ISAIA 60 - Khumi Common Language Bible

Jerusalem mary i mo mang i nang parai naira

¹ Aw Jerusalem mary, anglaw iy kanito kamta angvang ba. Nang i kangvang ly tym bo. Areng i nang parai naira ly nang i tlang tleaung y kangvang ko bo.

² Khaileaung pri y awm nai cheng takhra khumichi tlang tleaung y, kaveng my khiu teu i py, nang i tlang tleaung y ly Areng i kangvang my ko ai. Mymy meimai i phum-ang sangso ly nang i tlang tleaung y tym iy awm jo ai.

³ Khumi cheng cheaungkhangchi ly nang i kangvang awm naira mang py, samrangchi ly nang i khawn kani si ko nai sangso mang py ang jeu u ai.

⁴ Nang i tengpang y ati mana awm mo, nanai khen cham; Nang i khumichi ly mychi i pri y vawi teang ai nai akachu u bo! Nang i chapochi ly kamlo i nai ang jeu u ai. Nang i chaniuchi ai tapawm naimy ang jeu u ai.

⁵ Nang ly hini atitichi niu i, amo theu ai. Nang i paleung anghyn ai. Khumi cheng cheaungkhangchi ly mychi i yhmtheaung katuichi ai, nang teng y tym hai ai. Nichi i yhmtheaungchi ly pangli vai mang i dengdairei ang tym hai ai.

⁶ Vawn tang nai kula-iu kanghu puichi ly Midian pri hawi Epha pri dengdairei ang tym iy, nang i meingtym y kawi na ai. Seba pri i muku hawi mui katuichi ang syn u ai. Khumichi ly Tameuh i sa nai sai satang kahawi ai palo u ai!

⁷ Kedar pri hawi Nebaioth pri i beram ngiereichi ai kapathypra tawnbawichi lawm ai nai nang teng y ang syn pi iy, Areng my kawn ai nai, maicham salo y apathyp u ai. Areng ly mymy i Achura yhm y mani hawi py atawm y pa-rei, phum-ang nang parai hai ai.

⁸ Tamaichi kamta py, i-avym nai apryn buhuchi kamta py, tuisang y so prei naimy ang jeu nai samphochi ly ati samphochi mo?

⁹ Huni samphochi ly pri kamlo mang i dengdairei, Tameuh i khumichi ai, mychi pri mang y tang nai samphochi ne. Hunichi ly Israela chengchi i chai parai nai Tameuh ai palo ai nai muku hawi tangkachi syn u. Mymy ly mymy i khumichi ai tahm pasang nai ne.

¹⁰ Areng my Jerusalem mary ai, “Cheng takhra khumichi ly nang i mary apaichi sa u palai teang ai. Nichi i samrangchi py nangchi i kalop ang sa pi ai. Kai ly kado theu nai deaungkho y, nangchi ai kang pajeng nai ne. Na i py vai ly nangchi ai meimai kahawi pei iy, kang pahen ai.

¹¹ Khumi cheng cheaungkhangchi i samrangchi ly mychi i vawnsaichi syn u thai ai nai, nang ly nangmy i apai katheu ai, vum, kanithun paeaung ai nai tla.

¹² Na i py nang i kalop sa ai nai ngai y nai khumichi ly tamyh pawn nai avum u ai.

¹³ “Aw. Jerusalem mary, nang ai kang palum teang iy, kai i Achura yhm khen apu hai ai nai hawi, Kai i kheu chiura meingtym nang parai hai ai nai nichi ly Lebanon daichi theung i vawi patyp nai maicha keung, tadera keung hawi tasura keungchi ai nangchi teng y ang syn pi ai.

¹⁴ Nangchi ai pahyp y naimy ana nai khumichi i kangpreangchi ly nangchi teng y jeu iy, lu meung naimy ang chiu u ai. Vaichi khala y nang ai khumi aniu y nai khumi bawibawichi ly nang i kheu keung y ambeu iy chiu u ai. Nichi ly nang ai, ‘Israela chengchi i chai parai nai Areng i mary pui Zion mary,’ nanai py palau u ai.

¹⁵ “Nang ly khumi angso savai tlang iy nyn va nai niu ngai y naira avum nai mary lawm y leang bo. Kai ly nang ai nang parai iy apu parai nai, deungtasarei amo theu ai hawi nai mary lawm hai ai.

¹⁶ Amhm ly chanau ai kanu panei nai kamta, khumi cheng cheaungkhangchi i samrangchi ly nang ai ang kry u ai. Kai, Areng ly nang ai atleu bo, nanai py, Israela chengchi i ati cheaungkhang sa thai nai Tameuh ly nang ai miseaungra i nai alaw hai bo, nanai py, nang ly pany ai.

¹⁷ “Kai ly nang ai kheupaja jeng y muku, tamo jeng y tangka, dengkeaung jeng y kheupaja kang pei ai. Nang ly lengseaung jeng y tamo nga ai. Nangchi ai peang nai keungchi ai adyh adawi nai hawi tlamsa naimy peang hai ai.

¹⁸ Khrukhra nai katyn katengchi theu ai ny y leang bo. Nang i pri py phra naira avum bi ai ny y. Kai ly mary apai kamta nang ai ama hai iy kang kry ai. Nang py nangmy ai atleu nai molam y kai ai palo ai.

¹⁹ “Kanithun y kanito py, vum y lo py, nang i kangvang lawm ai ny y. Kai, Areng naini, nang i vui deungtasarei kangvang lawm ai. Kai i nang parai nai kangvang sangso ly nang i tlang tleaung y angvang ai.

²⁰ Kai, Areng ly nang i vui kanito, lochi tleaung y akan keh nai deungtasa kangvang lawm ai. Hunaibaly nang i vo tangam nai kanichi ly kheih vui ai.

²¹ Nang i khumi bawibawichi ly kateng sa u naimy, pri py peang ai nai nga u jojo ai. Khumi bawibawichi i mo y kai i nang parai nai amteng hai ai nai, kai ly nangchi ai kry iy kapalum ai.

²² Nang i di keh nai, anem keh nai yhm dengtheung malawn py, sang neangneang peung iy, sa thai naira len nai khumi cheng lawm ai. Neng tym nai khala y kai ly hina nai kamta tym hai kasa ai. Kai ly Areng ne na a!