nai py sa, tapawp py tapawp: ne, ngamjo ngamnauchi ai raurei.

⁹ Naibaly khumi hawi y naichi ly Tameuh i pri amtym y leang, nanai pany u y nai sai a? Tapawp naira y awm u reng moh; angai naichi mo, myn y chiu naichi mo, pajang sa naichi mo, paleaung naichi mo, neampacho tengtawi paleaung naichi mo,

¹⁰ paviu naichi mo, paleung no naichi mo, pavui naichi mo, ami mi ai jo naichi mo, um paviu naichi mo ly Tameuh i pri amtym ai ny y leang.

¹¹ Naibaly nangchi phyreichi ly jangni y huna nai khumi ne chy bo; na i py nangchi ly Areng Isu Krista i amyn y hawi, achi i Tameuh i Phailo y py amju bo, nangchi ai ly pachai bo, nangchi ly eaung naira nga bo.

Nangchi i tlang ai Tameuh i nang parai nai vui teaung u

¹² Kai i vui ati cheaungkhang sa ngau, na i py ati cheaungkhang sa ai nai avo y leang; kai i vui ati cheaungkhang sa ngau, na i py atiti miseaung y py ka-pei y leang.

¹³ Cha ai naichi ly kajeu i vui ne, kajeu ly cha ai naichi i vui ne; na i py Tameuh my huni ai py nichi ai py tama hai ai. naibaly tlang ly angai ai naira i vui ny y leang, Areng i vui teu; Areng py tlang i vui ne.

¹⁴ Naibaly Tameuh my Areng ai ly pathau i achi ai py mymy i sa thai naira my pathau teang ai.

¹⁵ Nangchi i tlang ly Krista i kangprei ne, nanai nangchi pany y nai sai a? Krista i kangprei ly la pi iy bima kangprei kapalawn ai a? Huna tanrei kaau ly tym moh sy.

¹⁶ Naibaly bima hawi amtawm nai khumi ly mymy hawi bomrei ne, nanai nangchi pany y nai sai a? Ni my ly, “Nini leaung nyhrei ly tlang bomrei lawn ai bo,” napi be.

¹⁷ Na i py Areng hawi amtawm nai ly mymy hawi phailo bomrei ne.

¹⁸ Angai naira ai ly angpreng veng. Khumi i kamngo sa nai cheaungkhang ly tlang i angam mang y awm; angai nai ly my i ngan khypkhyp tleaung y kamngo sa nai ne.

¹⁹ Naibaly nangchi theung y awm nai, Tameuh teng i dengdairei nga nai Phailo Kachai i awm naira ly nangchi i tlang ne, nanai nangchi pany y nai sai a?

²⁰ Nangchi ly nangmychi i py ny y leang, nangchi ai ly vang y ang van nai ne; hunai deaungkho y nangchi i tlang y ly Tameuh ai palo u.