ISAIA 55 - Khumi Common Language Bible

Areng my pahen naira pei nai

¹ Areng my, “Tui ahai nai khumi bawibawichi awi, jeu u; hi y tui awm! Paisa tangka by y nai khumichi awi jeu u ly, choh van iy cho u! Kanu tui hawi kreip hang vang u! nangchi ati sai py vang tlo y leang!

² Cha nei kahawi ny y pui naimy, ati mana nai tangka pasum ai mo? Nang i kalop sa nai vang pasum iy, ati mana nai kajeu kanglam awm ai mo? Kai i leu tangai iy, kai i thui nai kamta sa u lawh baly, nangchi ly hawi keh nai teicha teineichi, cha ai nai nga u ai.

³ “Kai i khumichi awi, kai i leu tangai iy, kai teng y jeu u. Hina nai kamta sa baly nangchi ly hengra nga u ai! Kai ly nangchi hawi deungtasarei leu maikawm asa iy, Davida teng y adeu nai amtheaung nairachi ly nangchi teng y kang pei ai.

⁴ Kai ly ni ai khumi cheng cheaungkhangchi i tavailu areng kehra y khai iy, kai i sa thai naira ly khumichi i mo y, pany hai pi ai.

⁵ Vai, nangchi ly pri takhra khumichi ai palau u ai. Vaichi khala nichi ly nangchi ai pany y; na i py vai ly nangchi teng y amkawm ai nai angpreng naimy, ang jeu u ai! Israela chengchi i chai parai nai Areng Tameuh, nangchi i Tameuh ly hini atiti bawibawichi tym hai ai. Kai ly nangchi ai tahm asang naira hawi, nang parai naira pei ai”.

⁶ Areng ly vai, nangchi sahawi y awm; mymy mang y hi iy hnei takeng u.

⁷ Khumi hawi y naichi ly mymychi i hawi y sa naichi khai su iy, mychi i paleung ka-dawnchi py takhra vui ai nai tla. Nichi ly achi i Areng Tameuh mang y ali u teang ai nai tla. Mymy ly pahen iy law tleaung hai kaliki ai.

⁸ Areng my, “Kai i ka-dawnchi ly nangchi i ka-dawnchi hawi atawm y. Kai i reitachi py, nangchi i reitachi hawi takhra nai ne.

⁹ Kani khusang ly khaileaung tleaung y asang nai kamta, kai i ka-dawnchi ly nangchi i ka-dawnchi tleaung y asang nai ne.

¹⁰ “Kai i leu ly khaileaung y tui pei ai nai tla hai nai kanitui hawi ji amaichi kamta ne. Hunichi ly amti amjangchi prau hai reng. Pati ai nai tichi hawi cha ai nai teicha teineichi lawm hai reng nai ne.

¹¹ Kai i thui nai leuchi py, hina nai kamta tym hai ai. Huni leuchi ly kai i dawn pasym naichi angym hai ai. Kai i pataw nai kalop ngiereichi sa ai.

¹² Nangchi ly Babulon pri i dengdairei, amo theu parai naimy theu u ai. Mary theung i nai tlamsa naimy pahawi nai avum u ai. Mawi katheang kalenchi ly aeu naimy khulym thui u ai. Dengkeaung keungchi py, amo theu parai naimy aeu u sau ai.

¹³ Vai, aleng keungchi prau nai meingtymra y saitleang keungchi prau ai. Aleng phreungchi awm nai meingtymra y preaungmui keungchi prau ai. Hini atitichi ly kai, Areng i kuchi pany jo ai nai, deungtasarei khaw jo nai ka-ma-ra harei lawm ai,” napi.