ISAIA 62 - Khumi Common Language Bible

¹ Kai ly Jerusalem mary ai atho pei nai leu thui pi ai. Huni mary ly atleu naira nga iy, nichi i eaung naira ly vum y angvang nai maiteaung kamta, angvang y ryrei ly Jerusalem mary i vui kaawm pypy ai ny y.

² Aw Jerusalem mary, khumi cheng cheaungkhangchi ly nang i eaung naira niu u ai! Samrang bawibawichi py, nang i nang parai nai niu u ai. Nang ly Areng mymy kypkyp my pei nai amyn kangtha loh ai.

³ Nang ly Areng i vui y apu parai nai areng lukhym lawm ai.

⁴ “Paleng vui naira avum nai khumi,” nanai amyn loh ai ny y. Nang i pri py, “Akhai su nai aju,” nanai amyn palau ai ny y leang bo. Nang i amyn kangtha ly “Tameuh my kawn nai neampachy,” nanai lawm ai. Nang i pri py, “Amotheu parai naimy pom nai,” nanai amyn loh ai. Ati mana nai mo nabaly Areng ly nang ai kawn nai deaungkho y, juvo lawm nai keung ly mymy i aju ai tamen nai kamta, nang i pri ai py tamen ai.

⁵ Mymy ly nang ai deaung vawi nai anglo kamta pom ai. Deaung vawi nai anglo ai, aju palyn nai keung my khrei nai kamta, Tameuh my nang ai tamen ai.

⁶ Aw Jerusalem mary, kai ly nang i mary apaichi salo y, tamcheaung risachi khai nai ne. Nichi ly vum kanithun, neng tleirei awm py thai ai ny y. Nichi ly Areng ai mymy i adeu nai leuchi pany jo ai nai sa ai. Mana khala py tami y ai nai pany hai pi ai.

⁷ Mymy ly Jerusalem mary ai palum teang iy, khaileaung pri vereichi my palo nai mary lawm hai y ryrei ly nichi ly mymy ai awm py hai ai ny y.

⁸ Areng ly sa thai naira lamtang kiu hawi vaineng abeu bo. “Nang i amti amjangchi ly paleung ka-echi i vui, cha nei ateaung lawm ai ny y. Cheng takhra khumichi py, nang i atho sa nai kreip hang nei ai nai nga u ai ny y.

⁹ Na i py amti amjangchi ui iy pakym achu nai nangchi naini hunichi cha u naimy Areng ai palo u ai. Kreip athaichi kry iy athai jaw nai nangchi naini, kai i Achura yhm apai theung y, kreip hang nei ai nai nga u ai.”

¹⁰ Jerusalem mary i khumichi awi, mary theung i nai theu u; amychi i pri y vawi nai nangchi i khumichi i vui lam so pi u! Lam pui lam len so u; lengseaungchi aphi u pawn! Khumi mipuichi pany hai ai nai ka-ma-ra tamkhawnchi theaung u.

¹¹ “Nangchi ai atleu nai keung Areng ly mymy i atleu pi nai khumichi ai hawi iy ang jeu ai,” nanai Jerusalem mary i khumichi teng y thui pi ai nai, Areng ly khaileaung pri khumi bawibawichi teng y amthang hai ai.

¹² Nangchi ly “Tameuh i chai parai nai khumichi,” “Areng i atleu nai khumichi,” nanai ang palau ai. Jerusalem mary ai, “Tameuh i tamen nai mary pui,” “Tameuh my khai su y nai mary pui,” nanai amyn palau nai avum ai.