ISAIA 20 - Khumi Common Language Bible

Tlang ka-keu awm nai amo

¹ Asuria samrang Sarkon i leu pei nai kamta, Asuria tavaimi kamkawm lu kalen keh ly Philistin pri Asadod mary ai tiu bo.

² Lawn veng nai saneng thomrei nai khala y, Areng ly Amoz i chapo Isaia teng y, my i amchiu nai paisiu kanih hawi phainai aleng vui ai nai leu pei nai kamta, Isaia ly ateaung by y, phainai amchiu y naimy awm nai ne.

³ Asadod mary anawi nai khala y Areng my, “Kai i miseaung Isaia ly phainai amchiu y, tlang ka-keu naimy saneng thomrei chei kathiu chei kalau nai ly Aikupta pri hawi Ethiopia prichi avum ai nai leaungsai ka-ma-ra ne.

⁴ Asuria samrang ly hini pri nyhrei theung i patiu nai langhengchi ai, tlang ka-keu naimy hawi vui ai. Nichi ly miteaung, deaungdi takhawi y, phainai abawi y, mychi i kangji py tamym pajau y naimy tlang ka-keu abang u i, Aikupta pri ai kangji nga hai ai.

⁵ Ethiopia pri ai ym iy, Aikupta pri satang kamlyh leu katheu u nai khumichi ly athang khai naira tama ai i, paleung phra u ai.

⁶ Huni neng tym nai khala y Philistin tavo peang y awm nai khumichi ly “Kaichi ai Asuria samrang teng i nai ama hai ai nai, kaichi my paleung pado nai khumichi i avum nai sai ai khen u cham! Kaichi ly ati mana nai y dei y naimy katleaung u thai ai mo?,” nanai thui u ai.