ISAIA 21 - Khumi Common Language Bible

Babulon mary anawi nai paleung mei y niu nai

¹ Hini leu pei nai ly Babulon mary i vui ne. Khutaha daichi ka-ym theung y aho prei nai ali tengkaleng kamta, ka-jeira ly jei hawi parai nai pri mang dengdairei ang tym ai.

² Ana piupa nairachi, vaineng takan nai hawi taphra nairachi ai paleung mei y kaniu bo. Aw Elam tavaimichi awi, tiu u! Aw Media tavaimichi awi, marychi ai katanmeuh u! Tameuh ly Babulon mary i khumichi my pei nai ngari kamtang anawn hai ai.

³ Paleung mei y niu nai, thai naichi deaungkho y kai ly deaungdi tapen nai neampachy kamta athengra iy, patang naira avum nai ne.

⁴ Kai i lu ly ami kalaka naimy, kai ly jei nai paleung kaso theu na bo. Kai ly dym tengsa kadeaung nai ne. Na i py huni neng ly kai ai athengra hai nai ny y baly, ati sai py so y nai ne.

⁵ Paleung mei y dym biu cha nai pawi pui harei sawn yb nai kaniu nai ne. Angvynchi ateh ai nai sampraibyh bai yb bo. Nichi ly cha nei u nai thym khala y, “Tavai luchi awi! Nangchi i khupui angvei u rym!,” nanai leu pei nai vaimy tym ryp bo.

⁶ Huni bo y Areng my kai teng y, “Nang chei ly tamcheaung leaungrei ai khai chum baly, ni i niu naichi amti pi teang ai nai thui pi ba.

⁷ Leaungnyh ka-bom, leaungnyh ka-bom keaungngo atang nai risachi ang jeu nai py, keaungngo kano kasauchi, kula-iuchi atang nai khumichi ang jeu u nai py niu lawh baly, huni khumichi ai khen patawm ai nai tamcheaung teng y taviu kheng ba,” nanai leu pei bo.

⁸ Tamcheaung my, “Areng, kai ly hini angdeangra salo y angdo iy, vum kanithun tamcheaung ang mo nai ne,” nanai aeu iy thui pi nai khala y,

⁹ keaungngo atang nai risachi ly leaungnyh ka-bom, leaungnyh ka-bom vaimy theu u bo. Hunaibaly tamcheaung my, “Babulon mary anawi veng bo. Nichi i chiu nai myn ngiereichi py, khaileaung y tleu piupa veng bo,” nanai satang thai hai nai ne.

¹⁰ Kai i khumichi awi, nangchi ly chohvui kamta ati piupa nai avum u bo. Na i py kai ly Israela chengchi i Tameuh, ati cheaungkhang sa thai nai keung Areng teng i dengdairei thai nai satang ai, vai nangchi teng y kang thai hai pi bo.

Edom pri khumichi teng y leu pei nai

¹¹ Hini leu pei nai ly Edom pri i vui ne. Edom pri i khumi leaungrei my kai teng y, “Aw tamcheaung awi, dym tengsa kheih ai nai mana tanrei kra ai mo, mana khala y tem ai mo, nanai kai ai thui pi ba,” nanai aeu naimy deng bo.

¹² Kaimy py, “Khutawi mo tym ai bo. Na i py dym tengsa tym ali teang ai. Nang deng bi ai nai ngai lawh baly, jeu bi iy deng ba,” nanai pathang pi.

Arabia pri molam y leu pei nai

¹³ Hini leu pei nai ly Arabia pri i vui ne. Dengkeaung keung prau y nai Arabia khu ka-peangra y, cha nei vawnchi tang nai ka-richi anawn reng nai, nangchi Dedan chengchi awi,

¹⁴ nangchi teng y ang jeu u nai, tui ahai nai khumichi ai tui pei u. Nangchi Tema khumichi awi, tavai kapreangchi ai teicha teinei pei pi u.

¹⁵ Khumichi ly mychi ai tleh ai nai haisau tamochira i nai py, ko ai angveirym nai thailihochi teng i nai py, tavai takai ngiereichira i nai py, tleaung ai nai preang u nai ne.

¹⁶ Huni bo y Areng my kai teng y, “Sanengrei awm nai bo khala y Keda cheng theaungchi i phum-ang ly tama pyn vui ai.

¹⁷ Huni cheng theaungchi theung y sorai paleung awm keh nai thailiho pa naichi py, maidenreichy awm khyh ai. Hini ly Israela chengchi i Tameuh kai, Areng my thui pi nai leu ne,” napi.