I KORINTH 16 - Khumi Common Language Bible

Kristian tengtawi i vui khai achu tangka

¹ Naibaly khumi kachaichi i vui khai achu nai leu ly, Kalatia pri i palau takhra kamkawmchi teng y leu kapei nai kamta nangchi py so u teang.

² Kai kang jeu nai khala y khai achu nai cheaung nai ly awm y ai nai, kani saryhrei angchei i kani y ly nangchi khumi leaung leaungrei amtheaung naira nga u reng nai kamta khai u achu bawibawi.

³ Kai kang tym khala y nangchi i avo napi nai cha syn nai ngiereichi ai ly nangchi i pahen nai atiti pei nai ly Jerusalem avang y tha ai nai kapato ai.

⁴ naibaly kai py kachei ai nai avo baly nichi ly kai hawi vanrei chei ai.

Pawla i paran nai

⁵ Naibaly kai ly Makedonia pri tako prei nai bo y ly nangchi teng y kang jeu ai; Makodonia pri katako prei tanga ai nai bo.

⁶ Nangchi teng y naini kang awm neaung lym ai ngawi khyh, kaseih jeungrei ne lym ai, ma mang y py kai i chei ai naira tleirei y nangchi ly kai ai pavum thai ai nai.

⁷ Ati mana nai mo nabaly vai katako nai tarawi y nangchi ai niu de nai khyh ly kangai y leang; Areng my avo hai baly nangchi teng y kra kyh awm ai nai athang kakhai.

⁸ Na i py kai ly Ephesi avang y Pentekost tym pa-rei kaawm jo ai;

⁹ ati mana nai mo nabaly katheu pa-kho kau parai nai hawi chawn parai naimy kai i vui am-eaung lawh, naibaly ang tiu nai keungchi py neangneang awm.

¹⁰ Naibaly Timothei ang tym baly mymy ly nangchi teng y jei kaji y naimy awm ai nai amkym u; mymy ly kai i sa nai kamta ly Areng i kalop sa teang;

¹¹ hunai deaungkho y ami py mymy ai tahm khai y nai awm moh sy; kai teng y ang jeu thai ai nai mymy ai paleung awmnem naimy phai pavum u: kai ly amjo amnauchi hawi vanrei mymy ai niu ai nai athang khai.

¹² Na i py achi i amjo amnau Apolo i molam ly, amjo amnauchi hawi vanrei nangchi teng y ang jeu ai nai katakeng, na i py vai ly mymy ly jeu ngai y leang rai; na i py avo nai khala y ly ang jeu ai.

Kangkhym i taviu nai leu

¹³ Atyp u ly, ym naira y ly khaw pa-rei angdo u, vam u ly., ham parai naimy awm u.

¹⁴ Nangchi i sa nai ngierei ly tamen naira y sa nai ne bebe sy.

¹⁵ Amjo amnauchi awi, Stephanachi dengtheung ly Akaia pri i ym naichi theung y ym man naichi ne i, khumi kachaichi ai kry ai nai apei u bo, nanai nangchi pany;

¹⁶ hunai kamta khumichi teng y hawi, kalop sabawm nai hawi, sa akawm nai ngiereichi teng y py aau u ai nai kang takeng.

¹⁷ Naibaly nangchi by y nai py amny y nai ang sa nai deaungkho y, kai ly Stephana hawi Phawrtunata hawi, Akaiaka py nichi ang jeu naichi ai ly kakawn.

¹⁸ Nichi ly kai i phailo hawi nangchi i phailo ai py amcheng hai; hunai deaungkho y nangchi ly hunai kamta khumichi ai ly kawn u.

¹⁹ Asia pri i palau takhra kamkawmchi my nangchi ai kawn nai leu ang thui pi mang. Akuila nini Priskila hawi, nini i yhm y palau takhra kamkawm achu naichi py Areng y nangchi ai kawn nai leu ang thui pi mang.

²⁰ Amjo amnau bawibawichi my kawn nai leu ang thui pi mang. Apachawm nai kachai y akawn u.

²¹ Kai Pawla, kaimy i kiu kypkyp y kawn nai leu kang tajiu pi nai ne.

²² Ami py Areng ai tamen y baly amsawi lawi nai awm sy.

²³ Achi i Areng ly ang jeu mang. Areng Isu Krista i pahenra ly nangchi teng y awm sy.

²⁴ Krista Isu y kai i tamen naira ly nangchi bawibawi teng y awm sy. Amen.