ISAIA 38 - Khumi Common Language Bible

Samrang Hezekia no nai hawi no hawi ali teang nai

¹ Huni neng thymthang khala y samrang Hezekia ly deivi na pa-rei no nai ne. Amoz i chapo Isaia ly no de ai nai samrang teng y tym i, “Nang ly tuni no naira i hawi ali teang ai ny y nai deaungkho y, nang i kangkhym kangtem leu taviu ai awm naichi taviu ai nai, Areng my leu ang pei bo. Hunai deaungkho y dei ai nai angveirym ba,” napi.

² Hezekia ly angpang mang y motha iy,

³ “Aw Areng, kai ly nang ai ka-ym awm naimy chiu iy, nangmy sa hai ai ngai nai kamta atho kasa nai ai pany pi jo kyh ba,” nanai chiu sa chum baly paleung si nai khrikhri pa-rei vo nai ne.

⁴ Naibaly Areng ly Isaia ai

⁵ Hezekia teng y pato ali teang bi i, “Nang i amsi pajo Davida i Tameuh kai, Areng ly nang i chiu sa hnei takeng nai thai i, nang i meikatuichi kaniu bo. Kai ly nang ai mo mang y saneng holai pangrei heng ai nai kang pei ai.

⁶ Kai ly nang hawi vanrei hini Jerusalem mary ai Asuria empara samrang kiu i nai atleu ai. Hini mary ai ama hai ai, nanai samrang Hezekia teng y thui pi,” napi.

²¹ Isaia ly samrang teng y, “Samrang nang i uisalutabaura y thaidu athai bi baly, huni ang vawi ly hawi pyn vui ai,” napi.

²² Naibaly samrang Hezekia my, “Kai ly Achura yhm y chei pajau ai, napi nai ly ati ka-ma-ra deaungkho y pany pajau ai mo?,” nanai deng.

⁷ Isaia my, “Areng ly mymy i leu adeu nai kamta sa ai, nanai nang ai pany hai ai nai ka-ma-ra harei patei pi ai.

⁸ Areng ly samrang Ahaz i sa nai kani nari i pa-pui ai nithun mang y kheubyn horei anaw hai vui ai,” napi. Thui pi nai kamta pa-pui ly kheubyn horei anaw nai ne.

⁹ Hezekia ly no hawi ali teang nai khala y, anui mang i palo nai khulym tajiu nai ne.

¹⁰ Kai ly saneng kachi awm ai ny y, hawi khyp khala my tavau pri y ang vum ai bo, nanai kadawn nai ne.

¹¹ Hini heng nai deung y kai ly Areng ai py, khumi angsochi ai py, mo mang y mana kha py kaniu ai ny y leang bo, nanai dawn nai ne.

¹² Taphra vui nai tai kamta py, pe anengra i nai oh iy ajiu vui nai kanih kamta py, kai i heng nai deung ly leu baw iy tem veng bo.

¹³ Kai i hiuchi ai khrangsi my taai nai kamta, kai ly no patang nai vumtorei kavo bo. Tameuh ly kai i heng nai deung dawi hai bo, nanai athang khai.

¹⁴ Kai i raawi ly ahyn thlyhthlyh na; kai ly buhu kamta katangam bo. Kani mang y khen angdeang nai nawi ala nai deaungkho y, kai i mei khohai na bo. Aw Areng, hini patangra i nai kai ai atleu pi kyh ba.

¹⁵ Hini kalop ai Areng my sa nai ne i, kai ati thui pajau ai mo? Kai ly paleung kabi tym nai y, i amhm y bo.

¹⁶ Aw Areng, kai ly nang i vui, nangmy leaungrei i vui kaheng ai. Kai i no ang vawi hawi hai iy kai ai heng ai nai pei kyh ba.

¹⁷ Kai i paleung bi naira ly paleung savairu nai mang y amtlau vui ai. Nang ly kai i tlang ai ka-jeira cheaungkhangra i nai atleupi bo. Kai i kamngo ngierei py pahen pi bo.

¹⁸ Tavau pri y ly nang ai ami py palo thai y leang. Khumi kadeichi ly nang i ka-ym awm naira y ym pajau y.

¹⁹ Vai, nang ai kaimy kang palo nai kamta heng nai khumichi naini nang ai palo u nai ne. Ampochi ly cho chanauchi ai nang i ka-ymra satang thui pi u bo.

²⁰ Aw Areng, nang ly kai i no ang vawi hawi hai bo. Kaichi ly tarochi beu iy, nang ai palo nai khulym thui u ai. Kaimychi heng nai sala ryrei ly nang i Achura yhm y palo nai khulym thui ai.